သျှမ်းပြည်အရှေ့ပိုင်း မိုင်းပျဉ်းတောင်တွင် မိုးရွာသွန်းခြင်းကြောင့် လမ်းပျက်စီးကာ တွဲကားကြီးများ ရာနှင့်ချီ ဆက်လက်ပိတ်မိနေပြီး သွားလာရန် ခက်ခဲနေကြောင်း စုံစမ်းသိရသည်။

ဇွန်လ တတိယပတ်မှ စတင်ပြီး သျှမ်းပြည်အရှေ့ပိုင်း မိုင်းပျဉ်းမြို့နယ်ရှိ လွိုင်စောင်းတောင်တွင် မိုးသည်းထန်စွာ ရွာသွန်းခြင်းကြောင့် လမ်းများ ပျက်စီးကာ တွဲကားကြီးများ နေ့စဉ် ရာနှင့်ချီ ဆက်လက်ပိတ်မိနေပြီး သွားလာရန် ခက်ခဲနေကြောင်း ကုန်တင်ယာဉ်မောင်း ကားသမားများက ပြောသည်။

“လမ်းတွေကတော့ မိုးရွာရင် ကားကြီး အရမ်းပိတ်တယ်။ ကားကြီးတွေက ပိတ်မိနေတာ အတက်ရော အဆင်းရောဆို ရာနဲ့ချီတယ် ပိတ်မိနေတာ။ အခုက မြဝတီကော၊ မြောက်ပိုင်းကော ကားကြီးတွေ မသွားရတော့ ဒီဘက်တစ်လမ်းတည်း လာတော့ လမ်းတွေပိတ်ကြတာပေါ့။ တချို့တွေကြလည်း လမ်းမရှောင်ပေးချင်တာနဲ့ ပိတ်မိနေကြတာပေါ့။ အဲ့ကြောင့် ကားငယ်တွေလည်း လမ်းကျဉ်းတော့ ပိတ်မိကုန်တာပေါ့”ဟု ၎င်းကားသမားက သျှမ်းသံတော်ဆင့်ကို ပြောသည်။

မိုင်းပျဉ်းတောင်တွင် ကားပိတ်ဆို့မှုများ ဖြစ်ပွားပြီးနောက် အတက်အဆင်းကို ၂ နာရီတစ်ကြိမ် အချိန်အကန့်အသတ်ဖြင့် ပြုလုပ်ပေးသော်လည်း တွဲကားကြီးများ လမ်းတွင် ဆက်လက် ပိတ်မိနေကြောင်း အသက် ၄၅ ဝန်းကျင် ယာဉ်မောင်းအမျိုးသားတစ်ဦးက ဆက်ပြောသည်။

“သူတို့က အတက်အဆင်းကို ပုံသေလုပ်ပေးတာမျိုးမှ မရှိတာ။ အချိန်တောင် ၂ နာရီ မပြည့်သေးဘူး၊ ကားတွေလွှတ်လိုက်တာလည်း ရှိတာပေါ့။ သူတို့က အဲ့လိုသာ လုပ်ပေးမယ်ပြောတာ သေချာမှ လိုက်မလုပ်တာ။ အတက်ကားက အကုန်မကျော်သေးဘူး၊ အဆင်းကို လွှတ်ပေးလိုက်တော့ အဲ့လမ်းပိုင်းမှာ ကားတွေပြန်ပိတ်ပြန်‌ရော”ဟု အသက် ၄၅ ဝန်းကျင် ၎င်းယာဉ်မောင်းအမျိုးသားက သျှမ်းသံတော်ဆင့်ကို ပြောသည်။

ထိုသို့ လမ်းတွင် ကုန်တင်ယာဉ် ကားကြီးများ ရာနှင့်ချီ ပိတ်ဆို့မှုကြောင့် ခရီးသွားယာဉ်ငယ်များ သွားလာရန် ခက်ခဲပြီး လမ်းပိုင်းတွင် ညအိပ်ရခြင်းများ ကြုံနေရကြောင်း ၎င်းက ဆက်ပြောသည်။

“လမ်းတွေမှာ အရမ်းပိတ်ပြီး ကြာရင် နှစ်ရက် အိပ်ရတာရှိတယ်။ ကားကြီးတွေဆို ၁ ပတ်လောက်တော့ ကြာတယ်။ အဲ့လိုတွေ ပိတ်မိရင် စားဖို့သောက်ဖို့က အရမ်းခက်တယ်။ ရွာတွေနားမှာ အိပ်ရရင်တော့ ကောင်းတယ်။ ရွာတွေမဟုတ်ဘဲ တောထဲအိပ်ရရင်တော့ စားဖို့သောက်ဖို့က အရမ်းခက်ခဲတယ်၊ ကားပေါ်မှာပဲ အိပ်ရတာပေါ့”ဟု အသက် ၄၅ ဝန်းကျင် ယာဉ်မောင်းအမျိုးသားတစ်ဦးက ပြောသည်။

လက်ရှိတွင် ၎င်းကုန်တင်ယာဉ် ကားကြီးများကြောင့် လမ်းများ ပျက်စီးခြင်း၊ ကားကြီးများ ပိတ်ဆို့၍ သွားလာရန် ခက်ခဲခြင်းများကြောင့် ခရီးသွားယာဉ်ငယ်အချို့နှင့် ကုန်တင်ယာဉ်များကို ရပ်နားထားရခြင်းများ ရှိနေကြောင်း ကားသမားများက ပြောသည်။

ထိုလမ်းတကြောတွင်လည်း ကားမှောက်ခြင်း၊ ရွှံ့နွံအတွင်း ကန့်လန့်ခံနေခြင်း၊ ကားပျက်၍ ဖယ်ရခက်နေသည့်ကားများ စသည့် အခက်အခဲများစွာဖြင့် ပိတ်မိနေသည့် ကားများ ကျန်ရှိနေသေးကြောင်း ၎င်းက ဆက်ပြောသည်။

သျှမ်းပြည်မြောက်ပိုင်းတွင် “၁၀၂၇ စစ်ဆင်ရေး” နောက်ပိုင်း စစ်ကောင်စီနှင့် ညီနောင်မဟာမိတ်တို့ တိုက်ပွဲများကြောင့် မန္တလေး-မူဆယ် ပြည်ထောင်စုလမ်းမကြီးတွင် ကုန်တင်ယာဉ်များ သွားလာ၍ မရတော့ဘဲ နယ်စပ်ကူးသန်းရောင်းဝယ်ရေးအတွက် မန္တလေး-မိတ္ထီလာ-တောင်ကြီး-ကျိုင်းတုံ-မိုင်းလား လမ်းမကြီးကို အဓိကထား အသုံးပြုသွားလာနေရကြောင်း ကုန်သည်များထံမှ သိရသည်။