သျှမ်းပြည် ကျောက်မဲမြို့ရှိ စစ်ကောင်စီလက်အောက်ခံ အမြောက်တပ်နှင့် ပြည်သူ့ဆေးရုံကြီးတို့ကို တအာင်း(ပလောင်) အမျိုးသားလွတ်မြောက်ရေး တပ်မတော် TNLA က ထိန်းချုပ်လိုက်ပြီး မြို့မရဲစခန်းကို ဆက်လက်တိုက်ခိုက်နေကြောင်း စုံစမ်းသိရသည်။
ယနေ့ (ဇွန်လ ၂၆ ရက်) နံနက် ၉ နာရီခန့်မှ စတင်၍ ကျောက်မဲမြို့ပေါ်နှင့် အနီးတဝိုက် ကျေးရွာများတွင် စစ်ကောင်စီတပ်နှင့် TNLA တပ်ဖွဲ့တို့ တိုက်ပွဲပြင်းထန်ခဲ့ပြီး နေ့လယ် (၁၂) နာရီကျော်ခန့်တွင် မြို့ဝင်ဆိုင်းဘုတ်အနီးရှိ အမြောက်တပ်-၃၅၂ နှင့် ပြည်သူ့ဆေးရုံတို့ကို TNLA တပ်ဖွဲ့က သိမ်းပိုက်ထိန်းချုပ်လိုက်ကြောင်း ကျောက်မဲဒေသခံများက ပြောသည်။
“၉ နာရီလောက်ကနေ တိုက်ပွဲပြန်စနေတာ ဒီတစ်ခါတော့ ပြင်းတယ်ပြောရမယ်။ ရပ်ကွက်တွေထဲ လက်နက်ကြီးကျတယ်။ မြို့အဝင်မှာ အစက ၂၂ တပ်ပေါ့ အခုက ၃၅၂ အမြောက်တပ်ကို အရင်သိမ်းရတယ်။ နောက်ပြီး ပြည်သူ့ဆေးရုံကိုလည်း TNLA ဝင်ပြီး နေရာယူထားပြီ။ အခုကတော့ မြို့မရဲစခန်းကို အသည်းအသန် တိုက်နေကြတာ”ဟု ကျောက်မဲမြို့ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
လက်ရှိတွင် ကျောက်မဲမြို့မ ရဲစခန်းကို TNLA တပ်ဖွဲ့မှ ဆက်လက်တိုက်ခိုက်နေပြီး မိုးလုံလေလုံ အားကစားရုံနှင့် သစ်တောရုံးလမ်းတို့တွင်လည်း TNLA တပ်သားအများအပြား ရောက်ရှိနေကြောင်း ကျောက်မဲဒေသခံများထံမှ သိရသည်။
အလားတူ ယနေ့ (ဇွန်လ ၂၆ ရက်) မွန်းလွဲ ၁ နာရီခန့်တွင် ကျောက်မဲမြို့ ရပ်ကွက်(၂) ရန်ကင်းရှိ ပြည်သူနေအိမ်ပေါ်သို့ စစ်ကောင်စီတပ်မှ ပစ်ခတ်သည့် လက်နက်ကြီး ကျရောက်ပေါက်ကွဲခဲ့ရာ မိသားစုဝင် ၅ ဦးအနက် (၄) ဦး ပွဲချင်းပြီး သေဆုံးသွားခဲ့ကြောင်း ကျောက်မဲဒေသခံများက ပြောသည်။
“ကျောက်မဲအထွက် ရန်ကင်း ရပ်ကွက် ၂ ဘက်မှာ လက်နက်ကြီးကျပြီး မိသားစုဝင် ၅ ဦးရှိတာ ၄ ဦး ပွဲချင်းပြီး ဆုံးသွားတယ်။ အမျိုးသမီးတစ်ဦးပဲ လွတ်တယ်၊ သူ့မိဘတွေနဲ့ မောင်နှမ ၂ ယောက် ဆုံးသွားတယ်”ဟု ကျောက်မဲမြို့မှ ၎င်းဒေသခံ အမျိုးသားက သျှမ်းသံတော်ဆင့်ကို ဆက်ပြောသည်။
ကျောက်မဲမြို့နယ်တွင် စစ်ကောင်စီတပ်နှင့် TNLA တပ်ဖွဲ့တို့၏ နှစ် ရက်တာ တိုက်ပွဲအတွင်း အမျိုးသမီး ၂ ဦးအပါအဝင် အရပ်သား (၆) ဦးအထိ သေဆုံးပြီး စုစုပေါင်း (၁၄) ဦး ထိခိုက်ဒဏ်ရာရရှိထားကြောင်း ဒေသခံများထံမှ သိရသည်။
ယနေ့ (ဇွန် ၂၆)ရက် နံနက် ၅ နာရီခွဲခန့်မှ စတင်ပြီး ကျောက်မဲမြို့နယ် စခန်းသာရွာရှိ စစ်ကောင်စီတပ်စခန်းတွင်လည်း နှစ်ဘက်ထိတွေ့တိုက်ပွဲ ဖြစ်ပွားခဲ့ကြောင်း TNLA သတင်းနှင့် ပြန်ကြားရေးမှ ထုတ်ပြန်ထားသည်။
အလားတူ ကျောက်မဲမြို့အခြေစိုက် စစ်ကောင်စီတပ် စကခ-၁ နှင့် ခလရ-၅၀၁/၅၀၂ တပ်ရင်းတို့ကိုလည်း TNLA တပ်ဖွဲ့က ထိုးစစ်ဆင် တိုက်ခိုက်နေပြီး ငြိမ်းချမ်းရေးကုန်းတပ်စခန်း၊ ရပ်ကွက် (၈) ရှိ ကျောက်မဲခရိုင်ရဲရုံးနှင့် အခြားဌာနဆိုင်ရာရုံးများကိုလည်း TNLA တပ်ဖွဲ့က သိမ်းပိုက်ထိန်းချုပ်ထားနိုင်ကြောင်း ဒေသခံများ၏ ပြောပြချက်အရ သိရသည်။
Leave a Comments