သျှမ်းပြည် တောင်ပိုင်း ပင်လောင်းမြို့နယ် ဒေသခံစစ်ရှောင်များသည် စားနပ်ရိက္ခာများ၊ မိုးကာများ၊ ဆေးဝါးများအရေးပေါ်လိုအပ်လျက်ရှိကြောင်းစုံစမ်းသိရသည်။

ယင်းစစ်ရှောင်များသည် ဇွန်လ ၁၇ရက်မှ စပြီး ဖြစ်ပွားသော တိုက်ပွဲများကြောင့်တိမ်ရှောင်လာရခြင်းဖြစ်ပြီး တိုက်ပွဲရုတ်တရက် ဖြစ်ပွားသောကြောင့် ထွက်ပြေးချိန်တွင် အဝတ်တစ်ထည်ကိုယ်တစ်ခုဖြင့်သာ ထွက်လာရကြောင်းသိရသည်။

“အဓိကဆန်ပေါ့ လူကလည်းများတော့ ဆန်တွေ မလုံလောက်ဘူး။ပြီးရင် တစ်ချို့က မိုးကာတွေနဲ့ဘဲနေရတာ။တစ်ချို့တဲဆို လူ၁၀ယောက်လောက်ပေါင်းနေရတယ်။တစ်ချို့တော့လည်း ဘုန်းကြီးကျောင်းတွေမှာ နေရတယ်။ မိုးရာသီလည်းဖြစ်တော့ ရာသီတုပ်ကွေး၊နှာစေး၊ချောင်းဆိုးဖြစ်တာများတယ်။ခြင်ထောင်လည်းအရမ်းလိုတယ်”ဟု စစ်ရှောင်အမျိုးသမီးတစ်ဦးကသျှမ်းသံတောင်ဆင့်ကိုပြောသည်။

စစ်ရှောင်အများစုသည် ဝါးလီး၊စင်းတောင်း၊တောင်လေး၊ဝါးပြုံး၊ပင်ခွန်နှင့် ပင်လောင်းမြို့ပေါ်ရှိ ဘုန်းကြီးကျောင်းတို့တွင်အများစုဖြစ်ပြီး စုစုပေါင်း၂သောင်းကျော်ရှိကြောင်းသိရသည်။

“စစ်ရှောင်တွေ အရေးပေါ်ကူညီမှုလိုအပ်တဲ့ကိစ္စရပ်တွေ တောက်လျှောက်တွေ့ရတယ်။တိမ်းရှောင်မှုလုပ်ကြရာမှာ အိုးခွက်ပန်းကန်မပါလာတာတွေ၊ စောင် အခင်း မပါလာတာတွေလည်း အများကြီးရှိကြတယ်လို့ နေရာတိုင်းလိုအပ်ချက်တွေရှိနေပါတယ်။”ဟု စစ်ရှောင်အရေးကူညီပေးနေသူ တစ်ဦးကပြောသည်။

ယင်းစစ်ရှောင်များသည် နမ်းနိန်း၊တောင်စလုံး၊မြှောက်စလုံး၊လုံးပျဉ်၊နမ်းဖာမူ၊လင်ခံ၊ကုန်ပေါ၊ဗန်းမောက် အပါအဝင် ပင်လောင်းမြို့တောင်ဖက် ကျေးရွာပေါင် ၃၀ကျော်မှ ထွက်ပြေးတိမ်းရှောင်နေရကြောင်းသိရသည်။

ယခုတွင် တိုက်ပွဲပြင်းထန်နေဆဲဖြစ်ပြီး တိုက်ပွဒအတွင် စစ်ကောင်စီလက်နက်ကြီးကြောင့် ဒေသခံသေဆုံးတာ ၊ထိခိုက်တာ မြင့်တက်နေကြောင်း ဒေသခံများထံမှသိရသည်။