သျှမ်းပြည် နောင်ချိုမြို့ပေါ်ရှိ အထင်ကရ ဌာနဆိုင်ရာရုံးများကို ဝင်ရောက်နေရာယူထားနိုင်သည့် TNLA နှင့် PDF ပူးပေါင်းတပ်ဖွဲ့များက ဒေသခံများကို နေ့လယ် ၁၂ နာရီ မတိုင်ခင် ထွက်ပြေးတိမ်းရှောင်ရန် သတိပေးထားကြောင်း စုံစမ်းသိရသည်။
ယနေ့ (ဇွန်လ ၂၆ ရက်) နံနက် ၆ နာရီကျော်ခန့်မှ စတင်ပြီး နောင်ချိုမြို့ ဘူတာရပ်နှင့် ဈေးရပ်သို့ စစ်ကောင်စီတပ်မှ လက်နက်ကြီးဖြင့် ဆက်လက်ပစ်ခတ်ခဲ့ရာ တအာင်း(ပလောင်) အမျိုးသားလွတ်မြောက်ရေး တပ်မတော် TNLA နှင့် PDF ပူးပေါင်းတပ်ဖွဲ့များက ဒေသခံများကို နေ့လယ် ၁၂ နာရီ မတိုင်ခင် မြို့မှ ထွက်ပြေးတိမ်းရှောင်ကြရန် သတိပေးထားကြောင်း နောင်ချိုဒေသခံများက ပြောသည်။
“မြို့က ထွက်ခိုင်းတာကြားတယ်၊ အမျိုးတွေကော အသိတွေကော အခုပြေးနေကြပြီ။ စစ်တပ်က မြို့အဝင်အထွက် ပိတ်ထားတော့ တောင်ဘက်နဲ့ မြောက်ဘက်က ထွက်လို့ရတဲ့ လမ်းကနေ မြို့ပြင်ထွက်နေကြတယ်။ တချို့လည်း ယာခင်းထဲ၊ တချို့လည်း မြောက်ဘက်က တောတွေထဲ ပြေးမယ်လို့ကြားတယ်။ ပြေးနေကြပြီဆိုတော့ ဖုန်းက ကောင်းကောင်းပြောလို့မရဘူး”ဟု နောင်ချိုမြို့ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
စစ်ကောင်စီတပ်မှ နောင်ချိုမြို့တွင်း ဘူတာရပ်နှင့် ဈေးရပ်သို့ လက်နက်ကြီးဖြင့် ဆက်လက်ပစ်ခတ်နေပြီး ရပ်ကွက်အတွင်း ကျရောက်ပေါက်ကွဲခြင်းကြောင့် အရပ်သား ထိခိုက်သေဆုံးပြီး နေအိမ်ပျက်စီးမှုများလည်း ရှိနေကြောင်း နောင်ချိုဒေသခံများက ပြောသည်။
ယမန်နေ့ (ဇွန်လ ၂၅ ရက်) တွင် နောင်ချိုမြို့နယ် ကျောက်ကြမ်း၊ အုမ္မတီး၊ ခဲမွန်၊ ကံ့ကော်နှင့် နောင်ချိုမြို့အတွင်း စစ်ကောင်စီတပ်နှင့် TNLA၊ PDF ပူးပေါင်းတပ်ဖွဲ့တို့ တိုက်ပွဲပြင်းထန်ခဲ့ရာ စစ်ကောင်စီတပ်မှ ဂျက်ဖိုက်တာဖြင့် (၄) ကြိမ် လာရောက်ပစ်ခတ်တိုက်ခိုက်ခဲ့ကြောင်း TNLA သတင်းနှင့် ပြန်ကြားရေးဌာနမှ ထုတ်ပြန်ထားသည်။
လက်ရှိတွင် နောင်ချိုမြို့တွင်း တိုက်ပွဲများကြောင့် မြို့ခံများမှာ ထွက်ပြေးတိမ်းရှောင်ရန် စစ်ကောင်စီတပ်က မြို့အဝင်အထွက်နေရာများကို ပိတ်ထားခြင်းကြောင့် မြို့ပေါ်ကျန်ရစ်နေသူများလည်း စစ်ကောင်စီတပ်၏ လေကြောင်းတိုက်ခိုက်မှုများကို စိုးရိမ်နေရကြောင်း နောင်ချိုဒေသခံများက ပြောသည်။
Leave a Comments