သျှမ်းပြည် ကျောက်မဲမြို့အနီး တိုက်ပွဲများကြောင့် စစ်ဘေးရှောင် ၃၀၀ ကျော်သည် ဒေသအတွင်း လူမှုကူညီကယ်ဆယ်ရေးအသင်းများက ဖွင့်လှစ်ထားရှိသည့် ခိုလှုံရာစခန်းသို့ ရောက်ရှိနေပြီဖြစ်ကြောင်း လှုမှုကူညီရေးအသင်းထံမှ သိရသည်။
ယမန်နေ့ (ဇွန်လ ၂၅) ရက်တွင် ဖြစ်ပွားခဲ့သည့် တိုက်ပွဲများကြောင့် စစ်ဘေးရှောင်များသည် ကျောက်မဲမြို့နယ် နောင်ပိန်လေး၊ ခိုအုန်၊ နားပြိန်း၊ စခန်းသာနှင့် ဟိုပိန်း စစ်ရှောင်စခန်းတွင် လာရောက်ခိုလှုံနေရသည်ဟု စစ်ရှောင်အရေး ကူညီဆောင်ရွက်နေသူ အမျိုးသားတစ်ဦးက သျှမ်းသံတော်ဆင့်ကိုပြောသည်။
“နားပြိန်းကျောင်းမှာတော့ စစ်ဘေးရှောင် ၁၄၀ ကျော်လောက် ရှိတယ်။ ခိုအုန်ကျောင်းမှာတော့ ၄၀ ကျော်ရှိတယ်။ စခန်းသာမှာလည်း ၆၀ ကျော်လောက်ရောက်လာတယ်။ ကျန်တဲ့နေရာမှာလည်း အသီးသီး ရောက်လာကြတယ်” ဟု ၎င်းကပြောသည်။
အဆိုပါတိုက်ပွဲများကြောင့် ယမန်နေ့တစ်ရက်တည်းပင် ဒေသခံပြည်သူ ၂ ဦးသေဆုံးပြီး ကလေးငယ်အပါအဝင် ဒေသခံပြည်သူ ၁၅ ဦးခန့် ထိခိုက်ဒဏ်ရာရရှိထားကြောင်း လူမှုကူညီရေးအသင်းများကပြောသည်။
“အခုဒဏ်ရာရထားတဲ့သူတွေတော့ ဆေးကုသစရိတ်လိုတာပေါ့ဗျာ။ ဒါပေမဲ့ အခုအကြပ်တည်းထဲ ရောက်နေကြတာ။ ကျနော်တို့လည်း ပြောဖို့ကမသင့်တော်ဘူးလေ။ ဆေးကုသစရိတ်တော့ လိုတော့လိုတာပေါ့” ဟု လူမှုကူညီရေးအသင်းအဖွဲ့ဝင် တစ်ဦးက ပြောသည်။
လက်ရှိ ကျောက်မဲမြို့ရှိ စစ်ကောင်စီ အမြောက်တပ်ကုန်း အမှတ် (၃၅၂) အမြောက်တပ်ရင်းနှင့် စခန်းသာတို့တွင် တိုက်ပွဲဆက်လက်ဖြစ်ပွားနေသည်ဟု TNLA က ယနေ့ ဇွန်လ ၂၆ ရက် နံနက်ပိုင်းတွင် သတင်းထုတ်ပြန်ထားသည်။
Leave a Comments