သျှမ်းပြည် နောင်ချိုမြို့နယ်တွင် စစ်ကောင်စီတပ်နှင့် TNLA၊ PDF ပူးပေါင်းတပ်တို့ တိုက်ပွဲပြင်းထန်လျက်ရှိရာ နှစ်ဘက်တိုက်ပွဲအတွင်း ပြည်သူများ ပိတ်မိနေပြီး မြို့အဝင်အထွက် နေရာများကို ပိတ်ထားဆဲဖြစ်ကြောင်း စုံစမ်းသိရသည်။

ယမန်နေ့ (ဇွန်လ ၂၅ ရက်)မှ စတင်ပြီး နောင်ချိုမြို့နယ်အခြေစိုက် စစ်ကောင်စီတပ်စခန်းများကို တအာင်း(ပလောင်) အမျိုးသားလွတ်မြောက်ရေး တပ်မတော် TNLA နှင့် PDF ပူးပေါင်းတပ်ဖွဲ့များက ထိုးစစ်ဆင်တိုက်ခိုက်ခဲ့ရာ နှစ်ဘက်တိုက်ပွဲအတွင်း မြို့နေပြည်သူများ ပိတ်မိနေပြီး မြို့အဝင်အထွက် နေရာများကို စစ်ကောင်စီဘက်က ပိတ်ဆို့ထားဆဲဖြစ်ကြောင်း နောင်ချိုဒေသခံများက ပြောသည်။

“ဒီမနက်လည်း မြို့အနောက်ဘက်မှာ ပစ်နေကြတယ်။ မနေ့ညနေက ရဲစခန်းကို မဟာမိတ်ပူးပေါင်းအဖွဲ့တွေ ဝင်ပြီးနောက်ပိုင်း စစ်တပ်က မြို့အဝင်အထွက်တွေ ပိတ်ထားတာ၊ အဝင်လည်း မရ အထွက်လည်း မရဘူး။ ပြည်သူတွေလည်း ဘယ်မှ ရှောင်မရတော့ဘူး၊ အကုန်လုံး မြို့ထဲမှာ ပိတ်မိနေတယ်။ မြောက်ဘက်က‌ တောထဲပြေးဖို့ပဲရှိမှာ”ဟု နောင်ချိုဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

နောင်ချိုမြို့တွင်းရှိ အထင်ကရ ဌာနဆိုင်ရာရုံးများဖြစ်သည့် ပြည်သူ့ဆေးရုံ၊ မိုးလေဝသနှင့် ဇလဗေဒရုံး၊ မီးသတ်စခန်းနှင့် ရဲစခန်းတို့ကို TNLA နှင့် PDF ပူးပေါင်းတပ်ဖွဲ့တို့က ထိန်းချုပ်နိုင်ပြီးနောက် ညနေ (၆) နာရီခန့်တွင် ဘူတာရပ်နှင့် ဈေးရပ်သို့ စစ်ကောင်စီတပ်မှ လက်နက်ကြီးဖြင့် ပစ်ခတ်ခဲ့ရာ အမျိုးသမီး ၂ ဦး ထိမှန်သေဆုံးခဲ့ပြီး အမျိုးသမီးတစ်ဦး ဒဏ်ရာရခဲ့ကြောင်း နောင်ချိုဒေသခံများထံမှ သိရသည်။

အဆိုပါ သေဆုံး၊ထိခိုက်ဒဏ်ရာရရှိသူများကို သျှမ်းသံတော်ဆင့် သတင်းဌာန မှ ဆက်လက် အတည်ပြု စာရင်းကောက်ယူနေသေးသည်။

ယနေ့ (ဇွန်လ ၂၆ ရက်) နံနက် ၆ နာရီကျော်ခန့်မှ စတင်ပြီး နောင်ချိုမြို့ ဘူတာရပ်သို့ စစ်ကောင်စီတပ်မှ လက်နက်ကြီးဖြင့် ဆက်လက်ပစ်ခတ်ခဲ့ရာ ရပ်ကွက်အတွင်း ကျရောက်ပေါက်ကွဲခြင်းကြောင့် အရပ်သားထိခိုက်သေဆုံးပြီး နေအိမ်ပျက်စီးမှုများလည်း ရှိနေကြောင်း နောင်ချိုဒေသခံများက ပြောသည်။

လက်ရှိတွင် နောင်ချိုမြို့နယ်ကို စစ်ကောင်စီမှ ဖုန်းနှင့် အင်တာနက်လိုင်း ဖြတ်တောက်ထားပြီး TNLA နှင့် PDF ပူးပေါင်းတပ်ဖွဲ့များက စစ်ကောင်စီတပ် ခလရ-၁၁၄/၁၁၅ တပ်ရင်းတို့ကို ဝင်ရောက်သိမ်းပိုက်နိုင်ကြောင်း ကနဦး ကြားသိရသော်လည်း သျှမ်းသံတော်ဆင့်အနေဖြင့် သီးခြားအတည်ပြုနိုင်ရန် ဆက်လက်စုံစမ်းနေသည်။