သျှမ်းပြည် မူဆယ်မြို့ ကောင်းနောင်ရပ်ကွက်ရှိ နေအိမ်ရှေ့တွင် ထိုင်နေသည့် အမျိုးသားတစ်ဦးကို ကားတစ်စီးက ဝင်တိုက်ခဲ့ခြင်းကြောင့် ပွဲချင်းပြီး သေဆုံးသွားခဲ့ကြောင်း စုံစမ်းသိရသည်။
ယမန်နေ့ (ဇွန်လ ၂၄ ရက်) တွင် မူဆယ်မြို့ ကောင်းနောင်ရပ်ကွက်တွင် နေအိမ်ရှေ့၌ ထိုင်နေသော အမျိုးသားတစ်ဦးကို အရှိန်ဖြင့်မောင်းလာသည့် Mark II အဖြူရောင် ကားတစ်စီး က ဝင်တိုက်သွားခဲ့ခြင်းကြောင့် ပွဲချင်းပြီး သေဆုံးသွားခဲ့ကြောင်း မူဆယ်မြို့ ဒေသခံများက ပြောသည်။
“ဝင်တိုက်သွားတဲ့လူက အမျိုးသားတစ်ယောက်ပါ။ အရှိန်မြန်သွားတော့ မထိန်းနိုင်ဘဲ အိမ်ရှေ့မှာ ထိုင်နေတဲ့ တစ်ယောက်ကို ဝင်တိုက်တာ၊ အဲ့ဒါကို ညှပ်သွားတာ။ ဆွဲထုတ်လာတော့ သူ့မှာ အသက်တောင် မရှိတော့ဘူး။ ရဲတွေကလည်း ရောက်လာပြီး တိုက်တဲ့လူကိုတော့ ချက်ချင်း ရဲစခန်း ခေါ်သွားတယ်”ဟု ဖြစ်စဉ်သိရှိသူ မူဆယ်မြို့ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
၎င်းကားမောင်း၍ ဝင်တိုက်သော အမျိုးသားသည် မန်ပိန်း ပြည်သူ့စစ် အဖွဲ့ဝင်တစ်ဦးဖြစ်ကြောင်း သိရပြီး ကားတိုက်ခံရ၍ သေဆုံးသွားသည့် အမျိုးသားသည် အသက် (၇၀)အရွယ်ရှိ အမျိုးသားတစ်ဦးဖြစ်ကြောင်း မူဆယ်ဒေသခံများက ပြောသည်။
အလားတူ မေလ ၇ ရက်တွင်လည်း မူဆယ်မြို့ ကောင်းနောင်ရပ်ကွက်တွင် သဲတင်လာသည့် ကားတစ်စီးသည် ၃ နှစ်အရွယ် ကလေးငယ်ကို ဝင်တိုက်မိ၍ ပွဲချင်းပြီး သေဆုံးသွားခဲ့ကြောင်း သိရသည်။
ထို့အပြင် ဇွန်လ ၂၀ ရက်တွင် မူဆယ်မြို့ ဟိုမွန်ရပ်ကွက်၌ စည်ပင်သာယာကား မတော်တဆ တိမ်းမှောက်မှုကြောင့် ကားပေါ်ပါလာသည့် အလုပ်သမား ၁၀ ဦး ဒဏ်ရာရှိခဲ့ပြီး ၎င်းတို့အထဲမှ ၄ ဦး ဒဏ်ရာပြင်းထန်ခဲ့ကြောင်း မူဆယ်ဒေသခံများထံမှ သိရသည်။
Leave a Comments