သျှမ်းပြည် ကွတ်ခိုင်မြို့နယ်ရှိ ကာလိုင်စာသင်ကျောင်းကို တအာင်း(ပလောင်) အမျိုးသားလွတ်‌မြောက်ရေး တပ်မတော် TNLA က ကျောင်းတံခါးများကို သစ်သားဖြင့် ကြက်ခြေခတ် သံရိုက်နှက်ပြီး ချိတ်ပိတ်လိုက်ကြောင်း စုံစမ်းသိရသည်။

ယမန်နေ့ (ဇွန်လ ၂၃ ရက်) ည ၉ နာရီကျော်ခန့်တွင် ကွတ်ခိုင်မြို့နယ် ကာလိုင်ကျေးရွာရှိ စာသင်ကျောင်းသို့ TNLA တပ်သား ၄၀ ခန့်သည် ကား ၃ စီးဖြင့် ရောက်ရှိလာပြီး စာသင်ကျောင်းအတွင်းရှိ ဆရာ/မများကို မောင်းထုတ်၍ ကျောင်းတံခါးများကို သစ်သားဖြင့် ကြက်ခြေခတ် သံရိုက်နှက်ပြီး သော့ခတ်ချိတ်ပိတ် ထားလိုက်ကြောင်း ကာလိုင်ဒေသခံ ကျောင်းသားမိဘများက ပြောသည်။

“ဆရာ/မတွေကို မောင်းထုတ်ပြီးမှ အကုန်လုံး ချိတ်ပိတ်သွားတဲ့ ပုံစံပေါ့နော်။ ကျောင်းဝင်းအတွင်းထဲ တံခါးတွေ အကုန်လုံး ကြက်ခြေခတ်ရိုက် ကပ်သွားတယ်၊ ရွာသူကြီးလာတာတောင်မှ ပေးမဝင်ဘူး။ အစက ဆရာမတွေကိုလည်း ခေါ်သွားမယ်လို့ ပြောတာ၊ ကလေးတွေလည်း ပါနေလို့ မခေါ်တော့ဘူး။ ကျောင်းဖွင့်ချင်ရင် သူတို့နဲ့ လာညှိနှိုင်းပါ ဆိုပြီးမှ ကချင်အမျိုးသားအလံ ထောင်ထားတာလည်း ဖြုတ်သွားတယ်” ဟု ကာလိုင်ကျေးရွာမှ ကျောင်းသားမိဘတစ်ဦးက သျှမ်းသံတော်ဆင့်ကို ပြောသည်။

ကာလိုင်စာသင်ကျောင်းဝင်းအတွင်း နေထိုင်သည့် ဆရာ/မ မိသားစု (၃)ခုကို TNLA တပ်သားများက မောင်းထုတ်ခဲ့စဉ် မည်သည့်ပစ္စည်းမှ မယူလိုက်ရကြောင်း သိရပြီး လက်ရှိတွင် ကျေးရွာအတွင်းရှိ ကျောင်းကော်မတီတစ်ဦး၏ နေအိမ်တွင် သွားရောက်နေထိုင်ရကြောင်း ကျောင်းသားမိဘများထံမှ သိရသည်။

ယခင်က ကာလိုင်စာသင်ကျောင်းဝင်းအတွင်း တပ်စွဲနေထိုင်သည့် TNLA တပ်သားများလည်း ယမန်နေ့ (ဇွန်လ ၂၃ ရက်) ညအချိန်တွင် ကျောင်းကို ချိတ်ပိတ်လိုက်ပြီးနောက် မရှိတော့ကြောင်း ကာလိုင်ဒေသခံများက ပြောသည်။

ကာလိုင်ကျေးရွာ အလယ်တန်းကျောင်းမှ ဆရာ/မများကို မောင်းထုတ်ပြီး စာသင်ခန်းများကို TNLA တပ်သားများက ပျဉ်ပြားဖြင့် ကြက်ခြေခတ် သံရိုက်နှက်၍ ချိတ်ပိတ်လိုက်ခြင်းနှင့် ပတ်သက်ပြီး သျှမ်းသံတော်ဆင့်မှ TNLA သတင်းနှင့် ပြန်ကြားရေးဌာနထံ ဆက်သွယ်မေးမြန်းခဲ့ရာ တအာင်းပြည်ပညာရေးကောင်စီ TLEC ထံသို့ ဆက်သွယ်မေးမြန်းရန်သာ ပြန်လည်ဖြေကြားခဲ့သည်။

ကျေးရွာကျောင်းကော်မတီအနေဖြင့် ကာလိုင်စာသင်ကျောင်း ဖွင့်လှစ်ခြင်းနှင့် ပတ်သက်ပြီး ကွတ်ခိုင်မြို့ပေါ်ရှိ TNLA တပ်ဖွဲ့၏ ခရိုင်ရုံး၌ ဇွန်လ (၅)ရက်နှင့် (၇)ရက်နေ့များတွင် နှစ်ကြိမ်တိုင်တိုင် သွားရောက်တွေ့ဆုံ ညှိနှိုင်းခဲ့သော်လည်း ပြေလည်မှုမရရှိခဲ့ဘဲ ဇွန်လ (၈) ရက်နေ့တွင် ကျောင်းပိတ်သိမ်းရန် TNLA တပ်ဖွဲ့မှ စာပေးပို့ခဲ့ကြောင်း သိရသည်။

“ကာလိုင်က KIA နဲ့ အရင်ဆုံး ချိတ်ဆက်ပြီး အခုလည်း KIO ပညာရေးဌာနနဲ့ ကြီးကြပ်နေတဲ့ ကျောင်းဖြစ်တယ်။ အဲ့တာကြောင့် ကျနော်တို့မှာလည်း ဒီဟာကျတော့ သူတို့အဖွဲ့က ခွင့်မပြုဘူးဆိုရင် ခင်ဗျားတို့ရဲ့ တောင်းဆိုချက်ကို ကျတော်တို့ မလုပ်ပေးနိုင်ဘူး၊ တကယ်လို့ ခွင့်ပြုရင်တော့ ကျနော်တို့ လုပ်ပေးနိုင်တယ် ဆိုပြီးမှ ပညာရေးပဲလုပ်တာ ဘာနိုင်ငံရေးမှလည်း လုပ်တာမဟုတ်ဘူး ကျောင်းက ဘယ်သူမဆို တက်လို့ရတယ်”ဟု ကာလိုင်ကျောင်းကော်မတီ တာဝန်ခံတစ်ဦးက သျှမ်းသံတော်ဆင့်ကို ပြောသည်။

ထို့အပြင် ဇွန်လ (၁၈) ရက်ကလည်း TNLA တပ်ဖွဲ့၏ ရဲတာဝန်ခံ ဆိုသူများကလည်း ကာလိုင် စာသင်ကျောင်းမှ ဆရာ/မများ၊ ကျောင်းတာဝန်ခံများ၏ အမည်၊ ဓာတ်ပုံ၊ နေရပ်လိပ်စာ အတိအကျနှင့် ကျောင်းသား/သူ စာရင်းများကို လာရောက်တောင်းဆိုခဲ့သော်လည်း လုံခြုံရေး စိုးရိမ်မှုကြောင့် ပေးအပ်ခဲ့ခြင်း မရှိကြောင်း သိရသည်။

ကာလိုင်ကျေးရွာရှိ အလယ်တန်းကျောင်းသို့ ကျေးရွာအတွင်းနှင့် ဇွပ်အောင် IDP စစ်ရှောင်စခန်းတို့မှ ကျောင်းသားကျောင်းသူ ဦးရေ ၂၀၀ ကျော် ပညာသင်ယူနေပြီး ကျေးရွာကျောင်းကော်မတီ၊ ပညာရေး ထောက်ပံ့ပေးသည့် အဖွဲ့အစည်းများနှင့် ကချင်လွတ်လပ်ရေးတပ် KIO မှ ထောက်ပံ့ပေးသည့် ဆရာ/မ (၁၄) ဦးက တာဝန်ယူ သင်ကြားပေးနေသည်။

ယနေ့ (ဇွန်လ ၂၄ ရက်) နံနက်ပိုင်းတွင် ကျောင်းသား/သူများမှာ ကျောင်းခန်းထဲသို့ မဝင်ရောက်နိုင်တော့ဘဲ ကျောင်းဝင်းအပြင်ဘက်ရှိ ဘောလုံးကွင်းတွင် စုစည်းခဲ့ရပြီး ကျောင်းသားမိဘများနှင့် ကျောင်းကော်မတီမှ ကျောင်းပြန်လည်ဖွင့်လှစ်ခွင့် ရရှိရေးနှင့် ပတ်သက်ပြီး ညှိနှိုင်းလုပ်ဆောင်နေကြောင်း သိရသည်။

“အခု အားလုံးကတော့ ကျောင်းသားမိဘနဲ့ ကျောင်းကော်မတီတွေ အကုန်လုံး ပြန်တွေ့ကြရမှာပေါ့။ တွေ့ကြပြီးမှ ဒါက ဘယ်လိုနည်းလမ်းနဲ့ လုပ်ကြမလဲဆိုတာ ရှာရမှာပဲ။ ကျောင်းသားက ၂၀၀ ကျော်ရှိတာ ဘယ်လိုလုပ်မလဲပေါ့။ သူတို့က အကြမ်းဖက်နေတဲ့ပုံစံ ဖြစ်နေတာ၊ ဒါကတော့ တမင်တကာ လုပ်နေတာ။ သူတို့ရဲ့ အုပ်ချုပ်ရေးအာဏာ ပါဝါပြတာပေါ့”ဟု ကာလိုင်ကျောင်းတာဝန်ခံက သျှမ်းသံတော်ဆင့်ကို ဆက်ပြောသည်။

ပြီးခဲ့သည့် ဇွန်လ ၃ ရက်ကလည်း ကာလိုင်စာသင်ကျောင်းဝန်းထဲ စခန်းချ နေထိုင်သည့် TNLA တပ်သားများမှ ကျောင်းတက်ရန် လာရောက်သည့် ကျောင်းသားနှင့် မိဘများကို ကျောင်းဝင်းအတွင်း ဝင်ခွင့်မပြုခဲ့ရာမှ ရုန်းရင်းဆန်ခတ် ဖြစ်ပွားခဲ့ပြီး ကျောင်းသူတစ်ဦး စိုးရိမ်ထိတ်လန့်၍ သတိလစ် မေ့မျောသွားခဲ့ရာ ဆေးရုံသို့ ပို့ဆောင်ခဲ့ရကြောင်း ဒေသခံများထံမှ သိရသည်။

အခြားတစ်ဘက်တွင် ကာလိုင်ကျေးရွာရှိ အလယ်တန်းကျောင်းအား ဖွင့်လှစ်နိုင်ရန် တအာင်းပြည်ပညာရေးကောင်စီ TLEC မှ ညှိနှိုင်းဆွေးနွေးဆဲဖြစ်ပြီး မလိုလားအပ်သည့် ရှုပ်ထွေးမှုတချို့ ဖြစ်ပွားနေဆဲဖြစ်ကြောင်၊ စာသင်ကျောင်းများ စောလျင်စွာ ဖွင့်လှစ်နိုင်ရေးအတွက် တိုင်းရင်းသားလက်နက်ကိုင် အဖွဲ့အစည်းများအနေဖြင့်လည်း TLEC နှင့်အတူ ဝိုင်းဝန်းဆောင်ရွက်ပေးရန် ယနေ့ (ဇွန်လ ၂၄ ရက်)တွင် ထုတ်ပြန်လာသည်။

လတ်တလောတွင် ရှုပ်ထွေးမှုရှိနေသည့် ကာလိုင်ရွာ အလယ်တန်းကျောင်းနှင့် လုံခြုံမှုအားမကောင်းသည့် စာသင်ကျောင်းများကို ဖွင့်လှစ်ပေးနိုင်မည် မဟုတ်သေးကြောင်း TLEC ထုတ်ပြန်ချက်တွင် ရေးသားထားသည်။