သျှမ်းပြည် မြောက်ပိုင်း ကွတ်ခိုင် – လားရှိုး ခရီးစဉ်ကို တောလမ်းမှ ကွေ့ပတ်၍ သွားလာနေရသည့်အတွက် အရေးပေါ်လူနာများနှင့် လူနာတင်ယာဉ် အခက်အခဲများစွာ ကြုံတွေ့နေရကြောင်း သတင်းရရှိသည်။

ကွတ်ခိုင်မြို့မှ လားရှိုးမြို့သို့ သွားလာသည့် လမ်းတလျှောက်တွင် တောလမ်းမှ ကွေ့ပတ်၍ သွားလာနေရပြီး ယခုကာလတွင် မိုးရွာသွန်းမှုကြောင့် လမ်းခရီးများ ကြမ်းတမ်းခက်ခဲနေပြီး အရေးပေါ်လူနာများနှင့် လူနာတင်ယာဉ်များ အခက်အခဲများ ကြုံတွေ့နေရကြောင်း ခရီးသည်ပို့ဆောင်ပေးနေသည့် ကားသမားများက ပြောသည်။

“လမ်းခရီးအခြေအနေက ရိုးရိုးလေးဆိုးတာ မဟုတ်ဘူး။ မိုးတွေရွာပြီးတော့ ရွှံ့တွေနဲ့ လမ်းတွေက ခက်တာပေါ့။ လမ်းက တောလမ်း ကားကြီးတွေ သွားလိုက်‌တော့ လမ်းတွေ ပိုဆိုးသွားတာပေါ့ မိုးရွာတော့။ ကွတ်ခိုင်-သိန္နီ-ရေပူ-မိုင်းလီဘက်ကိုသွား ပြီးရင် တန့်ယန်း မရောက်ခင် လားရှိုးဘက်ကို ပြန်‌မောင်းရတာ၊ အရေးပေါ်ကားတွေ သွားမယ်ဆိုရင် အခြေအနေ အရမ်း ဆိုးတယ်”ဟု အသက် ၄၀ ဝန်းကျင် ယာဉ်မောင်းအမျိုးသားတစ်ဦးက ပြောသည်။

လက်ရှိတွင် မူဆယ်-ကွတ်ခိုင်-လားရှိုး ခရီးစဉ်တလျှောက် တောလမ်းများကို အဓိကထား အသုံးပြုနေရပြီး မိုးရွာသွန်းမှု‌ကြောင့် ကားကြီး၊ ကားငယ် အပါအဝင် အရေးပေါ် လူနာတင်ယာဉ်များအတွက် အခက်အခဲများ ကြုံတွေ့နေရကြောင်း ခရီးသွား ယာဉ်မောင်းသမားများက ပြောသည်။

“တန့်ယန်းသွားတဲ့ဘက်ကနေ ဖြတ်တာလေ ကားရဲ့ အောက်ပိုင်းတွေ တော်တော်ထိတယ်။ တစ်ညလည်း အိပ်ရတယ်၊ လူနာကလည်း ပါသေးတယ်။ ကွတ်ခိုင်နဲ့တန့်ယန်းကြား ပြီးတော့ လားရှိုးနားပေါ့ အဲ့နားတွေက လမ်းအရမ်းဆိုးတယ်။ လူနာနဲ့ကျတော့ တောလမ်းတွေ သွားရတာ အဆင်မပြေဘူးလေ။ ကားကလည်း ကိုယ်ဟာကိုယ်ပဲ ပြန်ပြင်ရတာ၊ တစ်ခေါက်ပြင်ရင် ကျပ်သိန်း ၁၀ ထက် မနည်းကုန်တယ်”ဟု ၎င်းယာဉ်မောင်း အမျိုးသားက သျှမ်းသံတော်ဆင့်ကို ဆက်ပြောသည်။

အလားတူ နမ္မတူမြို့နယ် မိုင်းရင်ကျေးရွာနှင့် ကွတ်ခိုင်ကြားတွင်လည်း မိုးရွာသွန်းမှုကြောင့် လမ်းများပျက်စီးကာ ကားများ ပိတ်မိနေကြောင်း ကွတ်ခိုင်မြို့ဒေသခံများက ပြောသည်။

“အဲ့ဘက်လမ်းကလည်း တချို့က လမ်းမှာ ပိတ်မိနေတာရှိတယ်။ ကားမှောက်တာတွေ ရှိတယ်။ လမ်းကအရမ်းဆိုးတယ်။ ကားကြီးတွေနဲ့ပါ ဆွဲထုတ်ရတာ တောလမ်းတွေ တော်တော်များများ မှာတော့ ကားကြီးတွေ ပိတ်တယ်။ မနေ့က မိုးရွာတော့ ကားတွေပိတ်တယ်။ ဒီနေ့လည်း ထပ် ပိတ်နေနိုင်တယ်”ဟု ကွတ်ခိုင်မြို့ဒေသခံတစ်ဦးက သျှမ်းသံတော်ဆင့်ကို ပြောသည်။

“၁၀၂၇ စစ်ဆင်ရေး” နောက်ပိုင်းမှစ၍ လားရှိုး-မူဆယ် ပြည်ထောင်စုလမ်းမကြီးမှ လမ်းပိုင်းများကို ညီနောင်မဟာမိတ်များဘက်မှ ပိတ်ဆို့ထားပြီး လက်ရှိ အချိန်ထိ ဒေသခံများနှင့် ကားသမားများမှာ တောလမ်းကို အဓိက အသုံးပြုသွားလာနေရကြောင်း သိရသည်။

ပြီးခဲ့သည့် ဇွန်လ ၁၁ ရက်မှစပြီး စစ်ကောင်စီတပ်မှ လားရှိုး-မိုင်းယော်နှင့် နမ့်ဆန်၊ မန်တုံ၊ နမ္မတူ-သီပေါ လမ်းပိုင်းကို သွားလာ၍ မရအောင် လမ်းမကြီးပေါ် မြောင်းတူးဖျက်ဆီးခဲ့ခြင်းကြောင့် ကားသမားများအပြင် အရေးပေါ်လူနာတင်ယာဉ်များလည်း တောလမ်းကို အဓိကထား အသုံးပြုနေကြရသည်။