စစ်ကောင်စီ၏ ရမ်းကားဖမ်းဆီး ငွေညှစ်မှုများကြောင့် ရန်ကုန် လက်ကား ဆန်ဈေကွက် ပျက်နေပြီး အရောင်းအဝယ် ရပ်တန့်နေသည်ဟု ဆန်ဈေးကွက်နှင့် နီးစပ်သူများက ယနေ့ (ဇွန်လ ၂၄ ရက်) တွင် ပြောသည်။

ပြီးခဲ့သည့် ဇွန်လ ၂၁ ရက်နေ့က စပြီး မြန်မာနိုင်ငံ ဆန်စပါး အသင်းချုပ် ဥက္ကဌနှင့် ဘုရင့်နောင် ဆန်ကုန်စည်ဒိုင် ဥက္ကဋ္ဌ အပါအဝင် နိုင်ငံတဝှမ်း ဆန်ကုန်သည်၊ ဆန်စက်၊ ဆန်ပွဲရုံ ပိုင်ရှင်အများစုကို စစ်ကောင်စီက ဖမ်းဆီး စစ်ဆေးနေခြင်း ဖြစ်သည်။

ယင်းနောက် ဆန်စက်၊ ပွဲရုံနှင့် နေအိမ် ချပ်ပိတ်မှုများ ဆက်တိုက် ပြုလုပ်နေသည့် အပြင် ငွေညှစ်မှုများလည်း ပြုလုပ်နေသည့် အတွက် ကုန်သည် အများစု တိမ်းရှောင်နေရပြီး ယနေ့ ဆန်လက်ကား ဈေးကွက် ပျက်ကာ အရောင်းအဝယ် ရပ်တန့်နေသည်ဟု ဆန်ကုန်သည်များနှင့် နီးစပ်သည့် သတင်းရင်းမြစ်က ဆိုသည်။

လက်ရှိ စစ်ကောင်စီ လက်အောက်ခံ ဆန်စပါးအသင်းချုပ်က ရွှေဘိုပေါ်ဆန်း တအိတ်လျှင် ၁၃၅,၀၀၀ မှ ၁၄၅,၀၀၀ ကျပ်၊ ဧရာဝတီ ပေါ်ဆန်း တအိတ်လျှင် ၁၁၀,၀၀၀ မှ ၁၂၀,၀၀၀ ကျပ် ၊ ဧည့်မထ တအိတ်လျှင် ၇၂,၀၀၀ မှ ၇၅,၀၀၀ ကျပ် ဈေးဖြင့် ရောင်းချရန် သတ်မှတ်ထားသော်လည်း ပြင်ပဈေးနှုန်းနှင့် များစွာ ကွာဟနေသည်ဟု ၎င်းကဆိုသည်။

“သူတို့ သတ်မှတ်တဲ့ဈေနဲ့ ဒိုင်တွေမှာလည်း ဝယ်လို့မရဘူး။ အဲဈေးတွေနဲ့က အရောတွေပဲ ရမှာပေါ့။ ရေရှည်မှာ မှောင်ခိုဈေးကွက် ပေါ်လာမလားပဲ။ ပြည်မကဆန်ကို အားထားနေရတဲ့ တောင်ပေါ်ဒေသတွေကို ဆန်တင်ရင်လည်း ပိုကျပ်လာနိုင်တယ်” ဟု ၎င်းကရှင်းပြသည်။

နွေစပါး ပေါ်ပြီးနောက် ယခုကဲ့သို့ ဆန်ဈေးနှုန်း တက်လာရခြင်းမှာ ငွေကြေးဖောင်းပွမှုကြောင့် သယ်ယူပို့ဆောင်ရေးနှင့် ကြိတ်ခွဲမှု၊ လုပ်သားခ စသည်ဖြင့် အထွေထွေ ကုန်ကျစရိတ် မြင့်တက်လာမှုကြောင့် ဖြစ်ကြောင်း ဧရာဝတီတိုင်းရှိ ဆန်စက်လုပ်ငန်းရှင် တစ်ဦးက ဆိုသည်။

“အကုန်ဈေးတက်တော့ ဆန်လည်း လိုက်တက်တာ မဆန်းဘူးလေ။ ဒါပေမယ့် ပြည်တွင်း ဆန်ဈေးတက်တော့ အိပ်စပို့သမားက မကိုက်တော့ မပို့ဘူး။ မပို့တော့ ဒေါ်လာမရဘူး။ ဆန်ပါမစ်တွေက ဖောင်းပွနေတာ။ ဒေါ်လာဈေး ထပ်တက်ရင်တော့ အိပ်စပို့က ပြန်သွားမှာပဲ။ အဲအချိန်မှ အဖမ်းအဆီးရပ်မယ်။ ပြည်သူတွေ အတွက် ဆန်ဈေး သတ်မှတ်ပေးတာ မဟုတ်ဘူး။ အိပ်စပို့ အတွက်” ဟု ၄င်းက သုံးသပ်သည်။

ယနေ့ ဇွန်လ ၂၄ ရက်နေ့တွင် မြန်မာနိုင်ငံဆန်စပါးအသင်းချုပ်က ရန်ကုန်မြို့ရှိ ဝါးတန်း ဆန်စပါးကုန်စည်ဒိုင်၊ ဘုရင့်နောင် ဆန်စပါးကုန်စည်ဒိုင်တို့တွင် အိမ်ထောင်စုစာရင်းနှင့် မှတ်ပုံတင် ပြသနိုင်သူများအား မိသားစု တစု တလစာ ပေါ်ဆန်းတအိတ်နှင့် ဧည့်မထဆန်တအိတ် ရောင်းချပေးနေကြောင်း သိရသည်။

ယင်းသို့ ရောင်းချပေးရာတွင် ရွှေဘိုပေါ်ဆန်း တအိတ်လျှင် ၁၃၅,၀၀၀ မှ ၁၄၅,၀၀၀ ကျပ်ကြား၊ ဧရာဝတီ ပေါ်ဆန်း တအိတ်လျှင် ၁၁၀,၀၀၀ မှ ၁၂၀,၀၀၀ ကျပ်ကြား ၊ ဧည့်မထတအိတ်လျှင် ၇၂,၀၀၀ မှ ၇၅,၀၀၀ ကျပ်ကြား ဈေးနှုန်း သတ်မှတ်ထားကြောင်း ဆန်စပါးအသင်းချုပ်က ထုတ်ပြန်ထားသည်။

ထို့အပြင် ပေါ်ဆန်း တပြည် ၅,၀၀၀ ကျပ်၊ ဧည့်မထ တပြည် ၃,၀၀၀ ကျပ်နှင့် ပေါ်ဆန်း ၅ ပြည် တအိတ်လျှင် ၂၅,၀၀၀ ကျပ် သတ်မှတ် ရောင်းချပေးမည်ဟု ထုတ်ပြန်ချက်က ဆိုသည်။

လက်ရှိ ဈေးကွက်အတွင်း ရွှေဘိုပေါ်ဆန်းတအိတ် ၁၈၀,၀၀၀ မှ ၂၀၀,၀၀၀ ကျပ် ကျော်ရှိပြီး ဧည့်မထဆန် တအိတ် ၉၀,၀၀၀ ကျပ်မှ ၁၀၀,၀၀၀ ကျော်အထိ ဖြစ်နေရာ သတ်မှတ်ဈေးနှင့် များစွာ ကွာဟနေသည်။

ယခုကဲ့သို့ ဖမ်းဆီးမှုများသည် ဆန်ပြည်ပတင်ပို့မှုနှင့် ဆက်စပ်နေသဖြင့် ဒေါ်လာဈေး ထပ်မံ မြင့်တက်လာမှသာ ဈေးကွက် ပုံမှန်ပြန်ဖြစ်မည်ဟု သုံးသပ်မှုများ ရှိနေသကဲ့သို့ ဆန်ချော မှောင်ခိုဈေးကွက် ပေါ်ပေါက်လာမည်ဟုလည်း ဆန်ကုန်သည် အသိုင်းအဝိုင်းက သုံးသပ်မှုများ ရှိနေသည်။