စစ်ကောင်စီ အခြေစိုက်သည့် နေပြည်တော်နှင့် မိုင် ၅၀ ကျော်သာကွာဝေးသည့် သျှမ်းပြည် ပင်လောင်းမြို့နယ်တွင် ရက်တစ်ပတ် ကြာ တိုက်ပွဲပြင်းထန်နေလျက်ရှိကြောင်း စုံစမ်းသိရသည်။

ပြီးခဲ့သည့် ဇွန်လ ၁၇ ရက်မှစ၍ စစ်ကောင်စီတပ်သည် ပင်လောင်းမြို့နယ်အတွင်းသို့ အင်အားအများအပြားဖြည့် စစ်ကြောင်းထိုးလာခဲ့ရာ ကရင်နီတော်လှန်ရေးအင်းအားစုတပ်ဖွဲများနှင့် ထိတွေ့ပြီး ဇွန်လ ၁၈ ရက်က တိုက်ပွဲပြန်လည် ဖြစ်ပွားခဲ့ကြောင်း သိရသည်။

စစ်ကောင်စီတပ်သည် ဖယ်ခုံမြို့အတွင်းသို့ ဝင်ရောက်နိုင်ရန်အတွက် စစ်ကြောင်းထိုးလာခြင်းဖြစ်သည်ဟု ပျားစစ်ကြောင်း Bees Coiumn က သျှမ်းသံတော်ဆင့်ကို ပြောသည်။

တိုက်ပွဲအတွင်း စစ်ကောင်စီက လက်နက်ကြီးအပြင် ဒရုန်းပါအသုံးပြု တိုက်ခိုက်လာသည့်အတွက် ယခင်က စစ်ဘေးမရှောင်ရသော ကျေးရွားများလည်း ယခုတစ်ခါတွင် ရွာလုံးကျွတ်ထွက်ပြေးနေရသည်ဟု ပင်လောင်းမြို့ စစ်ဘေးရှောင်တစ်ဦးက ပြောသည်။

“တိုက်ပွဲကတော့ ဒီနေ့အထိဆက်ဖြစ်နေတုန်းပဲ။ အခုတိုက်ပွဲကတော့ အရင်ကထက်ပိုပြီး ကြမ်းတယ်လို့ပြောရမယ်။ အရင်နောင်ဝိုးမှာဖြစ်တုန်းက ကျောင်းဒကာတွေလောက်ပဲ ပြေးကြတာလေ။ အခုတစ်ခေါက်ကတော့ အဲ့နားဝန်းကျင်ကလူတွေအကုန်းလုံး ရှောင်ရတယ်။ အခါတိုင်းထက် တိုက်ပွဲက ပိုပြင်းလာတာပေါ့။ ဒရုန်းတွေနဲ့ကော ပါတယ်” ဟု ၎င်းကပြောသည်။

တိုက်ပွဲများကြောင့် ပင်လောင်းမြို့နယ် နမ်းဖာမှု၊ ဗန်းမောက်၊ ကုန်းပေါ၊ ဆောင်လှန်၊ မိုးဦး၊ လင်ခံနှင့် လွိုင်ကျိုင်းကျေးရွာမှ ဒေသခံဦးရေ ၁ ထောင်ကျော် ရွာလုံးကျွတ်ထွက်ပြေးတိမ်းရှောင်နေရကြောင်း သိရသည်။

ထွက်ပြေးတိမ်းရှောင်သူများအနက် အသက် ၃၉ နှစ်အရွယ် ဦးဇင်းအရှင်နေမိန္တ၊ အသက် ၃၀ ကျော် ဦးခေါင်နှင့် အသက် ၁ နှစ်ကျော် ကလေး ၁ ဦးတို့သည် စစ်ကောင်စီ၏ လက်နက်ကြီး၊ ဒရုန်းဗုံးမှုကြောင့် သေဆုံးခဲ့ရသည်။

အလားတူ စစ်ကောင်စီ၏ လက်နက်ကြီး၊ ဒရုန်းဗုံးကြဲမှုကြောင့် ထိခိုက်ဒဏ်ရာရသူ ၁၀ ဦးခန့်ရှိကြောင်း ဒေသခံများ၏ ပြောပြချက်အရ သိရသည်။

လက်ရှိထွက်ပြေးတိမ်းရှောင်နေရသည့် စစ်ဘေးရှောင်အများစုသည် ပင်လောင်းမြို့ပေါ်ရှိ စစ်ဘေးရှောင်စခန်းနှင့် ဆွေမျိုးအိမ်သို့ တိမ်းရှောင်လာကြသော်လည်း စားဝတ်နေရေးနှင့် နေရာထိုင်ခင်းကြောင့် အခက်အခဲရှိနေကြောင်း ပင်လောင်းမြို့စစ်ဘေးရှောင်ကူညီသူ အသက် ၃၀ ကျော်အမျိုးသားတစ်ဦးက ပြောသည်။

“အရင်တစ်ခေါက်ကရှောင်နေရတဲ့သူတွေလည်း အခုတစ်ခါထပ်ရှောင်နေရတဲ့သူတွေရှိတယ်။ အကြိမ်ကြိမ် ရှောင်နေရတော့ အခက်ခဲတွေအများကြီးရှိတာပေါ့ဗျာ။ တချို့တဲတွေက သူတို့(စစ်ရှောင်) ပြန်သွားရင် ဖျက်ပြီးပြန်သွားလိုက်တယ်။ အခုတစ်ခါ ပြန်လာနေတော့ ပြန်ဆောက်ရတယ်။ ဆိုတော့ တည်ဆောက်ဖို့လည်း အလှူရှင်ကမရှိဘူး။ အစားအသောက်ဆိုလည်း အခုသယ်လာနိုင်သလောက်သယ်လာကြတယ်။ ရေရှည်အတွက် ကတော့ဘယ်လိုမှ မဖြစ်နိုင်ဘူး” ဟု အသက် ၃၀ ကျော်အမျိုးသားတစ်ဦးကပြောသည်။

ထို့အပြင် ဆီဆိုင်မြို့နယ် သဘက်ကျေးရွာအုပ် နောင်စကာကျေးရွာအနီးတွင်လည်း စစ်ကောင်စီလက်အောက်ခံ ပြည်သူ့စစ် PNO က အင်အား ၃၀၀ ခန့်ဖြင့် စစ်ကြောင်းထိုးလာသဖြင့် ဇွန်လ ၂၁ ရက်စ၍ တိုက်ပွဲဖြစ်ပွားခဲ့ကြောင်း ပအိုဝ်းအမျိုးသားလွတ်မြောက်ရေးတပ်မတော် PNLA က ထုတ်ပြန်ထားသည်။