သျှမ်းပြည်နယ်တောင်ပိုင်း ပင်လောင်းမြို့နယ်၊လင်းခေး(လင်ခံ)ရွာတွင် လက်နက်ကြီး လူနေအိမ်ပေါ် ကျရောက်ခြင်းကြောင့် နေအိမ်ထဲရှိ မိသားစုလေးဦးထိမှန်ပြီး ပြင်းထန်စွာဒဏ်ရာရရှိခဲ့ကြောင်း သိရသည်။
ပင်လောင်းမြို့နယ် လင်းခေး( လင်ခံ)ကျေးရွာတွင် ယမန်နေ့ (ဇွန်လ၂၀)ရက် ည လူအိပ်နေချိန်၌ စစ်ကောင်စီဘက်မှ ပစ်ခတ်လိုက်သည့် လက်နက်ကြီးကြောင့် မိသားစုဝင် (၄)ဦးထိခိုက်ဒဏ်ရာရရှိခဲ့ကြောင်း လင်းခေး (လင်ခံ)ကျေးရွာမှ ဒေသခံ အမျိုးသားတစ်ဦးက သျှမ်းသံတော်ဆင့်ကိုပြောသည်။
ထိုဒဏ်ရာရရှိသောသူများသည် ဦးစိုင်းလောင်း ၊ဒေါ် ဉမ္မာသိန်းနှင့် ကလေးများဖြစ်ကြသော နန်းမွေခမ်း၊မလပြည့်ဝန်းတို့ ဖြစ်ကြကြောင်းသိရသည်။
“လူအိပ်နေချိန်လေ ရွာထဲကိုလည်းပစ်လာတယ်။အဲဒါအိမ်ပေါ်တည့်တည့်ကျတာ။သူတို့မိသားစု လေးယောက်စလုံးထိတာ။ခုတော့ နီးစပ်ရာ ဆေးရုံမှာ ဆေးကုသနေတယ်။”ဟု လင်းခေး (လင်ခံ)ကျေးရွာမှ အမျိုးသားတစ်ဦးက သျှမ်းသံတော်ဆင့်ကိုပြောသည်။
စစ်ကောင်စီလက်နက်ကြီးကျရောက်ပြီးနောက် ရွာသူရွာသားများလည်း ညတွင်းချင်း တောထဲ တောင်ထဲ ထွက်ပြေးတိမ်းရှောင်ခဲ့ရကြောင်းသိရသည်။
“ညဖက်လည်းဖြစ် တောထဲလည်းထွက်ပြေးတော့ မီးမထွန်းရဲဘူး။ဒီတိုင်းရမ်းသမ်းသွားရတာ။မိုးလည်း နည်းနည်းကျတော့ ဂူထဲ သစ်ပင်ကြီးကြီးအောက်တွေမှာ သွားခိုရတာ။တစ်ညလုံးအိပ်လို့တောင်မပျော်ဘူး”ဟု လင်ခံရွာခံတစ်ဦးက ဆက်မံပြောသည်။
ယခုတွင် ဖုန်းလိုင်း၊အင်တာနက်လိုင်းလည်း ရံဖန်ရံခါသာရရှိပြီး အရေးပေါ်အတွက် တစ်ဦးနှင့်တစ်ဦး အဆက်သွယ်ရရှိရန်လည်းများစွာအခက်ခဲရှိကြောင်းသိရသည်။
ထို့အပြင် ဇွန်လ၁၉ရက် တစ်ရက်တည်းမှာပြင် စစ်ကောင်စီလက်နက်ကြီးဖြင့် တိုက်ခိုက်မှုကြောင့် လွယ်ကျိုင်းရွာ သံဃာတစ်ဦး ပွဲချင်းပျံလွန်တော်မူပြီး ၊ မိုးဦးရွာကလေးငယ်နှစ်ဦးလည်း ဒဏ်ရာရရှိသေးကြောင်းသိရသည်။
Leave a Comments