သျှမ်းပြည်နယ်တောင်ပိုင်း၊ပင်လောင်းမြို့နယ်တောင်ဖက်တွင် တိုက်ပွဲပြင်းထန်နေပြီး စစ်ကောင်စီ လက်နက်ကြီး ကျရောက်ပေါက်ကွဲမှုကြောင့် အရပ်သား ၅ဦး ထိခိုက်ဒဏ်ရာရရှိခဲ့ကြောင်း စုံစမ်းသိရသည်။
ယမန်နေ့ ဇွန် ၁၉ရက်တွင် ပင်လောင်းမြို့နယ် အတွင်း တိုက်ပွဲပြင်ထန်ပြီး ဒေသခံ တစ်ဦးနှင့် ကလေး နှစ်ဦးထိမှန်ခဲ့သည်။
ထို့ပြင် ဇွန် ၁၇ ရက်တွင်လည်း စစ်ကောင်စီဘက်မှ ပစ်လိုက်သည့် လက်နက်ကြီးကြောင့် စစ်ဘေးရှောင် နှစ်ဦး ထိမှန်ခဲ့ကြောင်း မြေပြင် ထိခိုက်မှုကို သိသည့် ပင်လောင်း ဒေသခံ အမျိုးသမီးတစ်ဦးက သျှမ်းသံတော်ဆင့်ကိုပြောသည်။
“မနေ့ ထိတဲ့ ကလေးနှစ်ဦးရော ရွာသားရော သုံးဦးက ဒဏ်ရာပြင်းထန်တယ်။ စိုးရိမ်ရတဲ့အနေးအထားရှိတယ်။ ကျမတို့ မျက်စိရှေ့မှာပဲ ဖြစ်တာ၊ ကျမတို့လည်း ကူညီမို့ဆို လက်နက်ကြီး ဆက်တိုက်ကျနေတော့ ထွက်ပြေးရတယ်။” ဟု ဗန်းမောက်ရွာခံ အမျိုးသမီးတစ်ဦးက ဆိုသည်။
လက်နက်ကြီး ပစ်ခတ်မှုကြောင့် ဒဏ်ရာရရှိသော ရွာသားသည် စံကားဆေးရုံတွင် ဆေးကုသရပြီး ဒဏ်ရာရရှိသော စစ်ရှောင်များသည် လွယ်ပေါဆေးရုံတွင် ဆေးကုသနေရကြောင်း သိရသည်။
ပြီးခဲ့သည့် ဇွန် ၁၇ရက်မှစပြီး စစ်ကောင်စီ တပ်ဖွဲ့ နှင့် ကရင်နီတော်လှန်ရေး အင်အားစုအဖွဲ့တို့သည် ပင်လောင်မြို့နယ် ဗန်းမောက်ကျေးရွာ၊နမ်းဖာမူကျေးရွာတို့တွင် တိုက်ပွဲ ပြင်းထန်စွာဖြစ်ပွားခဲ့ခြင်းဖြစ်ပြီး တိုက်ပွဲအတွင်းလည်း ယနေ့ထိ ပိတ်မိနေသည့် ဒေသခံ ၊အရပ်သားများစွာရှိသေးကြောင်း သိရသည်။
ယခုတွင် စစ်ကောင်စီ ၊ ၎င်းလက်အောက်ခံ ပအိုဝ်းပြည်သူ့စစ် PNO နှင့် ကရင်နီတော်လှန်ရေး တပ်ဖွဲ့တို့သည် ယနေ့အချိန်ထိ အပြိုင်အဆိုင် စစ်အင်အား ဖြည့်တင်းနေကြပြီး၊ တိုက်ပွဲ ပိုမို ပြင်းထန်လာနိုင်ကြောင်း မြေပြင် ဒေသခံများက ပြောသည်။
Leave a Comments