သျှမ်းပြည် မူဆယ်မြို့နယ်တွင် စစ်ကောင်စီမှ မူးယစ်ဆေးသုံးစွဲသူများကို ဖမ်းဆီးပြီး ပြန်လွှတ်ပေးနေသဖြင့် ဒေသခံများ စိုးရိမ်ထိတ်လန့်မှုဖြစ်နေကြောင်း သတင်းရရှိသည်။
ယမန်နေ့ (ဇွန်လ ၁၇ ရက်)တွင် မူဆယ်မြို့နယ် စစ်ကောင်စီတပ်နှင့် လက်အောက်ခံ ပြည်သူ့စစ်တပ်သားများသည် မူဆယ်မြို့ရှိ သင်္ချိုင်း၊ မန်းဝိန်း၊ ဝိန်းနန်း၊ စွမ်စော် စသည့် နေရာများတွင် မူးယစ်ဆေးသုံးစွဲသူများကို ဖမ်းဆီးပြီး သဲတင်ကား နှစ်စီးဖြင့် တင်ဆောင်ကာ နမ့်ခမ်း – မူဆယ် ပြည်ထောင်စုလမ်းမကြီးပေါ်သို့ ပြန်လွှတ်ပေးခဲ့ကြောင်း မူဆယ်မြို့ ဒေသခံများက ပြောသည်။
“သူတို့က ရပ်ကွက်ထဲ ဖမ်းထားတဲ့လူတွေကို လမ်းပေါ်တွေမှာ လွှတ်ပေးထားတာ။ ကားနှစ်စီးနဲ့တင်လာပြီး ချသွားတာ။ တစ်နေရာထဲ မချဘူး တစ်နေရာ နည်းနည်းချတာ။ ကျနော်တို့ ဒေသခံတွေအတွက်က အခက်အခဲဖြစ်တာပေါ့။ သူတို့ လယ်ကွင်းထဲမှာ အိပ်တာတွေလည်းရှိတယ်။ သူတို့က ဘာလို့ အဲ့လိုလုပ်ဖမ်းပြီး ပြန်လာလွှတ်လည်းကို မသိတာ”ဟု မူဆယ်ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
စစ်ကောင်စီမှ လွှတ်ပေးသော လူများသည် နယ်ဝေးမှ မူဆယ်မြို့သို့ အလုပ်လာလုပ်သူများဖြစ်ပြီး၊ မူးယစ်ဆေးသုံးစွဲသူများ ဖြစ်သည့်အတွက် ပြည်သူများ လုံခြုံရေးအတွက် စိုးရိမ်နေရကြောင်း မူဆယ်မြို့ ဒေသခံ အမျိုးသားတစ်ဦးက ဆက်ပြောသည်။
“သူတို့က နမ့်ခမ်းသွားတဲ့ လမ်းဖက်ကို သွားချပေးတာ။ ဘယ်သူမှတော့ အဲ့လိုလူတွေကို ကိုယ့်ရွာထဲမဝင်စေချင်ဘူးလေ မောင်းထုတ်ရတာပေါ့။ ခုက ဘယ်သူကိုမှလည်း အားကိုးလို့မှမရတာ၊ ကိုယ်တိုင်သတိထား နေရတာပေါ့။ ဘယ်အဖွဲ့အစည်းမှ ပြန်လာဖမ်းပေးတာမရှိဘူး”ဟု မူဆယ်မြို့မှ ၎င်းဒေသခံ အမျိုးသားက သျှမ်းသံတော်ဆင့်ကို ဆက်ပြောသည်။
ထိုသို့ စစ်ကောင်စီမှ မူးယစ်ဆေးဝါး သုံးစွဲသူများ၊ သူခိုးဓားပြများ ပြန်လွှတ်ပေးသည့်အပေါ် မည်သည့် လက်နက်ကိုင်အဖွဲ့မှ လိုက်လံဖမ်းဆီးပေးခြင်း မရှိကြောင်း မူဆယ်ဒေသခံများက ပြောသည်။
မူဆယ်မြို့သည် မြန်မာ – တရုတ် နယ်စပ်ကုန်သွယ်ရေးမြို့ ဖြစ်သည့်အပြင် လက်နက်ကိုင် အဖွဲ့အစည်းများနှင့် တရားမဝင် လုပ်ငန်းများ စုံလင်ပေါများသည့် ဒေသဖြစ်ပြီး၊ သေနတ်ပစ်ခတ်မှု၊ ဓားပြတိုက်မှုနှင့် ပြန်ပေးဆွဲမှုများလည်း မကြာခဏ ဖြစ်ပွားလေ့ရှိသည်။
လက်ရှိတွင် မူဆယ်မြို့နယ်အတွင်း သွားလာလှုပ်ရှားနေသည့် စစ်ကောင်စီလက်အောက်ခံ ပြည်သူ့စစ်အဖွဲ့များမှာ ကောင်းခါး၊ မြို့မ၊ ပန်းဆေး၊ လုံထန်၊ ပိန်းဆာ၊ မန်ဂျယ်၊ စိန်ကျော့၊ မန်ပြိန်း၊ ရှောက်ဟော်၊ တာမိုးညဲ၊ မုံးပေါ် စသည်ဖြင့် ၁၅ ဖွဲ့ထက်မနည်း ရှိနေသ
