သျှမ်းပြည်နယ်တောင်ပိုင်း ဆီဆိုင်မြို့ပေါ်တွင် တိုက်ပွဲများကြောင့်မီးလောင်ပျက်စီးခဲ့ရသည့်နေအိမ်များအတွက် ထောက်ပံ့ကြေးကို စစ်ကောင်စီ ဘက်တော်သားများနှင့် နီးစပ်သူများသာ ရရှိကြောင်း မြို့ခံတစ်ဦးက ယနေ့ (ဇွန် ၁၈)ရက်တွင် ပြောသည်။

စစ်ကောင်စီဘက်တော်သားများဖြစ်ကြသည့် စစ်ကောင်စီအသိုင်းအဝိုင်း နှင့် ပအိုဝ်းပြည်သူ့စစ် (PNO)တပ်ဖွဲ့တို့ နှင့် နီးစပ်သူများသာ ရရှိကြသည်။

ထိုမီးလောင်းသွားသည့် နေအိမ်များသည် ပြီးခဲ့သည့် ဇန်နဝါရီ ၂၁ ရက် နံနက်ပိုင်းတွင် ဟိုပုံးမြို့နယ် မဲနယ်တောင်ဒေသ၌ စစ်ကောင်စီနှင့် ၎င်း၏လက်အောက်ခံ ပအိုဝ်းပြည်သူ့စစ် (PNO ) နှင့် ပအိုဝ်းအမျိုးသားလွတ်မြောက်ရေးအဖွဲ့ချုပ် PNLO/PNLAတို့တိုက်ပွဲဖြစ်ပွားခဲ့ပြီး နေအိမ် ၁၅၀ လုံး မီးလောင်ပျက်စီးခဲ့သည်။

လက်ရှိမှာ စစ်ကောင်စီနှင့် PNO တပ်ဖွဲ့က မီးလောင်သွားပြီး နေအိမ်တစ်ခုလုံး ပျက်စီးသွားလျှင် ကျပ်ငွေ ဆယ်သိန်း (၁၀ သိန်း) ၊ မီးလောင်းပြီး နေအိမ်တစ်ဝက်သာ ပျက်စီးပါက ကျပ်ငွေ ခုနစ်သိန်း (၇သိန်း) ၊ကျည်စ ထိမှန်သည့် နေအိမ်များကို ကျပ်ငွေ နှစ်သိန်း (၂သိန်း) စသည့် စျေးနှုန်းများ သတ်မှတ်ခဲ့ကြောင်း ဇွန် ပထမပတ်တွင် စတင်ပေးအပ်ခဲ့သည် ဟု စစ်ကောင်စီဘက်မှ ထုတ်ပြန်ခဲ့သည်။

သို့သော် မြေပြင်ရှိ သာမာန်အရပ်သာပြည်သူပြည်သားများကမရရှိကြပေ၊ နီးစပ်သည့် သူများသာ ရရှိကြောင်း ဒေသခံများ၏ ပြောပြချက်အရသိရသည်။

“ကျမတို့က နေအိမ်လုံးလုံး ပျက်စီးသွားတယ်။ထောက်ပံ့ကြေးမရဘူး။ ရေခွက်တစ်ခွက်၊ဗုံးတစ်လုံး၊ပန်ကန်တစ်ချပ် ၊မိုးကာသေးသေးလေးတစ်ထည် ၊ခေါက်ဆွဲ ၃ထုတ်၊ငါးသေတ္တာနှစ်ဗူး အဲဒါပဲရတယ်။ ကျန်တာမရဘူး။ကျမတို့ အိမ်နီးနားကလူတွေလည်းမရဘူး။ပိုက်ဆံရတယ်ပြောကြလို့ လိုက်မေးနေတာ စစ်ကောင်စီ၊PNOတွေနဲ့ ပက်သက်တဲ့လူတွေဘဲ ရတာ”ဟု ဆီဆိုင်မြို့ခံအမျိုးသမီးတစ်ဦးက သျှမ်းသံတော်ဆင့်ကိုပြောသည်။

လူမှုဝန်ထမ်းကယ်ဆယ်ရေးနှင့် ပြန်လည်နေရာချထားရေးဝန်ကြီးဌာန အထွေထွေအုပ်ချုပ်ရေးဦးစီးဌာန၊ သက်ဆိုင်ရာ ရပ်ကွက်အုပ်ချုပ်ရေးမှူးအဖွဲ့ဝင်များမှ ပြည်သူများတင်ပြလာသည့် နေအိမ်ပျက်စီးဆုံးရှုံးမှု အခြေအနေများကို စစ်ဆေးပြီး ထောက်ပံ့ကြေးပေးအပ်သည်ကို ပထတစ်ကြိမ်သိန်း၄၆၀၊ဒုတိယတစ်ကြိမ်၃၉၆၁သိန်း စုစုပေါင်းသိန်း၄၅၀၀နီးပါး ထောက်ပံ့ခဲ့ကြောင်း ထုတ်ပြန်ထားပါသည်။

စစ်ကောင်စီမှပေးအပ်သည့်ထောက်ပံ့ငွေကြေးများမှာ သာမာန်ပြည်သူများ မရရှိသည့်အပြင် ဆီဆိုင်မြို့ထဲ ပြန်လာနေသော ပြည်သူအများစုသည် နေအိမ်ပျက်စီးကြသဖြင့် နေထိုင်ရေးအခက်အခဲရှိနေကြပြီး စီးပွားရေးလုပ်ငန်းများလည်း ပြန်လည်စတင်ရန်လည်း အခက်အခဲများစွာရှိနေကြောင်းသိရသည်။