သျှမ်းပြည် ညောင်ရွှေမြို့နယ် တိုက်ပွဲအတွင်း သေဆုံးသွားသည့် စစ်ကောင်စီတပ်သား ၄၀ ကျော်ကို စစ်ကောင်စီက ၂ လကျော်ကြာသည်အထိ လာရောက်ကောက်ယူခြင်းမရှိသည့်အတွက် PDF ဘက်မှ အလောင်းများအား သင်္ဂြိုဟ်ပေးခဲ့ရကြောင်း သတင်းရရှိသည်။
ပြီးခဲ့သည့် ဧပြီ ၁၃ ရက် ညောင်ရွှေမြို့ ညောင်လေးနှင့် ရေပူရွာအကြား ဖြစ်ပွားခဲ့သော ပြည်သူ့ကာကွယ်ရေးတပ် PDF တပ်ဖွဲ့များနှင့် စစ်ကောင်စီတပ်တို့ တိုက်ပွဲအတွင်း စစ်ကောင်စီဘက်က စစ်ကြောင်းလိုက်သေဆုံးခဲ့သည်ဟု ပျားစစ်ကြောင်း (Bees Column) က တာဝန်ခံတစ်ဦးက သျှမ်းသံတော်ဆင့်ကို ပြောသည်။
“အဲ့နေ့တစ်ရက်တည်းပဲ စစ်ကောင်စီဘက်က စစ်ကြောင်းလိုက်ပြုတ်သွားတာ။ မနေ့ကတော့ အဲ့အလောင်းတွေ ကို မြေမြုပ်ပေးလိုက်တယ်” ဟု ၎င်းကပြောသည်။
အဆိုပါ တိုက်ပွဲအတွင်း စစ်ကောင်စီဘက်မှ ၄၀ ကျော်သေဆုံးခဲ့ပြီး၊ သေဆုံးသွားသော စစ်သားအလောင်း များအား စစ်ကောင်စီက ၂ လကျော်ကြာသည်အထိ လာရောက်ကောက်ယူခြင်းမရှိသည့်အတွက် ပျားစစ်ကြောင်းနှင့် အလယ်ပိုင်းအထူး စစ်ဆင်ရေးအဖွဲ့တို့မှ ပူးပေါင်းရှင်းလင်း သင်္ဂြိုဟ်ပေးခဲ့ရကြောင်း သိရသည်။
လက်ရှိတွင် စစ်ကောင်စီတပ်ဖွဲ့သည် သျှမ်း-ကရင်နီ (ကယား) ပြည်နယ်စပ်ဒေသရှိ ဖယ်ခုံမြို့ကို တန်ပြန်စစ်ကြောင်းထိုးနိုင်ရန်အတွက် ကြိုးပမ်းနေသကဲ့သို့ အင်းလေးအနောက်ခြမ်းတွင်လည်း စစ်ကောင်စီဘက်က လှုပ်ရှားမှုရှိနေကြောင်း ပျားစစ်ကြောင်း Bees Column က တာဝန်ခံတစ်ဦးက ဆက်ပြောသည်။
“အခုလောလောဆယ် အင်းအနောက်ခြမ်းမှာတော့ လှုပ်ရှားမှုတွေ ရှိပါတယ်။ ဖယ်ခုံဝင်ဖို့ ကြိုးစားနေတယ်ထင်တယ်။ စစ်ကောင်စီက သင်တန်းမဆင်းလည်း သူတို့လုပ်စရာရှိ သူတို့လုပ်နေတာပါပဲ။ သင်တန်းဆင်းများလာလို့ တန်ပြန်ထိုးစစ်လုပ်လာရင်လည်း သိပ်တော့အများကြီး မစိုးရိမ်ပါဘူး။ လက်နက်မရှိတုန်းက သူတို့အင်အားကောင်းဆဲကာလမှာတောင် အကောင်ဆုံး ရင်ဆိုင်ကျော်ဖြတ်ခဲ့တာ ပိုစည်းလုံး၊ ပိုဂရုစိုက်ရင် ရပါပြီ” ဟု ၎င်းကထပ်လောင်းပြောသည်။
ညောင်ရွှေမြို့နယ်အတွင်း တိုက်ပွဲများကြောင့် လက်ရှိစစ်ဘေးရှောင်ဦးရေ ၁ ထောင်ကျော် ထွက်ပြေးတိမ်းရှောင်နေရဆဲ ဖြစ်သည်။
