သျှမ်းမြောက်၊ လားရှိုး-သီပေါကြားရှိ တံတားပျက်စီးနေသည့် စဉ့်အင်တွင် ဖောင်ဖြင့် ချောင်းဖြတ်ကူးစဥ် ကား၂ စီး ရေထဲပြုတ်ကျသွားကြောင်း ကူညီကယ်ဆယ်ရာတွင် ပါဝင်သည့် ဒေသခံ တစ်ဦးက ပြောသည်။

ယနေ့ (ဇွန်လ ၁၅ ရက်) ညနေပိုင်းက ဖောင်ဖြင့် ကား ၂ စီးတင်ဆောင် ဖြတ်ကူးစဉ် တဖက်ကမ်းသို့ အရောက် ဖောင်ကမ်းကပ်ရာက ကား ၂ စီး ရေထဲ ပြုတ်ကျသွားခြင်း ဖြစ်ကြောင်း ၎င်းကဆိုသည်။

“ကားတစ်စီးက လားရှိုး အခြေစိုက် ကမ္ဘောဇ နာရေးကူညီမှုအသင်းက လူနာတင်ကားပါ။ တစ်စီးက ခရီးသည် ဗင်ကား။ အခု ကမ္ဘောဇအဖွဲ့လည်း ရောက်နေတယ်” ဟု ၎င်းကရှင်းပြသည်။

ပြီးခဲ့သည့် ၁၀၂၇ စစ်ဆင်ရေး အတွင်းက စဥ့်အင်တံတား ပျက်စီးသွားပြီးနောက် ယာယီ တံတားထိုး၍ ယာဥ်များ ဖြတ်သန်းသကဲ့သို့ ဖောင်ဖြင့်လည်း ဖြတ်သန်းလေ့ရှိသည်။

ယမန်နေ့က စဉ့်အင် ယာယီတံတား ရေနစ်မြုပ် မြောပါသွားသဖြင့် ယနေ့ ကားများ ဖောင်ဖြင့် ဖြတ်ကူးနေခြင်း ဖြစ်သည်။

ယခု ဖြစ်စဉ်တွင် လူထိခိုက်မှုရှိမရှိ မသိရသေးပေ။

ပြီးခဲ့တဲ့ ဇွန်လ ၁၂ ရက်က ကောင်းဟုန်းရွာအနီး၊ လားရှိုး-မိုင်းယော် လမ်းကို စစ်ကောင်စီတပ် မြေထိုးစက်ဖြင့် ဖျက်ဆီးထား၍ လမ်းကြောင်းပေါ်တွင် လက်ရှိ အချိန်အထိ ကားရာချီ ပိတ်မိနေကြောင်း ဒေသခံများထံမှ သိရသည်။