သျှမ်းပြည်တောင်ပိုင်း ဆီဆိုင်မြို့နယ်တွင် အမျိုးသမီးတစ်ဦး မြေမြုပ်မိုင်းထပ်မံနင်းမိကာ ပြင်းထန်စွာထိခိုက်ဒဏ်ရာ ရရှိသွားကြောင်းစုံစမ်းသိရှိရပါသည်။
သျှမ်းပြည်တောင်ပိုင်း၊ ဆီဆိုင်မြို့နယ်၊ နောင်ကျောကျေးရွာအုပ်စု နောင်ရင်းရွာရှိ ဇွန်လ ၁၃ရက် ညနေ ၅နာရီခန့်တွင် နန်းထားထားရီ သည် နိုင်ငံရပ်ခြားတွင်ရောက်ရှိနေသော အစ်မဖြစ်သူနှင့် ဖုန်းဆက်သွယ်ပြောဆိုရန် ရွာအရှေ့ဘက် ဖုန်းလိုင်းမိသောနေရာသို့သွားရောက်ခဲ့သည်။
၎င်းအမဖြစ်သူနှင့်ဖုန်းဆက်ပြီးအပြန်တွင် မြေမြှုပ်မိုင်းနင်းမိပြီး ခြေထောက်တစ်ဖက် ပြတ်ကာ
ဘယ်ဖက်မျက်လုံး အစထိမှန်ဒဏ်ရာရရှိခဲ့သည်။
” စစချင်းတော့ အရမ်းလန့်တောပါ့။ သူလည်း အရမ်းကြောက်နေတာ။ သွေးတွေနဲ့တွေ့တော့ အရမ်းလန့်သွားတယ်။ ခုဆို ကိုယ့်မြေနေရာတောင် ကောင်းကောင်းမသွားရဲတော့ဘူး။ မိုင်းနင်းမိမှာစိုးလို့။ ဖြစ်နိုင်ရင် မိုင်းတွေလာရှင်းလင်းပေးစေချင်တယ်။”ဟု နန်းထားထားရီနှင့် နီးစပ်သူတစ်ဦးမှ သျှမ်းသံတော်ဆင့်ကိုပြောသည်။
လက်ရှိတွင် ဒဏ်ရာပြင်းထန်သဖြင့် အောင်ပန်းကုတင် (၇၀၀)တွင် ဆေးကုသမှုခံယူနေပြီး ဆေးစရိတ်အတွက် ငွေကြေးအခက်ခဲ ရှိနေကြောင်းသိရသည်။
ပြီးခဲ့သည့် ဇွန်လ ၆ရက်တွင်လည်း အသက်၇၀ ကျော် အမျိုးသမီး တစ်ဦးသည် နေအိမ်သန့်ရှင်းရေးလုပ်နေစဥ် မိုင်းနင်းမိကာ ပြင်းထန်စွာ ဒဏ်ရာရရှိခဲ့ပြီး သေဆုံးခဲ့သည်။
လက်ရှိဆီဆိုင်မြို့နယ်တွင် တိုက်ပွဲ ဖြစ်ပွားခြင်းမရှိသော်လည်း မြေမြုပ်မိုင်းနှင့် လက်နက်ကြီးအကြွင်းများကြောင့် နေရပ်ပြန်ပြည်သူများ ထိခိုက်ဒဏ်ရာ ရရှိကာ သေဆုံးသူများလည်းရှိနေသည်။
အလုပ်သင် သတင်းထောက် နန်းလရောင် ရေးသားသည်။
Leave a Comments