ကချင်ပြည် ဝိုင်းမော်မြို့တွင် တိုက်ပွဲများပြင်းထန်မှုကြောင့် စစ်ဘေးရှောင်များ နေရပ်အသစ်သို့ ထပ်မံပြောင်းရွှေ့ရန် အခြေအနေရှိနေပြီး အခက်အခဲများကြုံတွေ့နေရကြောင်း သတင်းရရှိသည်။
ကချင်ပြည်နယ် ဝိုင်းမော်မြို့တွင် စစ်ကောင်စီ နှင့် ကချင်လွတ်မြောက်ရေးတပ်မတော် KIA နှင့် PDF တို့ တိုက်ပွဲပြင်းထန်နေလျက်ရှိနေပြီး တိုက်ပွဲပြင်းထန်မှုကြောင့် စစ်ဘေးရှောင်များ ထပ်မံပြောင်းရွှေ့ရန် လိုအပ်နေကြောင်း စစ်ဘေးရှောင်ကူညီသူ အမျိုးသားတစ်ဦးက သျှမ်သံတော်ဆင့်ကို ပြောသည်။
“ကိုယ်လည်းစစ်ဘေးရှောင်ဖြစ်ချင်ဖြစ်သွားလိမ့်မယ်။ အတိကျတော့ပြောလို့မရသေးဘူး။ ဒီနေ့အရမ်းပြင်းထန်နေတယ်။အခုဆိုရင်တော့ မြို့အတွင်းထဲကိုရောက်လာပြီလို့ပြောလို့ရတာပေါ့။ စစ်ရှောင်တွေကတော့ အခုလောလောဆယ်နေတဲ့နေရာမှာပဲနေတော့ မရွေ့သေးဘူး။ စစ်ရှောင်နေရာ ပြောင်းမလား မပြောင်းဘူးလားဆိုတော့ ဒီနေ့ပြန်ကြည့်ရအုံးမယ်” ဟု စစ်ဘေးရှောင်ကူညီသူ အမျိုးသားတစ်ဦးက ပြောသည်။
လက်ရှိ ဝိုင်မော်မြို့တွင် တိုက်ပွဲများပြင်းထန်လျက်ရှိနေပြီး အချို့သော အရပ်သားများလည်း ထွက်ပြေးတိမ်းရှောင်နေရသည်။
ဝိုင်မော်မြို့တွင် ကျန်ရှိနေသော စစ်ဘေးရှောင်များသည် ထွက်ပြေးတိမ်းရှောင်ရန်အတွက် ကားများ အခက်အခဲရှိနေပြီး လက်ရှိတွင်လည်း တိုက်ပွဲကြားတွင် ပိတ်မိနေသည့် အခြေအနေဖြစ်နေကြောင်း ၎င်းအမျိုးသားက ဆက်ပြောသည်။
“ အခုက စစ်ရှောင်တွေလည်းထပ်တစ်နေရာပြောင်းရမယ်ဆိုရင်တော့ သူတို့ကို သယ်ဖို့ကားတွေကလည်း အဆင်မပြေလောက်ဘူး။ ဝိုင်းမော်မှာကလည်း တော်တော်များများပြေးကုန်ကြပြီလေ။ သူများကားငှားဖို့ ကလည်း မလွယ်ဘူး။ နောက်တစ်ချက်အနေနဲ့ကတော့ ကျနော်တို့ကတော့ ကြားညှပ်လာနိုင်ဖို့ အလာလာ ရှိနေတယ်။ လမ်းတွေဘာတွေပိတ်နေပြီးတော့ ကြားမှာပိတ်နေတဲ့အနေထားဖြစ်နေတယ်လေ”ဟု ၎င်းက ဆက်ပြောသည်။
ဝိုင်းမော်မြို့နယ်အတွင်တွင် ရှမ်းတိုင်းရင်းသား စစ်ဘေးရှောင် အပါအဝင်၊ စစ်ဘေးရှောင် စုစုပေါင်း ၁ သောင်းခန့်ရှိနေပြီး စစ်ဘေးရှောင်အများစုသည် ကလေးနှင့် အမျိုးသမီးများဖြစ်ကြကြောင်း ၎င်းကဆက်ပြောသည်။
ထိုစစ်ဘေးရှောင်များသည် လက်ရှိတွင် စားဝတ်နေရေးများခက်ခဲနေသည့်အပြင် အလှူရှင်နည်းပါးမှုများကြောင့် လည်း စားသောက်ရန်အခက်အခဲများကြုံတွေ့နေရသည်။
ပြီးခဲ့သည့် ဇွန်လ ၁၀ ရက်တွင်လည်း စစ်ကောင်စီ၏ လက်နက်ကြီးပစ်ခတ်မှုကြောင့် အသက် ၂၇ နှစ် အရပ်သား ၁ဦးသေဆုံးခဲ့ပြီး ၅ ဦးခန့်ထိခိုက်ဒဏ်ရာရ ရှိခဲ့ကြောင်းသိရသည်။
