သျှမ်းပြည် တောင်ပိုင်း လွိုင်လင်-မိုင်းပွန် ပြည်ထောင်စုလမ်းမကြီပေါ်တွင် လမ်းပြုပြင်မှုများ ပြုလုပ်နေသဖြင့် ကားလမ်းများပိတ်ဆို့မှုဖြစ်ပွားကာ သွားလာမှုအခက်ခဲများရှိနေကြောင်း သတင်းရရှိသည်။
သျှမ်းပြည် တောင်ပိုင်း လွိုင်လင်-မိုင်းပွန် ပြည်ထောင်စုလမ်းမကြီးပေါ် တွင် ပြီးခဲ့သည့် မေလ နောက်ဆုံးပတ် မှစ၍ လွိုင်စမ်ဟိုတောင်၌ လမ်းပြုပြင်မှုများ ပြုလုပ်နေပြီး၊၊ လိုင်ကားများ နှင့် ၁၀ ဘီး တွဲကားကြီး များ သွားလာရန် အခက်အခဲများကြုံတွေ့နေရ ကြောင်း ကားသမားတစ်ဦးက သျှမ်းသံတော်ဆင့် ကို ပြောသည်။
“အခုက လမ်းတွေပိတ်ရင် အရမ်းကြာတယ် တနေ့တနေ့တော့မတူဘူး။တချို့ရက်တွေ့ကြတော့ ၃ နာရီ ၄ နာရီလောက်စောင့်ရတာရှိတယ်လေ။ခက်တယ် တချို့ရက်တွေဆို မိုင်းနောင် လမ်းမှာအိပ်ရတယ်။ အရင်ကပုံမှန် သွားလာနေကြ ခရီးကြာချိန်က ၆ နာရီပဲရှိတာလေ။”ဟု ကားသမားတစ်ဦးက ပြောသည်။
ထိုသို့လမ်းပိတ်ဆို့ပြီး အချိန်ကြာမြင့်သည့်အတွက် အချို့ မြို့များရှိ စစ်ကောင်စီဂိတ်များတွင် ည ၆ နာရီ ကျော်လျှင် သွားလာခွင့် မပြုခြင်းကြောင့် လမ်းပေါ် ညအိပ်ရသည့် ကားများရှိကြောင်း သိရသည်။
ထိုလမ်းတွင် တာဝန်ရှိသူများမှ ကားများအတွက် အတက်အဆင်းများကို ကြည့်ကြပ်ပေးနေပြီး၊ လမ်းများကိုပြုပြင်နေကာ၊ကျောက်မိုင်းခွဲခြင်း နှင့် ကမ်းပါးများပြိုလျှင် အချိန်ကြာမြင့်စွာစောင့်ရကြောင်း တွဲကားကြီး မောင်းသူတစ်ဦးက သျှမ်းသံတော်ဆင့်ကိုပြောသည်။
“တောင်တွေကို ကျောက်မိုင်းခွဲရင် ကြာတယ် စောင့်ရတာ။သူတို့က လမ်းခင်းတာ ချဲ့တာတွေ လုပ်နေတာ။ ဒါမဲ့လည်း ကားကြီးတွေတော့ ပိတ်တာပဲ ရှောင်ပေးရတာလည်းခက်တယ်။ကားငယ်တွေထပ်သွားလာရတာ ခက်တယ်လေ။ကျနော်တို့အတွက်က စိုးရိမ်ရတယ် ကုန်စိမ်းသီးနှံတွေတင်တော့ လမ်းမှာအကြာကြီး ပိတ်မိမှာကို စိုးရိမ်နေရတာ။”ဟု ၎င်းက ပြောသည်။
ကားလမ်းများပိတ်ဆို့မှုကြောင့် လူနာတင်ယာဥ်၊ အရေးပေါ်လူနာတင်ယာဥ်များအတွက် ကျောက်တန်းလမ်း ကို အသုံးပြုနေကြောင်း သိရသည်။
လက်ရှိတွင်ကားလမ်းပိတ်နေသည့် လွိုင်လင်- မိုင်းပွန် အနီးတဝိုက် စစ်ကောင်စီ၊ ပြည်သူ့စစ် PNO နှင့် PNLA ၊ PDF တို့ကြားတွင် လှုပ်ရှားနေသည့် နယ်မြေဖြစ်သည်
