Sunday, July 14, 2024

ပြည်သူများ ‘သားရေပေါ်အိပ် သားရေနားစား’ ရိုင်းစိုင်း ယုတ်မာသည့် အကြမ်းဖက်သမားများဟု မင်းအောင်လှိုင် စွပ်စွဲ၊ မြဝတီသတင်း ပြင်ဆင်ဖော်ပြ

Must read

ဒေသခံ ပြည်သူလူထုသည် “သားရေပေါ်အိပ် သားရေနားစား” ရိုင်းစိုင်း ယုတ်မာသည့် အကြမ်းဖက်သမားများဖြစ်ပြီး နိုင်ငံ ပျက်စီးအောင် ပြုလုပ်နေသည်ဟု စစ်ခေါင်းဆောင် မင်းအောင်လှိုင်က ယမန်နေ့ (ဇွန်လ ၇ ရက်) တွင် ပြုလုပ်သည့် စစ်ကောင်စီ အစည်းအဝေးတွင် စွပ်စွဲပြောဆိုလိုက်သည်။

ဒေသတစ်ခု ပျက်စီးစေရန်အတွက် လုပ်ဆောင်သူများမှာ အဆိုပါ ဒေသတွင် နေထိုင်သည့် ဒေသခံ အဖျက်သမား အကြမ်းဖက်များ ဖြစ်ကြောင်း၊ တိုင်းဒေသကြီးနှင့် ပြည်နယ်များအလိုက် ဖြစ်ပေါ်နေသည့် အကြမ်းဖက် လုပ်ရပ်များကို အဆိုပါ ဒေသတွင် နေထိုင်သည့် ဒေသခံ အကြမ်းဖက်များက လုပ်ဆောင်နေကြောင်း၊ အခြားဒေသတွင်နေထိုင်သူများ လာရောက် လုပ်ဆောင်နိုင်ခြင်းမရှိကြောင်း ၎င်းက ဆိုသည်။

ဥပမာ ခပ်ကြမ်းကြမ်း ပေးရလျှင် “သားရေပေါ်အိပ် သားရေပေါ်စား” များဖြစ်ကြောင်း၊ ၎င်းကဲ့သို့ ရိုင်းစိုင်း ယုတ်မာသည့် အကြမ်းဖက်သမားများကို လူထုအားဖြင့် ကာကွယ်ရမည်ဟု ၎င်းကပြောဆိုသည်။

ယင်းသို့ စစ်ခေါင်းဆောင် မင်းအောင်လှိုင် ၏ ရိုင်းစိုင်းစွာ ပြောဆိုမှုအား စစ်တပ်ပိုင် မြဝတီရုပ်သံက သတင်းကြေညာရာတွင် ထည့်သွင်း ကြေညာခဲ့သော်လည်း အင်တာနက် စာမျက်နှာတွင် ပြန်လည် ဖော်ပြရာ၌ “ဥပမာ ခပ်ကြမ်းကြမ်း ပေးရလျှင် “သားရေပေါ်အိပ် သားရေနားစား” များဖြစ်ကြောင်း၊ ၎င်းကဲ့သို့ ရိုင်းစိုင်း ယုတ်မာသည့် အကြမ်းဖက်သမားများကို လူထုအားဖြင့် ကာကွယ်ရမည် ဖြစ်ကြောင်း” ဆိုသည့် ပြောဆိုမှုအား “ဥပမာပေးရမည်ဆိုပါက “အရိပ် နေနေ၊ အခက်ချိုးချိုး” ပြုလုပ်နေသူများဖြစ်ကြောင်း” ဟု အစားထိုး ဖော်ပြထားသည်ကို တွေ့ရသည်။

စစ်တပ် အာဏာသိမ်းသည့် ၃ နှစ်ကျော် ကာလအတွင်း နိုင်ငံတဝှမ်း သိန်းနှင့်ချီသည့် ပြည်သူပိုင် အိုးအိမ်များကို စစ်တပ်က အကြမ်းဖက် ဖျက်ဆီးခဲ့ပြီး ထောင်နှင့်ချီသည့် ပြည်သူများကို သတ်ဖြတ်ကာ နိုင်ငံတော် အာဏာ မတရားရယူနိုင်ရေး အတွက် စစ်ခေါင်းဆောင် မင်းအောင်လှိုင် ဦးဆောင် ကြိုးပမ်းနေသည်မှာ ယနေ့တိုင်ဖြစ်သည်။

Leave a Comments

- Advertisement -spot_img

Latest article