သျှမ်းပြည် မိုင်းဖြတ်မြို့နယ် စစ်ကောင်စီရဲတပ်ဖွဲ့က NLD ပါတီတံဆိပ်ပါ အင်္ကျီဝတ်ထားသည့် လူငယ်များကို ဖမ်းဆီးရန် ပိုက်စိပ်တိုက် ရှာဖွေခဲ့ကြောင်း စုံစမ်းသိရသည်။

မေလ (၂၉) ရက်တွင် မိုင်းဖြတ်မြို့၊ ဈေးတန်းရပ်ကွက်ရှိ မြို့မဈေးသို့ အမျိုးသားဒီမိုကရေစီအဖွဲ့ချုပ် NLD ပါတီတံဆိပ်ပါ အင်္ကျီဝတ်ဆင်လာသည့် လူငယ်များကို ဖမ်းဆီးရန်အတွက် စစ်ကောင်စီလက်အောက်ခံ ရဲတပ်ဖွဲ့က မြို့ပေါ်ရပ်ကွက်များတွင် ပိုက်စိပ်တိုက် လိုက်လံရှာဖွေခဲ့ကြောင်း မိုင်းဖြတ်ဒေသခံများက ပြောသည်။

“တောင်ပေါ် လားဟူတွေ ဈေးလာဝယ်ကြတာ။ ဝယ်ပြီးတော့မှ သူတို့ပြန်သွားပြီထင်တယ်။ အဲ့တာနဲ့ ဘယ်အဖွဲ့တွေလည်း မသိဘူး တွေ့ပြီးတော့ ရဲကို ညှောင့်လိုက်တာပေါ့။ NLD အင်္ကျီဝတ်ပြီး နှစ်ယောက်သုံးယောက် လျှောက်သွားနေတယ် ဆိုပြီးတော့ ရဲတွေကလည်း တစ်မြို့လုံး ပိုက်စိပ်တိုက် လိုက်ရှာနေတာ၊ တွေ့တော့ မတွေ့ဘူး”ဟု မိုင်းဖြတ်မြို့နယ်မှ ဒေသခံလူငယ် အမျိုးသားတစ်ဦးက သျှမ်းသံတော်ဆင့်ကို ပြောသည်။

မိုင်းဖြတ်မြို့နယ်တွင် ပြီးခဲ့သည့် ရွေးကောက်ပွဲကာလများ၌ အစဉ်အလာအားဖြင့် ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ (USDP) အားကောင်းခဲ့ပြီး စစ်အာဏာသိမ်းပြီးနောက် လက်ရှိတွင် အမျိုးသားဒီမိုကရေစီအဖွဲ့ချုပ် (NLD) အမည်ကို မပြောဆိုရဲတော့ကြောင်း မိုင်းဖြတ်ဒေသခံများထံမှ သိရသည်။

“ဓာတ်ပုံလည်း မရိုက်ထားတော့ မြို့အနှံ့ကို လမ်းကြိုလမ်းကြားမကျန် အကုန်လိုက်ရှာကြတာ။ အဲ့နာမည်(NLD)တောင် မပြောရဲကြဘူး။ ပြီးရင် မိုင်းဖြတ်မြို့က စစ်မှုထမ်းပါတဲ့ ကလေးတစ်ယောက်အတွက် သိန်း ၁၀၀ နဲ့ ဝယ်တယ်လို့ကြားတယ်။ ပြည်မဘက်က ကောင်လေးတစ်ယောက်ကို အစားထိုးဝယ်ပြီး ထွေအုပ်ရုံးမှာ ရောက်လာကြတာ”ဟု မိုင်းဖြတ်မြို့မှ ၎င်းဒေသခံလူငယ်က သျှမ်းသံတော်ဆင့်ကို ဆက်ပြောသည်။

စစ်ကောင်စီလက်အောက်ရှိ ပြည်ထောင်စုရွေးကောက်ပွဲကော်မရှင် (UEC) ၏ နိုင်ငံရေးပါတီများ မှတ်ပုံတင်ခြင်းဥပဒေသစ်အရ ပြန်လည်မှတ်ပုံတင်ခြင်း မရှိခဲ့သည့် အမျိုးသားဒီမိုကရေစီအဖွဲ့ချုပ် (NLD)၊ ရှမ်းတိုင်းရင်းသားများ ဒီမိုကရေစီအဖွဲ့ချုပ် (SNLD) တို့အပါအဝင် ပါတီ (၄၀) ကျော်ကို မှတ်ပုံတင်ပယ်ဖျက်လိုက်ကြောင်း ပြီးခဲ့သည့် ၂၀၂၃ မတ်လ ၂၈ ရက်တွင် ရွေးကောက်ပွဲကော်မရှင်က ကြေညာခဲ့သည်။

၂၀၂၁ ခုနှစ် စစ်အာဏာသိမ်းပြီးနောက်ပိုင်း ရန်ကုန်နှင့် မန္တလေးမြို့တို့ အပါအဝင် တိုင်းဒေသကြီးတချို့ရှိ အမျိုးသားဒီမိုကရေစီအဖွဲ့ချုပ် NLD ပါတီဆိုင်းဘုတ်များ ဖြုတ်ချခံခဲ့ရသလို တိုင်း၊ ခရိုင်၊ မြို့နယ်များရှိ ပါတီရုံးခန်းများလည်း အကြိမ် ၁၂၀ ကျော် ကျူးကျော်ဖျက်ဆီးခံခဲ့ရကြောင်း NLD ပါတီက ၂၀၂၃ မတ်လ ၂၉ ရက်တွင် ထုတ်ပြန်ထားသည်။

ထို့အပြင် စစ်ကောင်စီသည် NLD လွှတ်တော်အမတ်များနှင့် ပါတီဝင်များ၏ နေအိမ်ကို ချိပ်ပိတ်မှု ရာနှင့်ချီရှိနေပြီး အကြမ်းဖက်ဥပဒေအရ တော်လှန်ဆန့်ကျင်သူများကို ဖမ်းဆီးတာအပြင် ပိုင်ဆိုင်မှုများကို ချိပ်ပိတ်သိမ်းဆည်းမှုများလည်း ရှိနေသည်။

ပုံစာ – NLD ပါတီရုံးခန်းများ ဖျက်ဆီးခံထားရစဉ် (ပုံဟောင်း)