Saturday, July 20, 2024

ညောင်ရွှေမြို့နယ် လောင်းကစားဝိုင်းများလာ

Must read

စစ်အာဏာသိမ်းပြီးနောက် သျှမ်းပြည်တောင်ပိုင်း၊ ညောင်ရွှေမြို့နယ်တွင် လောင်းကစားဝိုင်းများကြောင့် ဒုက္ခရောက်နေသူများ များပြားလာကြောင်း စုံစမ်းသိရှိရသည်။

လက်ရှိမှာ ညောင်ရွှေမြို့နယ်တွင် လေးကောင်ဂျင်ဝိုင်း၊ ဖဲဝိုင်းများ၊ လောင်းကစားဝိုင်းများလာသော်လည်း သက်ဆိုင်ရာက အရေးယူခြင်းမရှိကြောင်း ညောင်ရွှေ ဒေသခံများကပြောသည်။

“တော်တော်ဆိုးနေတယ်၊ လေးကောင်ဂျင်ဝိုင်းတွေကြောင့် အကြွေးတွေဝိုင်းနေကြတဲ့သူတွေအများကြီးပဲ၊ တချို့ဆို ကိုယ့်ကိုယ်ပိုင်အလုပ်တွေတောင် မလုပ်နိုင်ကြတော့ဘူး လောင်းကစားဝိုင်းကိုပဲရောက်နေကြတာ၊ ရဲတွေကလည်း ဟိုတလောက ဖဲဝိုင်းတွေကို ဝင်ဖမ်းတယ်လို့ ကြားပေမယ့်၊ လေးကောင်ဂျင်းဝိုင်းတွေကတော့ အေးဆေးပဲ” ဟု အသက် ၃၀ အရွယ် ညောင်ရွှေမြို့ခံတစ်ဦးကပြောသည်။

စစ်အာဏာသိမ်းပြီးနောက် တရားဥပဒေစိုးမိုးမှု လျော့နည်းလာပြီး လောင်းကစားဝိုင်းများကို ပေါ်ပေါ်ထင်ထင် ပြုလုပ်လာကြကာ ဒေသခံအများအပြား လောင်းကစားဝိုင်းများတွင်သာ အချိန်ကုန်ပြီး ဒုက္ခရောက်နေသူများစွာ ရှိနေကြောင်းသိရသည်။

“လောင်းကစားဝိုင်းတွေက တော်တော်လေးကြီးလာတယ်၊ အခုဆို တခြားမြို့တွေကပါ လာကြတယ်။ တောင်ကြီး၊ ကလောဖက်ကလူတွေပါ လာဆော့နေကြတာ” ဟု ၎င်းမှဆက်ပြောသည်။

လောင်းကစားဝိုင်းများအပြင် ဖုန်းအတွင်း သို့ငွေသွင်း၍ဆော့ရသော online လောင်းကစားဂိမ်းများကိုပါ စွဲလမ်းလာကြသူများလည်းရှိကြောင်းတွေ့ရသည်။

“ခေတ်ကမကောင်းတော့ ပိုဆိုးတယ်၊အလုပ်တွေကမလွယ်တော့ဘူးလေ အဲ့တော့ လွယ်လွယ်ရမယ့်ဟာကိုပဲ စဉ်းစားနေကြတော့တာ၊ အပြင်မှာ လူကိုယ်တိုင်လောင်းကစားလုပ်ကြတဲ့သူတွေ‌ရော၊ ဖုန်းတွေမှာလည်း ပိုက်ဆံထည့်ပြီးဆော့ကြတာလေ၊ နိုင်တာကနည်းနည်း ထည့်နေတာကများများ၊ အသက်အရွယ်မရွေး စွဲလမ်းနေကြတာ” ဟု အသက် ၅၅ နှစ်အရွယ် ကုန်စုံဆိုင် လုပ်ငန်းလုပ်ကိုင်နေသူ အမျိုးသမီးတစ်ဦးက ပြောသည်။

အင်းလေးကန်ရှိရာ ညောင်ရွှေမြို့နယ်သည် ခရီးသွားလုပ်ငန်းများကို အဓိက အားထားရပ်တည်နေရသော ဒေသဖြစ်ပြီး Covid နှင့် စစ်အာဏာသိမ်းမှုနောက်ဆက်တွဲများကြောင့် ခရီးသွားလုပ်ငန်းနှင့် ပတ်သတ်သော အလုပ်အကိုင်များ အားလုံးရပ်ဆိုင်းသွားကာ ထိုအလုပ်များအပေါ် မှီခိုနေရသော ဒေသခံများသည် အခက်အခဲများစွာရင်ဆိုင်နေရလျက်ရှိသည်။

အလုပ်သင် သတင်းထောက် ယူဂျင်း ရေးသားသည်။

Leave a Comments

- Advertisement -spot_img

Latest article