ထိုင်း – မြန်မာနယ်စပ်ကော်မတီ မြို့နယ်အဆင့် TBC ၉၁ ကြိမ်မြောက်အစည်းအဝေး ကျင်းပရာ ထိုင်းနိုင်ငံ မှ လယ်ရေသွင်းရန် နယ်စပ်မယ်ဆိုင်ချောင်းပေါ်တွင် ဝါးဆည်တည်ဆောက်မည့်ကိစ္စ ဆွေးနွေးခဲ့ကြောင်း သိရသည်။
နို၀င်ဘာလ ၈ ရက်နေ့က တာချီလိတ်မြို့နယ် ဇန်မွန်းအခါဟိုတယ်တွင် အဆိုပါအစည်းအဝေး ကျင်းပခဲ့ခြင်းဖြစ်ပြီး မြန်မာအစိုးရဘက်မှ မယ်ဆိုင် – မယ်ဟောက်ချောင်း ရေခွဲဝေ အသုံးချရေးနှင့် မြစ်ကြောင်း ထိန်းသိမ်းရေးဆိုင်ရာ ဆပ်ကော်မတီ ဥက္ကဌလည်းဖြစ်သည့် သျှမ်းပြည်နယ်အစိုးရ ၊ ပြည်နယ်ဝန်ကြီးချုပ်ရုံးမှ အတွင်းရေးမှူး ဦးစိုးစိုးဇော်ဦးဆောင်သည့်သက်ဆိုင်ရာအာဏာပိုင်များအဖွဲ့ တက်ရောက် ခဲ့သည်။
မယ်ဆိုင်မြို့ ကော်စန့်အုပ်စုအတွင်း လယ်ယာမြေများအား လယ်ရေသွင်းရန်အတွက် မယ်ဆိုင်ချောင်းမှရေများ သွယ်ယူရန် ဝါးဆည်ပြုလုပ်မည့်ကိစ္စ မြန်မာအာဏာပိုင်များဘက်မှ သဘောတူကြောင်း ဆွေးနွေးခဲ့သည်ဟု မယ်ဆိုင်သတင်းတွင်ဖော်ပြထားသည်။
ယမန်နှစ်ကလည်း မယ်ဆိုင်ချောင်းပေါ် ဝါးဆည်ဆောက်မည့်ကိစ္စနှင့်ပတ်သက်ပြီး ၂ ဘက်ညှိနှိုင်းမှု မအောင်မြင်သဖြင့် မြန်မာဘက်မှဒေသခံများ မယ်ဆိုင်ချောင်းကူးတံတားတွင် ဆန့်ကျင်ကန့်ကွက် ဆန္ဒပြမှုဖြစ်ပေါ်ခဲ့သေးသည်။
မယ်ဆိုင်ချောင်းဦးပိုင်းတွင် ထိုင်းဘက်မှ ဝါးဆည်ဆောက်လုပ်ပါက ချောင်းရေကြီးချိန် မြန်မာဘက်ခြမ်းသို့ရေများလျှံတက်မည်ဖြစ်သဖြင့် တာချီလိတ်ဘက်ခြမ်းနေ ဒေသခံများ လက်မခံသဘောမတူနိုင်သဖြင့် ဆန့်ကျင်ဆန္ဒပြမှုဖြစ်ပွါးခဲ့ခြင်းဖြစ်ကြောင်းလည်းသိရပါသည်။
Leave a Comments