ယခုရက်ပိုင်းတွင် တရုတ်ငွေ ယွမ်နှင့် ထိုင်း ဘတ်ငွေ တို့သည့် အရှိန်အဟုန်မြင့်တက်မှုကြောင့် ကုန်စျေးနှုန်းများလည်း မြင့်တက်လာကာ ပြည်သူများစိုးရိမ်ထိတ်လန့်မှု ဖြစ်နေကြောင်း စုံစမ်းသိရသည်။

မြန်မာ-တရုတ်နယ်စပ် သျှမ်းပြည် မြောက်ပိုင်း မူဆယ်မြို့တွင် ယနေ့ (မေ ၃၀) နေ့လည်ပိုင်းတွင် တရုတ်ငွေ ယွမ်ပေါက်စျေးသည် တစ်ရာယွမ်လျှင် မြန်မာငွေကာလပေါက်စျေး ခြောက်သောင်းဝန်းကျင် (၆၀,၀၀၀) ထိမြင့်တက်သွားကြောင်း ငွေလွှဲဝန်ဆောင်မှုပြုလုပ်နေသည့် အမျိုးသမီးတစ်ဦးက သျှမ်းသံတော်ဆင့်ကို ပြောသည်။

‘’ဒီနေ့မနက်မှငွေဈေးရုတ်တရက်လာတော့အထိတ်တလန့်ဖြစ်စေခဲ့တယ် ၊ တရုတ်ဘက်ကို ကုန်မပို့လို့ ငွေကြေး
ကစားတဲ့သူတွေကြောင့်လို့ ပြောကြတာပဲ။ ငွေဈေးနှုန်းထက်တက်မလာ ကျမလာဆိုတာ စောင့်ကြည့်ရမယ်’’ဟု ၎င်းအမျိုးသမီးက ပြောသည်။

အဆိုပါ တရုတ်ငွေစျေး ရုတ်တရက် ထိုးတက်မှုကြောင့် ကုန်စျေးနှုန်းများလည်း လိုက်လံတက်လာနိုင်ကြောင်း၊ တရုတ်ပြည်မှ သွင်းကုန်သာ အားထားရသည့် မြို့ဖြစ်သဖြင့် ကုန်းစျေးနှုန်းတက်ပါက ပြည်သူများ အရင်ကထက် စားဝတ်နေရေး ပိုကြပ်တည်းလာနိုင်မည်ဟု မူဆယ်ဒေသခံ အိမ်ရှင်မ တစ်ဦး က သျှမ်းသံတော်ဆင့်ကိုပြောသည်။

“ စစ်အာဏာသိမ်းပြီးကတည်း တရိပ်ရိပ်တက်တဲ့ တရုတ်ငွေပါ။ အလုပ်အကိုင်ကလည်း မရှိ၊ဝင်ငွေကလည်း အရင်လိုမဟုတ်ဘူး၊ တရုတ်ငွေတက်ရင် ကုန်စျေးနှုန်း အိမ်တွင်း စားသုံးကုန်တွေပါတက်တော့ ကျမတိုအတွက် ပိုကြပ်တည်းမယ်။ ပိုဒုက္ခရောက်မယ်” ဟု ၎င်းအိမ်ရှင်မက ဆိုပြန်သည်။

ထို့အပြင် မေလ ၃၀ရက် ထိုင်းငွေ ဘတ် ရှစ်ရာ ( မြန်မာငွေကာလပေါက်စျေး ကျပ် တစ်သိန်းအထိ မြင့်တက်လာကြောင်းယခင်ရက်ပိုင်းတွင် ထိုင်းဘတ်တစ်ထောင်လျှင် မြန်မာကျပ်ငွေ တစ်သိန်း ရှိကြောင်းသိရသည်။

ထို့မြန်မာငွေစျေး ထိုးကျမှုကြောင့် ထိုင်းကုန်ပစ္စည်းများကို အားကိုးနေရသည့် မြန်မာလူထုလည်း ပူပင်သောကများ ဖြစ်နေကြသည်။

“ ကျမတို့ဆိုရင် မြန်မာငွေကျပ် မကိုင်ရဲဘူး။ လက်ထဲမှာ တန်ဖိုးကျသွားတယ်လေ။ နယ်စပ်မှာနေတော့ ဘတ်ပဲကိုင်ကြတာ။ လခစား ကျပ်ရတဲ့သူဆိုရင်တော့ ဒီချိန်တော်တော်ခံရတယ်” ဟု တာချီလိတ်မြို့ခံ အမျိုးသမီးတစ်ဦးက ပြောသည်။

စစ်တပ်အာဏာမသိမ်းခင် ၂၀၂၁ခုနှစ်တွင် တရုတ်ငွေ ယွမ်းတစ်ရာကို မြန်မာငွေ နှစ်သောင်းဝန်းကျင်သာရှိခဲ့ပြီး အာဏာသိမ်းပြီး သုံးနှစ်ကျော်အတွင်း ကျပ်ငွေခြောက်သောင်းကျော်အထိ မြင့်တက်ခဲ့တာ ဖြစ်သည်။

လက်ရှိမှာ ပြည်တွင်းရွှေဈေးနှုန်းသည် အမေရိကန်ဒေါ်လာ ငွေလဲလည်နှုန်းတွင် အဆမတန်မြင့်တက်လာပြီး မြန်မာငွေတန်ဖိုး ဆက်တိုက်ကျဆင်းလာသည်ဟု ငွေလဲလုပ်ငန်း လုပ်ကိုင်သူများကပြောသည်။

အလုပ်သင် သတင်းထောက် နန်းဆိုင်ခမ်း ရေးသားသည်။