သျှမ်းပြည်တောင်ပိုင်း ညောင်ရွှေမြို့သို့ ရောက်ရှိနေသော စစ်ရှောင်များသည် အိမ်ငှားရမ်းခများ တိုးမြင့်လာသဖြင့် အခက်အခဲများ ရင်ဆိုင်ကြုံတွေ့နေရကြောင်း စုံစမ်းသိရသည်။
ထိုညောင်ရွှေသို့ ရောက်ရှိလာသည့် စစ်ရှောင်များသည် ကရင်နီပြည်တွင် ဖြစ်ပွားသည့် စစ်ကောင်စီနှင့် ပြည်သူ့ကာကွယ်ရေးတပ် PDF တို့တိုက်ပွဲကြောင့် တိမ်းရှောင်လာကြသူများဖြစ်ကြသည်။
ညောင်ရွှေမြို့တွင် အိမ်ငှားခ ယခင်ကာလများတွင် တစ်လျှင် ကျပ်ငွေ ၂သိန်းခန့်သာ ပေးဆောင်ခဲ့ရာမှလက်ရှိမှာ အိမ်ငှားခ တစ်လလျှင် ကျပ်ငွေ သုံးသိန်းထိ မြင့်တက်သွားသဖြင့် စစ်ရှောင်များ အိမ်ငှားခ အခက်အခဲများကြုံတွေ့လာရကြောင်း အသက် ၄၇နှစ်အရွယ်ရှိ စစ်ရှောင် အမျိုးသမီး တစ်ဦးက သျှမ်းသံတော်ဆင့်ကိုပြောသည်။
“ ရောက်စတုန်းကတော့ အိမ်ငှားခကို ပါလာတာတွေနဲ့ပေးလိုက်တော့ အဆင်ပြေသေးတယ်။ ညစျေးမှာ ဆိုင်လေးဖွင့်တယ်။ စစ်မှုထမ်းဥပဒေထွက်လာတော့ ဆိုင်မှာလုပ်ပေးတဲ့ ဝန်ထမ်းတွေကလည်း လူငယ်တွေဆိုတော့ တစ်ခုခုဆို တာဝန်ကြီးတဲ့ အတွက် သူတို့အုပ်ထိန်းသူဆီကို ပဲပြန်အပ်လိုက်တယ်။ ဆိုင်ကပိတ်လိုက်ရတာပေါ့” ဟု စစ်ရှောင်အမျိုးသမီး က ဆိုသည်။
ညောင်ရွှေမြို့ပေါ်သို့ ရောက်ရှိလာသည့် ငွေကြေးတက်နိုင်သော စစ်ရှောင်များသည် ကိုယ့်နည်းကိုယ့်ဟန်ဖြင့်သာ အိမ်ခန်းငှားပြီး၊ တပိုင်တနိုင် စျေးဆိုင်ဖွင့်ပြီး ဝင်ငွေရှာဖွေခဲ့ကြသည်။
သို့သော် စစ်ကောင်စီ၏ ပြည်သူ့စစ်မှုထမ်းဥပဒေကြောင့် စျေးဆိုင်တွင် အလုပ်လုပ်သည့် စစ်ရှောင်လူငယ်ဝန်ထမ်းများ၊ စျေးဝယ်သည့် လူငယ်များ ထပ်မံရှောင်တိမ်းရသဖြင့် စျေးသည်များအရောင်းပါးကာ ဆိုင်ပြန်ပိတ်လိုက်ရကြောင်း စျေးရောင်းသည့် စစ်ရှောင်အမျိုးသမီးက ထပ်လောင်းပြောသည်။
ထို့ကြောင့် စစ်ရှောင်များသည် ညောင်ရွှေမြို့တွင် ၆လခန့်ကြား အိမ်ခန်းငှားနေထိုင်ခဲ့ပြီး အလုပ်အကိုင် ရှားပါးလာသဖြင့် စားဝတ်နေရေးသည် တဖြည်းဖြည်း ပိုကြပ်တည်းလာကြကာ အိမ်ခန်းငှား စစ်ရှောင်များနှင့် ဘုန်းကြီးကျောင်းများတွင် နေထိုင်နေကြသော မိမိနေရပ်ကိုပြန်နေလိုကြောင်း သိရသည်။
“ ဘုန်းကြီးကျောင်းမှာ နေတဲ့ သူတွေထဲမှာ တချို့ကပြန်ကြတယ်။ ဒါပေမယ့် မှော်ဘီဂိတ်နားမှာက ပေးမဖြတ်တာကြောင့် ပြန်လာရပေမယ့် ဘုန်းကြီးကျောင်းတွေက ပြန်လက်မခံလို့ ဒုက္ခရောက်နေကြသူတွေလည်း ရှိတယ်။ အထွက်ပြပြီးရင် ပြန်ဝင်လို့မရဘူးလို့ကြားတယ်” ဟု ၎င်း အမျိုးသမီးက ဆက်ပြောသည်။
ကရင်နီပြည် အတွင်း လှုပ်ရှားနေသည့် တော်လှန်ရေးတပ်ဖွဲ့များမှ စိုးမိုးထားသော နေရာများကျယ်ပြန့်လာသည့်အတွက် စစ်ရှောင်များသည် မိမိနေရပ်ပြန်နိုင်ရန် လည်း မျှော်လင့်နေကြောင်း စစ်ရှောင်များထံ သိရသည်။
သျှမ်းပြည်သို့ “၁၁.၁၁စစ်ဆင်ရေး” ကြောင့် ရောက်ရှိလာသည့် ကရင်နီစစ်ရှောင်ဦးရေ စုစုပေါင်း ၅သောင်းဝန်းကျင် ရှိကြောင်း သိရသည်။
အလုပ်သင် သတင်းထောက် ယူဂျင်း ရေးသားသည်။
Leave a Comments