သျှမ်းပြည်တွင် မက်သာဖက်တမင်း စိတ်ကြွဆေးပြားများဆုံးထုတ်လုပ်နေပြီး မြန်မာ-ထိုင်းနယ်စပ် တာချီလတ်မြို့သည် အဓိက ဝင်၊ထွက်ပေါက်ဖြစ်ကြောင်း ကုလသမဂ္ဂ မူးယစ်ဆေးဝါးနှင့် ရာဇဝတ်မှုနှိမ့်နင်းရေးအဖွဲ့ (UNODC) က ပြောဆိုလိုက်သည်။
အရှေ့တောင် အာရှတွင် မူးယစ်ဆေးဝါးစျေးကွက်သည် စိုးရိမ်စရာကောင်းအောင် ကြီးထွားနေပြီး သျှမ်းပြည်သည် အဓိက စျေးကွက်ဖြန့်သည့်နေရာဖြစ်ကြောင်းလည်း UNODC ၏ ယမန်နေ့ (မေ ၂၈)ရက်ထုတ်ပြန်ချက်အရသိရသည်။
သျှမ်းပြည်တွင် မက်သာဖက်တမင်း စိတ်ကြွဆေးပြား အများဆုံးထုတ်လုပ်ပြီး တာချီလိတ်မှ တဆင့် ထိုင်း၊ လာအို အပါအဝင် မဲခေါင်နိုင်ငံတွေကို ပို့နေကြောင်းသိရသည်၊
ထို စိတ်ကြွဆေး ရောင်းဝယ်ဖောက်ကားကြသည့်နေရာတွင် ရေကြောင်းမှတစ်ဆင့် သယ်ယူမှု အများဆုံးတွေ့လာရပြီး အထူးသဖြင့် ထိုင်းပင်လယ်ကွေ့နှင့် ကပ္ပလီပင်လယ်တွေကိုဖြတ် အများဆုံးကုန်ကူးနေကြကြောင်း UNODC က အစီရင်ခံစာတွင် ဖော်ပြထားသည်။
၂ဝ၂၃ ခုနှစ်အတွင်း အရှေ့တောင်အာရှနိုင်ငံများတွင် မက်သာဖက်တမင်း စိတ်ကြွဆေးပြားတန်ချိန် ၁၉ဝ အထိ ဖမ်းဆီးရမိခဲ့ပြီး စံချိန်တင်ပမာဏ ဖြစ်ခဲ့ပြီး ထိုထဲတွင် ထိုင်းနှင့် မြန်မာတွင် သန်းပေါင်း ၉၀၀ကျော် ဖမ်းဆီးရမိသည်။
“ဖမ်းမိတဲ့အရေအတွက်များလာပေမဲ့ အဖမ်းခံရတဲ့ အမှုတွေကတော့ နည်းလာပါတယ်။ ရာဇဝတ်ဂိုဏ်သားတွဟာ အရင်ကလို တစ်ကြိမ်မှာ နည်းနည်းစီသယ်တာ မဟုတ်တော့ဘဲ တစ်ခါသယ်ရင် ပမာဏအများကြီးသယ်တဲ့ ဗျူဟာပြောင်းလာကြတာ ဖြစ်နိုင်တယ်” ဟု UNODC က ပြောထားသည်။
လက်ရှိ မူးယစ်ဆေးဝါး အဓိက ဝင်ထွက်ပေါက်ဖြစ်နေသည့် မြန်မာ-ထိုင်းနယ်စပ် တာချီလိတ်မြို့သည် စစ်အာဏာသိမ်း ပြီးနောက် တော်လှန်ရေး စစ်ရေး လှုပ်ရှားမှုမရှိသည့် မြို့ဖြစ်သည့်အပြင် အွန်လိုင်းလောင်းကစားများ၊ မူးယစ်ဆေး ရောင်းဝယ်ဖောက်ကားမှု၊ ဒုစရိုက်သမားများ လှုပ်ရှားသည့် ဒေသတစ်ခုလည်း ဖြစ်သည်။
အလုပ်သင် သတင်းထောက် နန်းဆိုင်ခမ်း ရေးသားသည်။
