ကရင်နီပြည်နယ်ရှိ စစ်ရှောင်များသည် စားနပ်ရိက္ခာ အခက်ခဲကြောင့် ဆန်ပြုတ်သာ စားနေရသည့် အဆင့် ရောက်ရှိနေကြောင်း စစ်ရှောင်ကူညီနေသူ ထံမှ စုံစမ်းသိရသည်။
ကရင်နီပြည်နယ်၊ မိုးဗြဲတောင်ဘက်ရှိ စစ်ဘေးရှောင်များသည် လမ်းပန်းဆက်သွယ်ရေးခက်ခဲခြင်းနှင့် အလှူရှင်များ နည်းပါးလာမှုကြောင့် စားနပ်ရိက္ခာအခက်အခဲဖြစ်လာပြီး ကလေးများကို ထမင်းကျွေးကာ လူကြီးများ ဆန်ပြုတ် သောက်နေရသည့် အဆင့်ရောက်ရှိနေကြောင်း စစ်ရှောင်ကူညီနေပးနေသည့် အမျိုးသားတစ်ဦးက သျှမ်းသံတော်ဆင့် ကိုပြောသည်။
“ စစ်ရှောင်က အများကြီးပဲ။ ရိက္ခာက မလောက်ဘူး၊ ကလေးတွေကို ဦးစားပေးတယ်၊ သူတို့ကို ထမင်းကျွေးတယ်။ လူငယ်နဲ့လူကြီးတွေကတော့ ဆန်ပြုတ်ပဲသောက်လိုက်တာ” ဟု စစ်ရှောင်ကူညီနေသည့် အမျိုးသား က ဆိုသည်။
လက်ရှိမှာ မိုးရာသီရောက်ရှိလာသဖြင့် လမ်းပန်းဆက်သွယ်မှု ယခင်ကထက် ပိုခက်ခဲပြီး တစ်နေရာမှ တစ်နေရာသို့ သွားမည်ဆိုပါက အဆင်မပြေကြောင်း၊ စစ်ရှောင်ကို လာရောက်လှူဒါန်းမည့်သူများလည်း လမ်းပန်းဆက်သွယ်ရေးနှင့် စစ်ကောင်စီမှ လမ်းပိတ်ဆို့မှုကြောင့် မလာနိုင်ကြောင်း စစ်ရှောင်ကူညီသူများက ထပ်လောင်းပြောသည်။
ထို့ပြင် စစ်ရှောင်မိသားစုများသည် အလုပ်အကိုင်မရှိသဖြင့် အလှူရှင်များကိုသား အားကိုးနေရသော်လည်း အလှူရှင်မရောက်ရှိသဖြင့် ဆေးဝါး လုံလောက်မှုလည်း မရှိကြောင်း သိရသည်။
“ တချို့ စစ်ရှောင်တွေရဲ့ သား၊သမီးက နိုင်ငံခြားကနေပိုက်ဆံပို့တော့အဆင်ပြေတယ်။ ကျနော်တို့ မိသားစု ကလေးတွေလည်း စစ်ရှောင်နေရတော့ ဝင်ငွေမရှိ အလုပ်အကိုင်မရှိတော့ သူများထက် ပိုခက်ခဲတာပေါ့။ ခုကာလမှာ လုပ်စားလို့လည်းမကောင်းဘူး။ စီးပွားရေးလုပ်ဖို့ အရင်းနှီးလည်းမရှိ၊ ရှိတာလည်း မီးထဲပါကုန်ပြီ” ဟု စစ်ရှောင်အမျိုးသား တစ်ဦးက သျှမ်းသံတော်ဆင့်ကိုပြောသည်။
မိုးဗြဲတောင်ဘက်တွင် စစ်ရှောင်ဦးရေ သည် နှစ်ထောင်အထက်ရှိပြီး၊ ထိုစစ်ရှောင်များသည် စစ်ကောင်စီနှင့် ပြည်သူ့ကာကွယ်ရေးတပ်ဖွဲ့ (PDF)တို့တိုက်ပွဲကြောင့် ထွက်ပြေးလာသည့်သူများဖြစ်ပြီး၊ လက်ရှိမှာ စစ်ဘေးရှောင်များသည် အလုပ်အကိုင်မဲ့ကာ စားနပ်ရိက္ခာကို ပိုစိုးရိမ်နေရကြောင်း သိရသည်။
အလုပ်သင် သတင်းထောက် နန်းလရောင် ရေးသားသည်။
