ကချင်ပြည်၊ ဝိုင်းမော်မြို့ ဒေသခံ ငှက်ပျောခြံ အလုပ်သမားများကို ကချင်လွတ်လပ်ရေးတပ်မတော် KIA က ပြန်လွှတ်ပေးကြောင်း သတင်းရင်းမြစ်များက ယနေ့ (မေလ ၂၇ ရက်) တွင်ပြောသည်။

ကချင်လွတ်လပ်ရေး တပ်မတော်-KIA က ဝိုင်းမော်မြို့နယ်၊ ဘီဒရာရွာ၌ ထိန်းသိမ်းထားသည့် အဆိုပါ အလုပ်သမားနှင့် စစ်တပ်မိသားစုဝင်များကို ယမန်နေ့ (မေလ ၂၆ရက်) ည ၈ နာရီဝန်းကျင်က စစ်တပ်ဘက်ကို အကြောင်းကြားပြီး ပြန်လွှတ်ပေးခဲ့ခြင်း ဖြစ်သည်။

“သူတို့က လွတ်မြောက်လာတာက မနေ့က ၂၃ ယောက်ပေါ့။ ဒီနေ့ မနက် ကယ်လာတာကတော့ ၂၇ ယောက်ပေါ့။ ပစ်ခတ်မှုကြောင့် ထိတာတွေလည်းရှိတယ်။သူတို့တွေက တိုက်ပွဲဖြစ်တုန်းက KIA ဘက်က ထိန်းသိမ်း ပေးထားတဲ့ဟာကို မနေ့က ပြန်လွှတ်လာပေးတာပေါ့။ လမ်းတွေမှာလည်း ပစ်သံတွေ ကြားနေရတာပဲ” လွတ်မြောက်လာသူများကို အကူအညီပေးနေသည့် ဝါရှောင် ဆရာတော် အရှင်ဝိဇယက သျှမ်းသံတော်ဆင့်ကို မိန့်သည်၊

KIA ပြန်လွှတ်ပေးသူ စုစုပေါင်း ၁၀၀ ခန့်ရှိပြီး တင်ဆောင်လာသည့် ကားများကို လမ်းတွင် စစ်တပ်က ပစ်ခတ်ရာ ကျည်ဆန်ထိမှန် ဒဏ်ရာရသူများ ရှိသဖြင့် ဝိုင်းမော် ဆေးရုံသို့ ပို့ဆောင်ပေးခဲ့ကြောင်း ကျန်လူများ နောင်ချိန် ဘက်သို့ ဆက်သွားခဲ့ကြောင်း ဒေသခံ သတင်းရင်းမြစ်က ဆိုသည်။

ယခုဖြစ်စဥ် အသေးစိတ်ကို သျှမ်းသံတော်ဆင့် အနေဖြင့် ဆက်လက် စုံစမ်းနေဆဲ ဖြစ်သည်။

လက်ရှိ KIA နှင့် စစ်ကောင်စီတပ် တိုက်ပွဲ ပြင်းထန်နေပြီး ဝိုင်မော်မြို့၊ နောင်ချိန်ရွာနှင့် အနီးအနား ကျေးရွာများမှ ဒေသခံ ပြည်သူများ မြစ်ကြီးနားမြို့ပေါ်သို့ အလုံးအရင်းဖြင့် ထွက်ပြေး တိမ်းရှောင်နေပြီး ဘုန်းကြီးကျောင်း ဘုရားကျောင်းနှင့် ယာယီ စစ်ဘေးရှောင် စခန်းများတွင် ခိုလှုံနေရကြောင်း သိရသည်။