သျှမ်းပြည်တောင်ပိုင်း ပင်လောင်းမြို့နယ် ဆောင်းပြောင်းကျေးရွာ အနီးတွင် စစ်ကောင်စီမှ လေကြောင်းဖြင့် နေ့စဥ်ပျံ့သန်းမှုကြောင့် စစ်ရှောင်များ နေရာထပ်မံရွှေ့ပြောင်းရန် ကြိုးစားနေကြကြောင်း စုံစမ်းသိရသည်။
ထို့ကြောင့် စစ်ရှောင်များသည် ပင်လောင်းမြို့နယ် ဆောင်းပြောင်းကျေးရွာ မှတဆင့် တောင်ကြီးမြို့ပေါ်သို့ ထပ်မံပြောင်းရွှေ့ရန် ကြိုးစားနေသော်လည်း စစ်ကောင်စီဘက်မှ ဆောင်းပြောင်း-တောင်ကြီးလမ်းကြောကို ပိတ်ထားသဖြင့် အခက်အခဲများဖြစ်နေကြောင်း ဆောင်းပြောင်းကျေးရွာမှ စစ်ရှောင် အမျိုးသမီး တစ်ဦးက သျှမ်းသံတော်ဆင့်ကိုပြောသည်။
“ အခုကျမတို့နေတဲ့နေရာက စစ်တပ်ကနေပြီး လေကြောင်းနဲ့ နေ့တိုင်းလာတယ်။ တိုက်ပွဲတော့မဖြစ်ဘူး။ ဘယ်နေ့ ဘယ်ချိန် လေကြောင်းနဲ့ပစ်မယ်ဆိုတာမသိဘူးလေ။ နောက်ပြီး ဆောင်းပြောင်း-တောင်ကြီးလမ်းကလည်း။ ပိတ်ထားတော့ ရွှေ့ပြောင်းဖို့လည်းမရ။ စားသောက်ဖို့ ကလည်း အရမ်းခက်ခဲနေပြီ” ဟု အသက် ၃၅နှစ်အရွယ်ရှိ စစ်ရှောင်အမျိုးသမီးက ဆိုသည်။
လက်ရှိမှာ တောင်ကြီး-ဆောင်းပြောင်း လမ်းကို စစ်ကောင်စီက ပိတ်ဆို့ထားပြီး စစ်ရှောင်များအတွက် စားနပ်ရိက္ခာ သယ်ယူပို့ဆောင်ဖို့အတွက် ခက်ခဲနေကြောင်း၊ ထို့အပြင် တိုက်ပွဲများ ငြိမ်းသက်နေသော်လည်း စစ်ကောင်စီမှ နေ့စဥ် လေကြောင်းပျံ့ဝဲမှုကြောင့် စစ်ရှောင်များ တိုက်ပွဲပြန်ဖြစ်လာမည်ကို စိုးရိမ်နေကြကြောင်း စစ်ဘေးရှောင်များက ပြောသည်။
“ကျမ မှာ ကလေးကလည်းရှိတော့ လေကြောင်းက နေ့တိုင်းပျံ့နေတော့ တိုက်ပွဲပြန်ဖြစ်မှာလည်းကြောက်တယ်။ နောက် ရေရှည် စားသောက်ဖို့ကခက်ခဲတယ်လေ။ လမ်းပိတ်လို့ကျမတို့ ဘယ်မှ ထွက်လို့မရဘူး” ဟု ၎င်း စစ်ရှောင်အမျိုးသမီး ထပ်လောင်းပြောသည်။
ပင်လောင်းမြို့နယ် ဆောင်းပြောင်းကျေးရွာရှိ စစ်ကောင်စီ စစ်ဆေးရေးဂိတ်သည် စစ်အာဏာသိမ်းပြီးနောက်ပိုင်း စစ်ဆေးရေး တင်းကြပ်သည့် ဂိတ်ဖြစ်သကဲ့သို့ ငွေကြေးအဆမတန်ကောက်ယူသည့် ဂိတ်တစ်ခုလည်း ဖြစ်သည်။
လက်ရှိမှာ ပင်လောင်းမြို့နယ် စစ်ရှောင်စခန်းများတွင် စစ်ရှောင်ဦးရေ ၃ သောင်းခန့်ရှိပြီး အများစုသည် သက်ကြီးရွယ်အို နှင့် ကလေးငယ် အများဆုံးဖြစ်သည်။
သျှမ်း-ကရင်နီတကြော “၁၁.၁၁ စစ်ဆင်ရေး”ကြောင့် ၂၀၂၃ နိုဝင်ဘာလ ၁၅ ရက်မှထွက်ပြေးလာပြီး၊ လက်ရှိတွင် သျှမ်းပြည် တောင်ပိုင်း ပင်လောင်း၊ ညောင်ရွှေ၊ အင်းလေးနှင့် ဆီဆိုင် ဒေသများတွင် ကရင်နီပြည်မှ အရေးပေါ် တိမ်းရှောင်လာပြီး ဘုန်းကြီးကျောင်းများနှင့် ဆွေမျိုးအိမ်များသို့ စစ်ဘေးရှောင်နေကြပြီး စားဝတ်နေရေး နှင့် အနွေးထည်များ လိုအပ်နေကြောင်း သိရသည်။
အလုပ်သင် သတင်းထောက် နန်းဆိုင်ခမ်း ရေးသားသည်။
Leave a Comments