Friday, June 14, 2024

ဆီဆိုင်မြို့တွင် ပျောက်ဆုံးသွားသည့် လူငယ် ၃ ဦး အလောင်းပြန်တွေ့

Must read

သျှမ်းပြည် ဆီဆိုင်မြို့တွင် ပစ္စည်းပြန်သယ်ယူရန် ပျောက်ဆုံးသွားသည့် လူငယ် ၃ ဦးသည် လေးလကျော်ကြာမှ အလောင်းကို ပြန်လည်တွေ့ရှိခဲ့ကြောင်း သိရသည်။

ဆီဆိုင်မြို့နယ်

အဆိုပါ လူငယ်(၃)ဦး၏ အလောင်းကို ပြီးခဲ့သည့် မေလ ၂၁ ရက်တွင် ဆီဆိုင်မြို့ နယ်မြေ (၃)၊ ဟိုခဲရပ်ကွက် အနောက်ဘက်ခြမ်း၌ တွေ့ရှိခဲ့ပြီး အလောင်များကို လက်ပြန်ကြိုးတုတ်ကာ ဦးခေါင်းပစ်သတ်ဒဏ်ရာဖြင့် သေဆုံးသွားသည့် မောင်အောင်မြတ်ကျော်၏ ဖခင်ဖြစ်သူ ဦးလှထွေးက သျှမ်းသံတော်ဆင့်ကို ပြောသည်။

“အလောင်းကိုတော့ သူ့ဦးလေးက ပြန်တွေ့တာပေါ့။ စောစောက အိမ်ဘေးနားလူတွေ အလောင်းတွေ သယ်ပေးပါဦးဆိုပြီး သွားဖော်ပေးလိုက်တာ။ အဲ့ချိန်မှာ ကျနော်ရဲ့သားမှတ်ပုံတင်၊ သူတို့ရဲ့သား မှတ်ပုံတင်၊ အဝတ်အစား၊ ဖိနပ်ကအစ ပြန်တွေ့တာ။ ပြီးမှအိမ်ကိုပြန်လာပြီးကျနော်တို့ကို လာခေါ်တာပေါ့။ အဲ့မှာဘဲ ကျနော်တို့အကုန်လုံးဝိုင်းဖော်ကျတော့ ဟုတ်တယ်။ ကျနော်ရဲ့သားရယ်၊ ကျနော်ရဲ့သူငယ်ချင်းတွေရဲ့ သားရယ် အလောင်းကိုလက်ပြန်ကြိုးတုတ်ထားပြီး အမှောက်လိုက်ပြန်တွေ့တာပဲ” ဟု ဦးလှထွေးက ပြောသည်။

လက်ပြန်ကြိုးတုတ်ပြီး ပစ်သတ်ခံရသည့် လူငယ်များမှာ အသက် ၁၉ နှစ် မောင်အောင်မြတ်ကျော်၊ အသက် ၂၀ နှစ် မောင်အောင်ပြည့်စုံနှင့် မောင်ဇာနည်သူတို့ ဖြစ်ကြသည်။

၎င်းတို့သည် ဖေဖော်ဝါရီလ ၁၄ ရက်ကတည်းက တိုက်ပွဲရှောင်နေရာ ဘန်းယဉ်ကျေးရွာမှ ဆီဆိုင်မြို့သို့ ပစ္စည်းပြန်သယ်ယူရန် ပြန်လာစဉ်ပျောက်ဆုံးသွားခဲ့ခြင်း ဖြစ်သည်။

အဆိုပါ ပစ်သတ်ခံရသည့် လူငယ် ၃ ဦးနှင့် ပတ်သက်၍ မည်သည့် လက်နက်ကိုင်တပ်ဖွဲ့များ၏ လက်ချက်ဖြစ်ကြောင်း မသိရှိသေးပေ။

“ကျနော်တို့လည်း မျက်မြင်မတွေ့တဲ့အတွက်ကြောင့် ဘယ်သူ့ကိုမှလည်း စွပ်စွဲလို့လည်းမရဘူး။ မျက်မြင်တွေ့တယ် ဆိုရင်တော့ စွပ်စွဲရင်စွပ်စွဲမှာပေါ့။ ဒါပေမဲ့ သေသွားတဲ့အလောင်းကိုတော့ ကျနော်တို့ ပြန်ရထားတဲ့အတွက် ဘယ်သူကသတ်လို့ ဘယ်သူမှလုပ်မှန်းမသိဘူး။ ကျနော်အနေနဲ့တော့ ဒါကသူ့ကံတရားအတိုင်းပဲ ပြောရမလားပဲ” ဟု ဦးလှထွေးက ပြောသည်။

သေဆုံးသွားသည့် လူငယ် ၃ ဦးအတွက် မနက်ဖြန် မေလ ၂၇ ရက်၌ ရက်လည်ဆွမ်းကျွေး အလှူအဒါန်း ပြလုပ်ပေးသွားမည်ဟု ၎င်းတို့မိသားစုဝင်များက ပြောသည်။

ဆီဆိုင်မြို့ကို စစ်ကောင်စီက ပြန်လည်ထိန်းချုပ်ပြီးသည့်နောက် မေလ ၉ ရက်နေ့တွင် ဆီဆိုင်မြို့နယ် နောင်ရင်းကျေးရွာ၏ ရွာသူကြီးဖြစ်သူ ခွန်ဇာခွန်နှင့် ၎င်းညီဖြစ်သူ ခွန်ပလွန်ကို တော်လှန်တပ်ဖွဲ့များကို ထောက်ပံ့သည်ဟု စွပ်စွဲကာ စစ်ကောင်စီနှင့် PNO တို့က သတ်ဖြတ်ခဲ့ကြောင်း PNLA က ထုတ်ပြန်ထားသည်။

Leave a Comments

- Advertisement -spot_img

Latest article