ကချင်ပြည်နယ်တွင် စစ်ရှုံးနေသည့် စစ်ကောင်စီတပ်က ယမန်နေ့ (မေလ ၂၁ ရက်) ညပိုင်းက ဝိုင်းမော်မြို့နယ်သို့ အတွဲလိုက်ဒုံးများဖြင့် ပစ်ခတ်ပြီး KIA/KIO ဌာနချုပ် တည်ရှိရာ လိုင်ဇာမြို့အနီး တိုက်လေယာဥ်ဖြင့် ဗုံးကြဲ တိုက်ခိုက်ခဲ့ရာ တရုတ်ဘက်မှ ပြန်လှန် သတိပေး ပစ်ခတ်ခဲ့သည်ဟု စစ်ရေးသတင်းရင်းမြစ်များက ပြောသည်။
ဝိုင်းမော်မြို့နယ်၊ ရွှေညောင်ပင်ရွာရှိ စစ်ကောင်စီ ခမရ (၃၂၁) တပ်ရင်းကို ယမန်နေ့ ညပိုင်းက KIA တိုက်ခိုက် သိမ်းပိုက်ပြီးနောက် မြစ်ကြီးနားမြို့ မြောက်ပိုင်းတိုင်း စစ်ဌာနချုပ် အတွင်းမှ ဝိုင်းမော်ဘက်သို့ အတွဲလိုက်ဒုံးဖြင့် အကြိမ်များစွာ ပစ်ခတ်ကာ လိုင်ဇာမြို့အနီး တောင်ကြောများပေါ် ၃ ကြိမ် ဗုံးကြဲ တိုက်ခိုက်ခဲ့သည်ဟု သတင်းရင်းမြစ်က ပြောဆိုသည်။
“မနေ့ညက ဝိုင်းမော် ရွှေညောင်ပင်ဘက် အတွဲလိုက်ဒုံးတွေနဲ့ တောက်လျှောက်ပစ်တယ်။ လိုင်ဇာနားကို ဗုံးကြဲတယ်။ လိုင်ဇာနား ဗုံးကြဲတော့ လေယာဥ်က တရုတ်ဘက် ကျော်သွားလို့ထင်တယ် တရုတ်က ပစ်ခတ် သတိပေးတာရှိတယ်။ နယ်စပ်မျဥ်း မကျော်ဖို့ မီးကျည်နဲ့ အချက်ပြ ပစ်တာလို့ ထင်ပါတယ်” ဟု ၎င်းက ရှင်းပြသည်။
စစ်ကောင်စီတပ်သည် ယမန်နေ့ ည ၉ နာရီကျော်က ဝိုင်းမော်ဘက်သို့ အတွဲလိုက်ဒုံးများဖြင့် ပစ်ခတ် တိုက်ခိုက်ခဲ့ပြီး ည ၁၁ နာရီကျော်တွင် တိုက်လေယာဥ◌်ဖြင့် လိုင်ဇာ အနီး ၃ ကြိမ် ဗုံကြဲ တိုက်ခိုက်ခဲ့သည်ဟု သိရသည်။
ယင်းတိုက်ခိုက်မှုများ အတွင်း ထိခိုက် ပျက်စီးမှု၊ သေဆုံးမှု အခြေအနေများနှင့် ပတ်သက်၍ ထပ်မံ မေးမြန်းနေဆဲ ဖြစ်သည်။
တိုက်ပွဲများကြောင့် ဝိုင်းမော်မြို့ပေါ်နှင့် ကျေးလက်ဒေသရှိ ပြည်သူများ စစ်ဘေးတိမ်းရှောင်နေပြီး ထောင်နှင့်ချီသည့် ပြည်သူများ မြစ်ကြီးနားမြို့နှင့် အနီးတဝိုက် လာရောက်ခိုလှုံနေသည်ဟု မြစ်ကြီးနားမြို့ခံ တစ်ဦးက ပြောသည်။
“မနေ့ကတည်းက ဝိုင်းမော်ဘက်ကလူတွေ ဝင်လာကြတယ်။ ညကလည်း တညလုံး ဒုံးတွေပစ်နေတာ။ အခု စစ်ဘေးရှောင်တွေ ဘုရားကျောင်းတွေမှာ ခိုလှုံနေတာရှိမယ်။ အသိမိတ်ဆွေတွေနား နေတာရှိမယ်။ တချို့လည်း ဘယ်မှာ ခိုလှုံရမလဲ မေးနေတာ တွေ့တယ်” ဟု ၄င်းက ရှင်းပြသည်။
ဝိုင်းမော်မြို့နယ်ရှိ စစ်ကောင်စီတပ်စခန်းများကို KIA ပူးပေါင်းတပ် မေလ ၁၈ ရက်နေ့က စတင် ထိုးစစ်ဆင် တိုက်ခိုက်ခဲ့ရာ ရွှေညောင်ပင် ခမရ (၃၂၁) တပ်ရင်းကို မေလ ၂၁ ရက် ညပိုင်းက သိမ်းပိုက်ခဲ့ခြင်း ဖြစ်သည်။
ဝိုင်းမော်မြို့နယ် တိုက်ပွဲများ အတွင်း စစ်ကောင်စီတပ် လက်နက်ကြီး ပစ်ခတ်မှုနှင့် ဗုံးကြဲမှုများကြောင့် ဒေသခံများ ထိခိုက်သေဆုံးမှု ရှိနေရာ ယခုရက်ပိုင်းအတွင်း ခတ်ချိုရွာမှ ပြည်သူ ၁၀ ဦးဝန်းကျင် သေဆုံးပြီး ဒဏ်ရာရရှိသူ များပြားကြောင်း သိရသည်။
