Friday, June 14, 2024

လမ်းပျောက်နေသည့် စစ်ကောင်စီ အထွေထွေရွေးကောက်ပွဲ ကျင်းပရေး ပြင်ဆင်ပြန်

Must read

နိုင်ငံတဝှမ်း စစ်ရှုံးပြီး နိုင်ငံရေးအရ လမ်းပျောက်နေသည့် စစ်ကောင်စီက လာမည့် ၂၀၂၅ ခုနှစ် အတွင်း အထွေထွေ ရွေးကောက်ပွဲ ကျင်းပနိုင်ရေး ပြင်ဆင်ရန် ညွှန်ကြားထားကြောင်း စစ်ကောင်စီ လက်အောက်ခံ နေပြည်တော် ရွေးကောက်ပွဲ ကော်မရှင်နှင့် နီးစပ်သည့် သတင်းရင်းမြစ်က ပြောသည်။

အထွေထွေ ရွေးကောက်ပွဲ အခြေခံ မဲစာရင်း ပြုစုနိုင်ရေး ယခုနှစ် အောက်တိုဘာ ၁ ရက်မှ ၁၅ ရက်ထိ တနိုင်ငံလုံး အတိုင်းအတာဖြင့် သန်းခေါင်စာရင်း ကောက်ယူမည်ဖြစ်ပြီး ရွေးကောက်ပွဲ အောင်မြင်ရေး တရုတ်၊ အိန္ဒိယနှင့် အာဆီယံ တို့က အကူအညီပေးရန် ကမ်းလှမ်းမှုများ ရှိနေကြောင်း ၄င်းကဆိုသည်။

“အခုနှစ်ကုန်ပိုင်း သန်းခေါင်စာရင်း ကောက်မယ်။ ဒီစာရင်းအပေါ် အခြေခံပြီး မဲစာရင်းပြုစုမှာပါ။ လာမယ့် ၂၀၂၅ ခုနှစ်၊ နိုဝင်ဘာမှာ လုပ်မယ်လို့ လျာထားပါတယ်။ ၅ နှစ် တကြိမ် ရွေးကောက်ပွဲ ကွင်းဆက် မပြတ်အောင်ပေါ့။ ဘယ်နှစ်မြို့နယ် လုပ်နိုင်မယ်၊ မဲဘယ်လိုပေးမယ် စသဖြင့်ပေါ့ ပြောဖို့ ခက်ပါသေးတယ်” ဟု သတင်းရင်းမြစ်က ရှင်းပြသည်။

ပြီးခဲ့သည့် သီတင်းပတ် အတွင်း အာဆီယံ အလှည့်ကျ ဥက္ကဋ္ဌ၏ မြန်မာနိုင်ငံဆိုင်ရာ အထူးကိုယ်စားလှယ် H.E. Mr Alounkeo Kittikhoun ၊ အာဆီယံ အတွင်းရေးမှူးချုပ် Dr Kao Kim Hourn တို့နှင့် စစ်ခေါင်းဆောင် မင်းအောင်လှိုင် တွေ့ဆုံခဲ့ပြီး ယင်းမတိုင်မီ ကမ္ဘောဒီးယား ဝန်ကြီးချုပ်ဟောင်း ဟွန်ဆန်နှင့် နေပြည်တော်တွင် တွေ့ဆုံခဲ့သည်။

ယင်းတွေ့ဆုံမှုများတွင် မြန်မာနိုင်ငံ အခြေအနေ ငြိမ်းချမ်းစွာ ဖြေရှင်းနိုင်ရေးနှင့် ရွေးကောက်ပွဲ ပြန်လည် ကျင်းပရေး ဆွေးနွေးခဲ့ကြောင်း စစ်ကောင်စီက ထုတ်ပြန်ထားသည်။

ယခုနှစ် အောက်တိုဘာလတွင် ပြည်လုံးကျွတ် သန်းခေါင်စာရင်း ကောက်မည်ဟုဖြစ်၍ ကြိုတင်ပြင်ဆင်ထားရန် မေလ ဒုတိယ အပတ် အတွင်းက ရန်ကုန်မြို့သို့ လာရောက်ခဲ့သည့် ဒုတိယစစ်ခေါင်းဆောင် စိုးဝင်း ကလည်း ရန်ကုန်တိုင်း အစိုးရအဖွဲ့ကို အမိန့်ပေးထားသည်။

၂၀၂၅ ခုနှစ် အထွေထွေရွေးကောက်ပွဲ ကျင်းပမည် ဆိုသည့် ကိစ္စနှင့် ပတ်သက်၍ စစ်ကောင်စီထံ ပြန်လည် မှတ်ပုံတင်ထားသည့် နိုင်ငံရေးပါတီ တစ်ခုမှ အမည်ဖော်ပြလိုခြင်း မရှိသည့် တာဝန်ရှိသူ တစ်ဦးက “သတင်းတော့ ကြားတယ်။ ကော်မရှင်က တရားဝင် အကြောင်းကြားတာမျိုးတော့ မရှိသေးပါဘူး။ အခုနှစ်ကုန်ပိုင်းလောက် တရားဝင် ကြေညာမယ်လို့တော့ မှန်းတယ်ပေါ့။ ခုအခြေအနေက ဒီကြားထဲလည်း အပြောင်းအလဲ တခုခု ဖြစ်သွားနိုင်တယ်လေ” ဟုမှတ်ချက်ပြုသည်။

၂၀၂၁ ခုနှစ်၊ ဇန်နဝါရီလ ၁ ရက်နေ့တွင် အာဏာသိမ်းပြီးနောက် စစ်ကောင်စီ အနေဖြင့် ဒီမိုကရေစီ ခိုင်မာရေး ရွေးကောက်ပွဲ အမြန်ဆုံး ပြန်လုပ်ပေးမည်ဟု အကြိမ်ကြိမ် ပြောဆိုနေသော်လည်း ယနေ့တိုင် ရွေးကောက်ပွဲ ကျင်းပမည့် အချိန်ကာလ တိတိကျကျ ထုတ်ပြန် ကြေညာခြင်း မရှိဘဲ အတိုက်အခံများကို နှိမ်နင်းနေဆဲ ဖြစ်သည်။

၂၀၂၁ ခုနှစ် အာဏာသိမ်းမှု၏ အကျိုးဆက် အဖြစ် နိုင်ငံတဝှမ်း တော်လှန်မှုများ ကြုံတွေ့နေရပြီး နယ်မြေ အများအပြား လက်လွှတ်နေရသည့် စစ်ကောင်စီ အနေဖြင့် ရွေးကောက်ပွဲ ဆိုသည်မှာ နိုင်ငံရေး ထွက်ပေါက် အဖြစ် အသုံးချမည့် လက်နက် တစ်ခုသာ ဖြစ်သည်ဟု လေ့လာသူများက သုံးသပ်ထားသည်။

Leave a Comments

- Advertisement -spot_img

Latest article