သျှမ်းပြည်တောင်ပိုင်း ရွာငံမြို့နယ်တွင် နေထိုင်သည့် အမျိုးသားတစ်ဦးအား ပြည်သူ့ကာကွယ်ရေးတပ်ဖွဲ့ (PDF) ကို ထောက်ပံ့နေသည်ဟုဆိုပြီး စစ်ကောင်စီ၏ တပ်သားများက လာရောက်ဖမ်းဆီးသွားကြောင်း စုံစမ်းသိရှိရပါသည်။
သျှမ်းတောင်၊ ရွာငံမြို့နယ် ၊ သိမ်ကုန်းကျေးရွာ တွင်နေထိုင်သည့် အသက် ၄၀ ကျော်အရွယ် ကိုဖိုးသားဆိုသူကို စစ်ကောင်စီတပ်ဖွဲ့များက မေလ ၁၈ ရက်တွင် နေအိမ်၌ လာရောက်ဖမ်းဆီးသွားပြီး ယနေ့အချိန်ထိ မိသားစုဝင်များနှင့် တွေ့ခွင့် မရသေးကြောင်း ဖြစ်စဥ်ကို သိရှိသည့် ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
“ သူ့ကို ညနေဖက်မှာ လာဖမ်းသွားတာ။ စစ်ကားနှစ်စီး နဲ့လာဖမ်းတာ။ PDF ကို ထောက်ပံ့နေတယ်ဆိုပြီး လာဖမ်းတယ်။ မိုင်တဲလ် တာဝါတိုင်မှာ အသံဖမ်းစက် တပ်ထားတယ်။ ရုတ်ရုတ် မလုပ်နဲ့လို့လည်း ခြိမ်းခြောက်ပြောသွားတယ်။” ဟု ၎င်းအမျိုးသမီးက ဆိုသည်။
ကိုဖိုးသားကို လာရောက်ဖမ်းဆီးချိန်တွင် စစ်ကောင်စီတပ်သားများသည် အိမ်စီးကား တစ်စီ၊ စစ်ကားဖြင့် တစ်စီးနှင့်အတူ စစ်ယူနီဖောင်းဝတ်ဆင်ထားသူ (၁၀)ဦးနှင့် အရပ်ဝတ် (၃)ဦး ပါဝင်ကြောင်း အထက်ပါ အမျိုးသမီးက ထပ်လောင်းပြောသည်။
ဖမ်းဆီးခံရသည့် ကိုဖိုးသားနှင့် လက်ရှိအချိန်ထိ အဆက်အသွယ် မရသေးသဖြင့် စစ်ကြောရေးတွင် အနှိပ်စက်ခံနေရမည်ကို မိသားစုဝင်များက စိုးရိမ်နေကြောင်း ကိုဖိုးသား၏ မိသားစုဝင် တစ်ဦးက သျှမ်းသံတော်ဆင့်ကိုပြောသည်။
“ စစ်တပ်က အရမ်းယုတ်မာတာ။ စစ်ကြောရေးမှာဆို ဘယ်လောက် နှိပ်စက်ခံနေရမလဲ မသိဘူး။ အရင်က ရွာမှာ ဖမ်းခံရတဲ့ သူတွေတုန်းကလည်း သုံးလ ကြာမှ သူတို့ ရိုက်နှက် နှိပ်စက်ပြီးမှ တွေ့ခွင့် ရကြတာ။ စိတ်ပူတယ်။ သူတို့ တမင်စွတ်စွဲပြီး လာဖမ်းကြတာ။” ဟု ၎င်း မိသားစုဝင် တစ်ဦးက ဆိုသည်။
ရွာငံမြို့နယ် သိမ်ကုန်းကျေးရွာ ဒေသခံများသည် မိုင်တဲလ် ဆင်းကတ်ကိုသာ အဓိက သုံးနေရကြောင်း၊ ထိုဒေသတွင် မိုင်းတဲလ်ဆင်းကတ်သာ အင်တာနက်လိုင်းမိသည်။
ထို့ကြောင့် စစ်ကောင်စီသည် မိုင်တဲလ် ကို ကြားဖြတ်အသံခိုးနားထောင်ပြီး PDF နှင့် အဆက်အသွယ်ရှိသူများကို ထိုမှတဆင့် ခြေရာခံကာဖမ်းဆီးနေကြောင်း ဒေသခံများထံမှ သိရသည်။
ယခုနှစ် မေလ ၁၆ ရက်တွင်လည်း သိမ်ကုန်းကျေးရွာမှ ကျေးရွာ ဥက္ကဌ အပါအဝင် အမျိုးသား ၃ ဦးနှင့် အမျိုးသမီး တစ်ဦးကို စစ်ကောင်စီမှ လာရောက် ဖမ်းဆီးသွားခဲ့ပြီး ယနေ့အချိန်ထိ မိသားစုဝင်များနှင့် အဆက်အသွယ် လုပ်ခွင့် မရသေးကြောင်း သိရသည်။
အလုပ်သင်သတင်းထောက် နန်းလရောင် ရေးသားသည်။
Leave a Comments