Sunday, July 14, 2024

မိုးမောက် စစ်ကောင်စီတပ် လေကြောင်းဗုံးကြဲမှုကြောင့် ဈေးနှင့်နေအိမ်တစ်ရာကျော် မီးလောင်၊ ခလရ-၄၃၇ ကို KIA တိုက်နေဆဲ

Must read

ကချင်ပြည်နယ် မိုးမောက်မြို့တွင် စစ်ကောင်စီတပ်၏ လေကြောင်းဗုံးကြဲ တိုက်ခိုက်မှုကြောင့် ဈေးနှင့် ပြည်သူနေအိမ် တစ်ရာကျော် မီးလောင်ပျက်စီးခဲ့ကြောင်း စုံစမ်းသိရသည်။

မေလ (၇) ရက်မှ စတင်ပြီး ယနေ့ (၂၀) ရက်နေ့အထိ မိုးမောက်မြို့ပေါ်ရှိ စစ်ကောင်စီတပ်နှင့် ကချင်လွတ်လပ်ရေးတပ် KIA တို့၏ နှစ်ဘက်တိုက်ပွဲအတွင်း စစ်ကောင်စီတပ်၏ လေကြောင်းဗုံးကြဲ တိုက်ခိုက်မှုများကြောင့် မိုးမောက်ဈေးနှင့် ပြည်သူနေအိမ် ၁၀၀ ကျော် မီးလောင်ပျက်စီးခဲ့ကြောင်း မိုးမောက်ဒေသခံများက ပြောသည်။

“၁၆ ရက်နေ့က စစ်ကောင်စီတပ် လေယာဉ်နဲ့ ဗုံးလာကြဲလို့ မိုးမောက်ဈေး မီးလောင်သွားတယ်။ လက်နက်ကြီး ကျတာကောဆိုရင် လူနေအိမ်လည်း ၁၀၀ လုံးကျော် ပါသွားတယ်။ စစ်ဘေးရှောင်တွေကတော့ နမ့်တိန်ဘက်က ဘုန်းကြီးကျောင်းကို ရှောင်ကြတာရှိတယ်။ အခြေအနေတွေကလည်း တော်တော်လေး ရှုပ်နေတယ်”ဟု မိုးမောက်ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

မိုးမောက်မြို့ပေါ်တွင် စစ်ကောင်စီတပ်မှ ရမ်းသမ်းပစ်ခတ်သည့် လက်နက်ကြီးနှင့် မီးလောင်ဗုံးများကြောင့်လည်း ခမရ-၄၃၇ အနီးရှိ မံပုံကျေးရွာနှင့် မိုးမောက်-လွယ်ဂျယ် လမ်းမကြီးဘက်မှ ပြည်သူနေအိမ် အများစု မီးလောင်ပျက်စီးသွားပြီး စစ်ဘေးရှောင် ထောင်နှင့်ချီ ဘေးလွတ်ရာသို့ ထွက်ပြေးတိမ်းရှောင်နေရကြောင်း မိုးမောက်မြို့ ဒေသခံများထံမှ သိရသည်။

“တိုက်ပွဲဖြစ်တာက မံစီ၊ ဝိန်းခမ်း၊ မိုးမောက်၊ ဟန်ထက် ဒီဘက်က သျှမ်းရွာတွေမှာ ဖြစ်တာ။ ရွာသားတွေကတော့ တရုတ်နယ်စပ်ခြံစည်းရိုးနား စစ်ဘေးရှောင်ရတာရှိတယ်၊ နမ့်တိန်ရွာဘက်က ဘုန်းကြီးကျောင်းတွေနဲ့ ဗန်းမော်၊ မြစ်ကြီးနားဘက်ကို ရှောင်ကြတာလည်း ရှိတယ်။ စားဖို့သောက်ဖို့ကတော့ ခက်ခဲနေကြတာပေါ့”ဟု မိုးမောက်ဒေသခံ ၎င်းအမျိုးသားက သျှမ်းသံတော်ဆင့်ကို ဆက်ပြောသည်။

ထိုအပြင် မိုးမောက်မြို့ အပြင်ဘက်ရှိ စစ်ကောင်စီတပ်၏ နောက်ဆုံးခံတပ်ဖြစ်သည့် ခလရ-၄၃၇ တပ်ရင်းကို KIA နှင့် PDF ပူးပေါင်းတပ်ဖွဲ့တို့က ဆက်လက်တိုက်ခိုက်နေပြီး တိုက်ပွဲပြင်းထန်နေကြောင်း မိုးမောက်ဒေသခံများက ပြောဆိုသည်။

“၄၃၇ စခန်းကို တိုက်လည်း ကျတော်တို့ တိုက်ပါတယ်။ ဒါပေမယ့် အခုထက်ထိ သိမ်းပိုက်နိုင်တဲ့ အနေအထားကတော့ မရှိသေးပါဘူး”ဟု မိုးမောက်မြို့ တိုက်ပွဲအခြေအနေနှင့် ပတ်သက်ပြီး KIA ပြောရေးဆိုခွင့်ရှိသူ ဗိုလ်မှူးကြီးနော်ဘူက သျှမ်းသံတော်ဆင့်ကို ပြောသည်။

အလားတူ မံစီမြို့နယ်တွင်လည်း စစ်ကောင်စီတပ် ခြေမြန်တပ်ရင်း ခမရ-၃၁၉ နှင့် ခမရ-၆၀၁ တပ်ရင်းတို့ကိုလည်း KIA တပ်ဖွဲ့က ထိုးစစ်ဆင် တိုက်ခိုက်နေပြီး စစ်ကောင်စီတပ်ဘက်က ထိခိုက်ကျဆုံးမှု များပြားကြောင်း ဒေသခံများက ပြောသည်။

ကချင်ပြည်နယ်အတွင်း စတင်ခဲ့သည့် KIA ၏ မတ်လ ၇ ရက်နေ့ ထိုးစစ်မှ ယနေ့အထိ စစ်ကောင်စီ တပ်စခန်း ၁၀၀ ဝန်းကျင်ကို သိမ်းပိုက်ထားပြီး မံစီနှင့် မိုးမောက်မြို့များ အလုံးစုံ သိမ်းပိုက်နိုင်ရေး ထိုးစစ်ဆင်နေဆဲ ဖြစ်သည်။

Leave a Comments

- Advertisement -spot_img

Latest article