ကချင်ပြည်နယ်၊ ဝိုင်းမော်မြို့နယ်၊ ရွှေညောင်ပင်ကျေးရွာရှိ စစ်ကောင်စီတပ် ခလရ (၃၂၁) ကို ကချင်လွတ်လပ်ရေး တပ်မတော် (KIA) ပူးပေါင်းတပ်များ ထိုးစစ်ဆင် တိုက်ခိုက်နေပြီး တိုက်ပွဲ အတွင်း စစ်ကောင်စီ တိုက်လေယာဉ် တစ်စီးကို ပစ်ချလိုက်ကြောင်း စစ်ရေးသတင်းရင်းမြစ်က ယမန်နေ့ (မေလ ၁၈ ရက်)တွင် ပြောသည်။
ရွှေညောင်ပင်ကျေးရွာ၊ ခလရ (၃၂၁) တပ်စခန်းကို ယနေ့ မနက် ၄ နာရီခန့်က KIA ပူးပေါင်းတပ်များ ဝင်ရောက်တိုက်ခိုက်နေရာ တိုက်ပွဲ ပြင်းထန်နေပြီး မနက် ၁၀ နာရီ ဝန်းကျင်တွင် ဗုံးလာကြဲသည့် စစ်ဂျက်လေယာဉ် တစ်စီးကို ပစ်ချနိုင်ခဲ့သည်ဟု သတင်းရင်းမြစ်က ဆိုသည်။
“လေယာဉ် ပစ်ချတာက ရှေ့တန်းကကော၊ ဒေသခံတွေကော ပြောတယ်။ လေယာဥ် အမျိုးအစားနဲ့ ဖြစ်တဲ့ဟာ အသေးစိတ်တော့ မသိရသေးဘူး။ KIA က တရားဝင် ထုတ်ပြန်တာတော့ မရှိသေးဘူး” ဟု ၎င်းက ရှင်းပြသည်။
ယခု ဖြစ်စဥ်နှင့် ပတ်သက်၍ အသေးစိတ် သိရှိနိုင်ရန် သျှမ်းသံတော်ဆင့် အနေဖြင့် စုံစမ်းနေဆဲ ဖြစ်သည်။
လက်ရှိ ရွှေညောင်ပင် ခလရ (၃၂၁) စခန်းသိမ်း တိုက်ပွဲ ပြင်းထန်နေဆဲ ဖြစ်ပြီး ရွှေညောင်ပင်၊ ကဇူး၊ ဂါးရာယန်၊ အောင်မြေ (၁)၊ အောင်မြေ (၂)၊ ဒိန်ဂါ စသည့် နေရာများတွင် တိုက်ပွဲ ပြင်းထန်နေသည်ဟု ဒေသခံ သတင်းရင်းမြစ်များက ဆိုသည်။
ယနေ့ မနက် ၁၁ နာရီနာရီတွင်မူ ဝိုင်းမော်မြို့နယ်၊ မြစ်ကြီးနား-ဗန်းမော်လမ်း၊ ကဇူးကျေးရွာရှိ စစ်ကောင်စီတပ် အထိုင် တပ်စခန်းကို KIA ပူးပေါင်းတပ်များ သိမ်းပိုက်ရရှိထားသည်ဟု စစ်ရေးသတင်းရင်းမြစ်က ပြောသည်။
ကချင်ပြည်နယ် အတွင်း စတင်ခဲ့သည့် KIA ၏ မတ်လ ၇ ရက်နေ့ ထိုးစစ်မှ ယနေ့အထိ စစ်ကောင်စီ တပ်စခန်း ၁၀၀ ဝန်းကျင်ကို သိမ်းပိုက်ထားပြီး မံစီနှင့် မိုးမောက်မြို့ အလုံးစုံ သိမ်းပိုက်နိုင်ရေး ထိုးစစ်ဆင်နေဆဲ ဖြစ်သည်။
