သျှမ်းပြည်တောင်ပိုင်း ဆီဆိုင်မြို့နယ်၊တောတောင်ဖက်ရှောင်နေရသော စစ်ရှောင်များသည် ဆေးဝါး၊စားနပ်ရိက္ခာများလိုအပ်လျက်ရှိကြောင်း သိရသည်။
သျှမ်းတောင်တွင် ဒေသခံစစ်ရှောင် ၇သောင်းကျော်နှင့် ကရင်နီစစ်ရှောင်၃သောင်းကျော် စုစုပေါင်းစစ်ဘေးရှောင် ၁သိန်းကျော်ရှိပြီး စစ်ရှောင်အများစု သည် တောထဲ၊တောင်ထဲသာ ရှောင်နေရကြောင်း သိရသည်။
“အရင်ကက္ကူဖက်၊ဟိုပုံးမြို့ဖက် ရှောင်ပေမယ့်် PNO တွေ အိမ်ပြန်ခိုင်းတယ်။တိုက်ပွဲဖြစ်နေသေးတော့ အိမ်လည်း မပြန်ရဲဘူး သူတို့ကိုလည်း ကြောက်တော့ တောဘက်ပဲပြန်နေကြတာ” ဟု ဆီဆိုင်မြို့စစ်ရှောင်အမျိုးသမီးတစ်ဦးကသျှမ်းသံတော်ဆင့်ကိုပြောသည်။
စစ်ရှောင်အများစုသည် ဆေးဆိုင်၊ဆေးရုံ၊ဆေးခန်းမရှိသည့်တောဘက်သာ ရှောင်ရနေရခြင်းကြောင့် ကျန်မာရေးစောင့်ရှောက်မှုမရသည့်အပြင် စားနပ်ရိက္ခာများ အကူအညီရရှိနိုင်ရန်လည်း အခက်ခဲများစွာရှိကြောင်း သိရသည်။
“တောထဲရှောင်သူတွေက ကျန်းမာရေးကူညီစောင့်ရှောက်မှု လုံးလုံးမရရှိနေတာကို သွားတွေ့ရတယ်။ မိုးလုံလေလုံ အခင်းအကျင်းတောင် မရှိနေတာကို သွားတွေ့ရတယ်။ မိုးရာသီရောက်လာတော့မယ်ဆိုတော့ အခက်ခဲများစွာရင်ဆိုင်ကြရတော့မယ်ဖြစ်ပါတယ်။ တောထဲရှောင်သူများသည် စားနပ်ရိက္ခာအကူညီရရှိရန်အတွက် အတော်ခက်ခဲကြပါတယ်။ “ဟု ပအိုဝ်းလူငယ်အစည်းအရုံးPYOမှ တာဝန်ရှိသူမနန်းက သျှမ်းသံတော်ဆင့်ကိုပြောသည်။
ထို့အပြင် စစ်ရှောင်ရင်းကောင်းမွန်စွာဆေးကုသခွင့် မရခြင်းနှင့် ကျန်းမာရေးစောင့်ရှောက်မှု မရခြင်းတို့ကြောင့် မွေးကင်စ ကလေးငယ်၃ဦးလည်း သေဆုံးခဲ့ရကြောင်း ၄င်းကဆက်ပြောသည်။
သျှမ်းတောင် တိုက်ပွဲဖြစ်ပွားသည့် ၁၁၂ရက်အတွင်းတွင် အရပ်သား၆၉ဦး သေဆုံးခဲ့ရပြီး၊၉၂ဦးဒဏ်ရာရရှိခဲ့ကြောင်း ပအိုဝ်းလူငယ်အစည်းအရုံးPYOထုတ်ပြန်ချက်အရသိရသည်။
Leave a Comments