သမဝါယမဘဏ် လိမိတက် (CB ဘဏ်) ဥက္ကဋ္ဌ ဦးခင်မောင်အေး ကို စစ်ကောင်စီက ဖမ်းဆီးထားကြောင်း နေပြည်တော် သတင်းရင်းမြစ်က ယနေ့ (မေလ ၁၀ ရက်) တွင် ပြောသည်။
နာမည်ကျော် ခရိုနီဖြစ်သူ ဦးခင်မောင်အေး ကို ယခုရက်ပိုင်း အတွင်းက ဖမ်းဆီးပြီး နေပြည်တော်တွင် စစ်ဆေးနေကြောင်း၊ မည်သည့် ကိစ္စဖြင့် ဖမ်းဆီးသည်ကိုမူ မသိရှိရသေးကြောင်း ၎င်းကဆိုသည်။
“ကျားဖြန့်ငွေလိမ်ဂိုဏ်းတွေနဲ့ ပတ်သက်ပြီး စစ်ဆေးနေတယ်လို့တော့ ကြားတယ်။ အဲဒီကိစ္စလား တခြား ကိစ္စလားတော့ သေချာမသိရသေးဘူး။ ဒီနေ့ သောကြာနေ့မှာ ပြန်လွတ်နိုင်တယ်။ မလွတ်ရင်တော့ အမှုဖွင့်ခံရနိုင်တယ်” ဟု သတင်းရင်းမြစ်က ရှင်းပြသည်။
မင်းအောင်လှိုင် အပါအဝင် စစ်ဗိုလ်ချုပ်များနှင့် ရင်းနှီးသည့် ဦးခင်မောင်အေး ၏ ပိုင်ဆိုင်မှုများအား စာရင်း ပြုစုရန် စစ်ကောင်စီက အမိန့်ပေးထားကြောင်း တခြားသတင်းရင်းမြစ်က ဆိုသည်။
“သူ့ပိုင်ဆိုင်မှုတွေက အများကြီး၊ တနိုင်ငံလုံးမှာ သူ့နာမည်ပေါက် အိမ်ခြံမြေတွေ မနည်းဘူး။ ပိုင်ဆိုင်မှုအားလုံး စာရင်းလုပ်ခိုင်းထားတယ်။ ဘာကြောင့် လုပ်ခိုင်းတာလဲတော့ မသိရသေးဘူး” ဟု ၎င်းကဆိုသည်။
ဦးခင်မောင်အေး ဖမ်းဆီးခံရမှု နောက်ဆက်တွဲကို သျှမ်းသံတော်ဆင့် အနေဖြင့် ထပ်မံ စုံစမ်းနေဆဲ ဖြစ်သည်။
အာဏာရှင်ဟောင်း ဦးသန်းရွှေ မွေးထုတ်ခဲ့သည့် ခရိုနီ ဦးခင်မောင်အေးသည် သမ္မတ ဦးသိန်းစိန် လက်ထက်တွင် သမ္မတ အကြံပေးအဖြစ် ပိုမိုချမ်းသာကြွယ်ဝလာပြီး NLD အစိုးရကိုမူ ဘက်ပေါင်းစုံမှ တိုက်ခိုက်ခဲ့ရာ မီဒီယာ တချို့အား နောက်ကွယ်မှ ထောက်ပံ့ခဲ့သူ အဖြစ် သတင်းထွက်ခဲ့ဖူးသည်။
စစ်တပ် အာဏာသိမ်းပြီးနောက် မင်းအောင်လှိုင် အမိန့်ဖြင့် မြန်မာ့ရှေ့ဆောင်ဘဏ် ဥက္ကဋ္ဌ ဧဒင်ဦးချစ်ခိုင်၊ ဇေကမ္ဘာ ဦးခင်ရွှေနှင့် သားဖြစ်သူ ဦးဇေသီဟ၊ မြန်မာသူရကျောက်စိမ်း ကုမ္ပဏီပိုင်ရှင် ဦးကျော်သူရ စသည့် နာမည်ကျော် လုပ်ငန်းရှင်များ ဖမ်းဆီးထောင်ချ ခံထားရသည်မှာ ယနေ့တိုင်ဖြစ်သည်။
