သျှမ်းပြည် ဆီဆိုင်မြို့နယ် နောင်ကျောကျေးရွာအုပ်စု ရေဖြူကျေးရွာ (ထီဗွာကျေးရွာ) မှ ကိုယ်ဝန်သည် အမျိုးသမီး ၁ ဦးအပါအဝင် ဒေသခံ ၉ ဦးကို ဖမ်းဆီးထားခြင်းမရှိဟု စစ်ကောင်စီလိမ်လည်ဝါဒဖြန့် နေသည်။

စစ်ကောင်စီတပ်၏ တပ်မတော်ကာကွယ်ရေးဦးစီးချုပ်ရုံး (CINCDS) မှ “တရားမဝင်ပြည်ဖျက် မီဒီယာများက လုံခြုံရေးတပ်ဖွဲ့ဝင်များအပေါ် ပြည်သူများအထင်အမြင်လွဲမှားစေရန်နှင့် ဂုဏ်သိက္ခာ ကျဆင်းစေရန်အတွက် လုပ်ကြံရေးထားခြင်းသာဖြစ်ပြီး ထီဗွာကျေးရွာမှ ဒေသခံပြည်သူများကို ဖမ်းဆီးထားခြင်းမရှိကြောင်း” ဟု ဆိုကာ ဖြန့်ချိထားသည်။

မူရင်းလင့် – https://shorturl.at/BGR24

အလားတူ စစ်ကောင်စီလက်အောက်ခံ MRTV အပါအဝင် ဝါဒဖြန့်တယ်လီဂရမ်ချယ်နယ်ပေါင်း ၆ ခုက အဆိုပါလိမ်လည်ဝါဒဖြန့် သတင်းမှားကို ထပ်မံဖြန့်ချိထားလျက်ရှိသည်။

Subscribe ပြုလုပ်သူ ငါးသောင်းကျော်ရှိသည့် Snow Queen အမည်နှင့် တယ်လီဂရမ်ချန်နယ်က ထိုသတင်းမှားကိုထပ်မံဖြန့်ချိခဲ့ရာမှာ ကြည့်ရှု့သူပေါင်း ၈ ထောင်ကျော်ရှိသည်။

မူရင်းလင့် – https://archive.ph/sh01g

သျှမ်းသံတော်ဆင့် အချက်အလက်စစ်ဆေးသူများအနေဖြင့် အဆိုပါအကြောင်းအရာကို စစ်ဆေးမှုပြုလုပ်ခဲ့သည်။

မေလ ၆ ရက်နေ့တွင် စစ်ကောင်စီတပ်ဖွဲ့သည် ဆီဆိုင်မြို့နယ် ရေဖြူကျေးရွာ (ထီဗွာကျေးရွာ) သို့ စစ်ကြောင်းထိုးဝင်ရောက်လာစဉ် ကိုယ်ဝန်သည် အမျိုးသမီး ၁ ဦးအပါအဝင် ဒေသခံပြည်သူ ၉ ဦးကို ဖမ်းဆီးခေါ်ဆောင်သွားကြောင်း ရေဖြူကျေးရွာဒေသခံတစ်ဦးက သျှမ်းသံတော်ဆင့်ကို ပြောပါသည်။

“ဟုတ်တယ်။ ဖမ်းခံရတာတော့ ၉ ယောက်ရှိတယ်။ အဲ့ထဲမှာ ကယန်းလူမျိုးပါတယ်။ ကယားလူမျိုးပါတယ်။ ကျနော်ထင်တာတော့ ပုဒ်မ ၁၇ (၁) ပုံစံနဲ့ပဲ ဖမ်းသွားတာပဲထင်တယ်။ မတရားအသင်းအဖွဲ့ဝင်တွေကို ကူညီတယ် ဘာညာစွပ်စွဲပြီးတော့ ဖမ်းသွားတာပေါ့” ဟု ၎င်းကပြောသည်။

ထို့အပြင် ဈေးသုံးပြီး ရေဖြူရွာသို့ပြန်လာသည့် အသက် ၃၇ နှစ်အရွယ် အမျိုးသားတစ်ဦးကိုလည်း စစ်ကောင်စီတပ်ဖွဲ့က သေနတ်ဖြင့် ပစ်ခတ်ခဲ့၍ ဒဏ်ရာရရှိခဲ့ကြောင်း ဆိုသည်။

ယုံကြည်စိတ်ချရသည့် သတင်းဌာနာများတွင်လည်း စစ်ကောင်စီက ရေဖြူကျေးရွာ (ထီဗွာကျေးရွာ)သို့ စစ်ကြောင်းထိုးလာစဉ် ဒေသခံများကြောက်ရွံ့ကာ စစ်ဘေးရှောင်ရန်ပြင်ဆင်နေသည့် ဒေသခံများကို ဖမ်းဆီးထားကြောင်း၊ ယနေ့အချိန်ထိ ပြန်လည်လွတ်မြောက်လာခြင်းမရှိသေးကြောင်း PNLA ၏ပြောရေးဆိုခွင့်ရှိသူတစ်ဦးကို ကိုးကား၍ ဖယ်ဒရယ် FM သတင်းတစ်ပုဒ်တွင် ဖော်ပြထားသည်။

မူရင်းလင့် – https://shorturl.at/cjlRT

ဒေသအတွင်း သတင်းဌာနတစ်ခုဖြစ်သည့် The People’s Voice – ခမ်းသားငေါဝ်းကလည်း ထိုကဲ့သို့ ရေးသားဖော်ပြထားသည်။

မူရင်းလင့် – https://shorturl.at/fENQ0

ထို့ကြောင့် အထက်ပါ အချက်အလက်များနှင့် တိုက်ဆိုင်စစ်ဆေးသည့်အခါမှာ ဆီဆိုင်မြို့နယ် ရေဖြူကျေးရွာ (ထီဗွာကျေးရွာ)မှ ကိုယ်ဝန်သည် အမျိုးသမီး ၁ ဦးအပါအဝင် ဒေသခံပြည်သူ ၉ ဦးကို ဖမ်းဆီးထားခြင်းမရှိဟု စစ်ကောင်စီကလိမ်လည်ဝါဒဖြန့်နေခြင်း ဖြစ်သည်။

ပြီးခဲ့သည့် မေလ ၆ ရက်တွင်လည်း စစ်ကောင်စီတပ်၏ တပ်မတော်ကာကွယ်ရေးဦးစီးချုပ်ရုံး (CINCDS) မှ ဆီဆိုင်မြို့နယ် ဝိန်းကောင်တံတားကို KNDF နှင့် PDF တို့ကမိုင်းခွဲဖျက်ဆီးခဲ့ဟု သတင်းမှားဖြန့်ချိခဲ့သည်။

ထိုသတင်းမှားကို သျှမ်းသံတော်ဆင့်မှ စီစစ်ခဲ့သည်။ မူရင်းလင့် – https://shorturl.at/juBFN

သျှမ်းသံတော်ဆင့် စာဖတ်ပရိတ်သတ်များအနေဖြင့် လူမှုကွန်ရက် စာမျက်နှာများတွင် ဖော်ပြနေသည့် သတင်းများကို ချက်ချင်းမယုံကြည်ဘဲ စိတ်ချရသော သတင်းမီဒီများသို့ သွားရောက်ဖတ်ရှု့ကြရန် တိုက်တွန်းပါသည်။

သတင်းတု၊ သတင်းမှားဟု ယူဆရသည့် သတင်းများကိုလည်း သျှမ်းသံတော်ဆင့် လူမှုကွန်ရက်စာမျက်နှာ (SHAN Burmese Vision ) Facebook Chat Boxမှဆစ်ဆင့် သတင်း၏ လင့်ခ် (သို့မဟုတ်) Screen Short ပုံပေးပို့ခြင်းဖြင့် စစ်ဆေးနိုင်သည်။