သျှမ်းပြည်တောင်ပိုင်း၊ ဆီဆိုင်မြို့နယ်၊ ဆိုက်ခေါင်စံပြကျေးရွာ၊တောင်ကျောင်းကြီးဘုန်းကြီးကျောင်းတွင်ရောက်ရှိနေသော စစ်ရှောင်များအတွက် စားနပ်ရိက္ခာများ အရေးပေါ်လိုအပ်လျက်ရှိကြောင်း သိရသည်။
တောင်ကျောင်းကြီးတွင် ရှိရင်း စစ်ရှောင် တစ်ထောင်နီးပါးရှိပြီး ယခု မေလ၇ရက် တွင် ထပ်မံပြီး ၂ထောင်ကျော် အသစ်ထပ်မံရောက်လာသဖြင့် စားနပ်ရိက္ခာများ အရေးပေါ်လိုအပ်လျက်ရှိကြောင်း သိရသည်။
“ဘုန်းကြီးကျောင်းမှာနေတယ်။အလှူရှင်လည်း တစ်နေ့ရှိ တစ်နေ့မရှိပါဘဲ။ခုလည်း ရုတ်တရက် များလာတော့ စားနပ်ရက္ခာ အရေးပေါ်လိုတယ်၊ရေနဲ့ ဆေးဝါးလည်းလိုအပ်တယ်”ဟု ဒေသခံအမျိုးသားတစ်ဦးက သျှမ်းသံတော်ဆင့်ကိုပြောသည်။
ယင်းစစ်ဘေးရှောင်များသည် ဆီဆိုင်မြို့ အရှေ့ဘက် ကျေးရွာမှ ဒေသခံများဖြစ်ပြီး ကလေးငယ်များ၊သက်ကြီးရွယ်အိုများ၊အမျိုးသမီးများ အများစုပါဝင်ကြောင်း သိရသည်။
“တိုက်ပွဲ ပြန်ဖြစ်မယ်ပြောလို့ ထွက်ပြေးကြတာ။ဆီဆိုင်မြို့အရှေ့ဖက် နောင်ထောဝ်၊ကန်တော်လေး၊နောင်ရင်း၊မီရဲ့ဖက် အကုန်လုံး ရှောင်ကြတယ်”ဟု ၄င်းကဆက်ပြောသည်။
သျှမ်းပြည် တောင်ပိုင်းတိုက်ပွဲဖြစ်ပွားသည့်၁၀၅ရက်အတွင်းတွင် အရပ်သား၇၂၀၀၀နှင့်အထက် အိုးအိမ်စွန့်ခွာ စစ်ဘေးတိမ်းရှောင်နေသေးကြောင်းသိရသည်။
Leave a Comments