သျှမ်းပြည် မိုးမိတ်မြို့နယ်တွင် စစ်ကောင်စီတပ်စခန်း အနီးရှိ လယ်ယာများထဲတွင် မြေမြုပ်မိုင်းများ ရှိနေသဖြင့် ပြည်သူများ မသွားရဲကြောင်း စုံစမ်းသိရသည်။
မိုးမိတ်မြို့နယ်ရှိ ခေးနှင်းကျေးရွာ၊တိုးပင်ကျေးရွာတို့တွင် မေလပထမပတ်မှ စ၍ လယ်ယာသွား၍ ရေမြှောင်ရှင်းခြင်းနှင့် သန့်ရှင်းရေးလုပ်ကာ စိုက်ပျိုးရေးလုပ်ရန်လိုအပ်နေသည့် ပြည်သူများသည် စစ်ကောင်စီ၏ မြေမြုပ်မိုင်းများကြောင့် မသွားရဲကြောင်း မိုးမိတ်မြို့ အသက် ၃၀ ဝန်းကျင် ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
“စစ်ကောင်စီတွေက သူတို့ တပ်စခန်းအနီးတဝိုက်မှာရှိတဲ့ လယ်တွေထဲမှာ မြေမြုပ်မိုင်းတွေ ထောင်ထားတယ်။ အခုက ကျနော်တို့ရွာသားတွေက မြှောင်းရှင်းဖို့ အဲ့ရေးတွေကို လယ်ထဲထည့်ဖို့လုပ်လို့မရဘူး။ သူတို့ကလည်း ပေးမသွားဘူး။”ဟု မိုးမိတ်မြို့ ဒေသခံ အမျိုးသားတစ်ဦးက ပြောသည်။
ထို့ပြင် မိုးမိတ်မြို့ရှိစစ်ကောင်စီမှလည်း တပ်စခန်းအနီးတွင် မသွားရန်တားမြစ်ထားပြီး၊မြေမြုပ်မိုင်များကို မည်သည့်နေရာတွင် မြုပ်ထားကြောင်း မမှတ်သည့် အပြင် ပြည်သူများနင်းမိပါက စစ်ကောင်စီဘက်မှ တာဝန်ယူမည် မဟုတ်ကြောင်းလည်း ဒေသခံ များက သျှမ်းသံတော်ဆင့်ကိုပြောသည်။
ထိုထောင်ထားသော မြေမြုပ်မိုင်းများကြောင့် ကျွဲ၊နွားနှင့် ခွေးများနင်းမိ၍ ပေါက်ကွဲမှုများ ရှိနေပြီး၊ သစ်ကိုင်းများ ကျိုးကျခြင်းကြောင့် နှစ် လုံးဆင့် သုံး လုံးဆင့် ပေါက်ကွဲမှုများရှိနေကြောင်း ဒေသခံများက ဆက်ပြောသည်။
မိုးမိတ်မြို့ရှိ နံနက်ဈေးကို နံနက် ၇ နာရီမှ ၁၀ နာရီထိပြန်ဖွင့်နေပြီးဖြစ်သော်လည်း လက်ရှိအချိန်ထိ ဖုန်းလိုင်းများလည်း မကြာခဏ ပြတ်တောက်နေကြောင်းသိရသည်။
မိုးမိတ်မြို့တွင် စစ်ကောင်စီတပ်ဖွဲ့နှင့် ကချင်လွတ်လပ်ရေးတပ်မတော် KIA၊ PDF ပူးပေါင်းတပ်ဖွဲ့တို့ အကြားတိုက်ပွဲများကြောင့် ဒေသခံနေအိမ်ထိခိုက်ပျက်စီးမှု ၅၀၀ ကျော်ထက်မနည်း ရှိကြောင်း နေရပ်ပြန်သွားသည့် ဒေသခံများက ပြောသည်။
Leave a Comments