သျှမ်းပြည် ‘ဝ’တပ်ဖွဲ့ UWSA ထိန်းချုပ်ရာ ပန်ဆန်း(ပန်ခမ်း)မြို့တွင် ကား ၃ စီးဆင့် ယာဉ်တိုက်မှု ဖြစ်ပွားခဲ့ကြောင်း စုံစမ်းသိရသည်။

ယမန်နေ့ (ဧပြီလ ၂၉ ရက်) ည ၆ နာရီခန့်တွင် ‘ဝ’တပ်ဖွဲ့ UWSA ထိန်းချုပ်ထားသည့် ပန်ဆန်း(ပန်ခမ်း)မြို့လယ်ရှိ နားလော့ရပ်ကွက်၌ ကားတစ်စီးသည် လူနာတင်ယာဉ်အား တိုက်မိပြီး ထွက်ပြေးရန် ကြိုးစားခဲ့ရာမှ အရှိန်ဖြင့် နောက်ထပ် ကား ၃ စီးဆင့် ယာဉ်တိုက်မှု ဖြစ်ပွားခဲ့ကြောင်း ပန်ဆန်းဒေသခံများက ပြောသည်။

“တိုက်တဲ့နေရာက နားလော့နားမှာဖြစ်တာ။ ကြည့်ရတာတော့ လူနာတင်ကားကို တိုက်ပြီး ထွက်ပြေးတဲ့အချိန် နောက်ထပ် ၃ စီးကို ထပ်တိုက်မိတာ။ ကားသမားကတော့ တစ်ယောက်ပဲတွေ့တယ်။ ထလို့လည်း မရတော့ဘူး ကားထဲမှာပဲ ခံနေတာ မျက်စိလည်း မဖွင့်တော့ဘူး။ ကားလည်း တော်တော်လေး ပျက်စီးသွားတယ်”ဟု ပန်ဆန်းမြို့ဒေသခံ လူငယ်အမျိုးသားတစ်ဦးက သျှမ်းသံတော်ဆင့်ကို ပြောသည်။

ယာဉ်တိုက်မှု ဖြစ်ပွားခဲ့သည့် နေရာသို့ ဒေသအာဏာပိုင်များက လာရောက်စစ်ဆေးခဲ့ပြီး ထိခိုက်ဒဏ်ရာရရှိခဲ့သည့် ၎င်းကားသမားကို ဆေးရုံသို့ ပို့ဆောင်ထားကြောင်း သိရသည်။

ပြီးခဲ့သည့် မတ်လဆန်းပိုင်းက လောက်ကိုင်မြို့သို့ စစ်ပြေးဖမ်းဆီးရန် နယ်ကျွံသွားရောက်ခဲ့သည့် ‘ဝ’တပ်ဖွဲ့မှ တပ်ခွဲမှူးအဆင့်ရှိသူတစ်ဦးလည်း လောက်ကိုင်မြို့မှ ပြန်လာစဉ် ထော်လာဂျီတစ်စီးကို ကျော်တက်နေစဉ် လမ်းပြောင်းပြန် မောင်းနှင်လာသည့် ကိုးကန့်တပ်သား၏ ကားကို မရှောင်နိုင်ဘဲ တိုက်မိခဲ့ရာ ကိုးကန့်တပ်သားများက ၎င်း‘ဝ’တပ်သားအား ဝိုင်းဝန်းရိုက်နှက်ပြီး ခြိမ်းခြောက်ခဲ့ကြောင်း သိရသည်။

ထို့နောက် ‘ဝ’တပ်ခွဲမှူးကို ရိုက်နှက်ရာတွင် ကျူးလွန်ခဲ့သည့် ကိုးကန့်တပ်သားများကို MNDAA တပ်ဖွဲ့မှ စုံစမ်းဖော်ထုတ်ပြီး နမ့်တစ်မြို့သို့ လာရောက်တောင်းပန်ခိုင်းရန်နှင့် မလာရောက်ပါက နမ့်တစ်မြို့ရှိ ‘ဝ’တာဝန်ရှိသူများမှ လိုအပ်သလို အရေးယူဆောင်ရွက်သွားမည်ဟု ‘ဝ’တပ်ဖွဲ့က မတ်လ (၇) ရက်တွင် စာထုတ်ပြန်ခဲ့သည်။