သျှမ်းပြည်တပ်မတော် SSA ထူထောင်ခြင်း နှစ် (၆၀)ပြည့် အခမ်းအနားကို SSPP/SSA ဌာနချုပ်တွင် ကျင်းပခဲ့ပြီး ရက္ခိုင့်တပ်တော် AA မှ ဒုစစ်ဦးစီးချုပ် ဒေါက်တာညိုထွန်းအောင် တက်ရောက်ခဲ့ကြောင်း စုံစမ်းသိရသည်။

ယနေ့ (ဧပြီလ ၂၄ ရက်)တွင် ကျရောက်သည့် သျှမ်းပြည်တပ်မတော် SSA ထူထောင်ခြင်း နှစ်(၆၀)ပြည့် အခမ်းအနားကို သျှမ်းပြည်တိုးတက်ရေးပါတီ/ သျှမ်းပြည်တပ်မတော် (SSPP/SSA) ဌာနချုပ်ဖြစ်သည့် ကျေးသီးမြို့နယ်၊ ဝမ်ဟိုင်းတွင် ကျင်းပခဲ့ရာ SSPP/SSA ဉက္ကဋ္ဌ ဗိုလ်ချုပ်ကြီး ပန်ဖ နှင့်အတူ ရက္ခိုင့်တပ်တော် AA မှ ဒုစစ်ဦးစီးချုပ် ဒေါက်တာညိုထွန်းအောင် တက်ရောက်ခဲ့သည်။

၎င်းအခမ်းအနားသို့ ရှမ်းတိုင်းရင်းသားများ ဒီမိုကရေစီအဖွဲ့ချုပ် (SNLD) နှင့် ပအိုဝ်းအမျိုးသား လွတ်မြောက်ရေးတပ်မတော် (PNLO/PNLA) တို့က သဝဏ်လွှာ ပေးပို့ခဲ့ပြီး ရက္ခိုင့်တပ်တော် (ULA/AA) မှ ဒုစစ်ဦးစီးချုပ် ဒေါက်တာညိုထွန်းအောင် က ဂုဏ်ပြုအမှာစကား ပြောကြားခဲ့ကြောင်း အခမ်းအနား တက်ရောက်သူများထံမှ သိရသည်။

“၂၀၂၁ အာဏာသိမ်းမှုနောက်ပိုင်း အပြောင်းအလဲ ရှိခဲ့သလို ၂၀၂၃ က “၁၀၂၇ စစ်ဆင်ရေး”ကာလ အပြီးမှာလည်း စစ်ရေး၊ နိုင်ငံရေး အပြောင်းအလဲတွေ အများကြီး ရှိခဲ့ပါတယ်။ ပြောင်းလဲလာတဲ့ နိုင်ငံရေး ရေစီးကြောင်းနဲ့အတူ ကိုယ့်လူမျိုး၊ ကိုယ့်ဒေသအတွက် အကျိုးဖြစ်ထွန်းတဲ့ အခြေအနေ အချိန်အခါ ပေါ်မှာ မူတည်ပြီး SSPP/SSA နဲ့ သျှမ်းပြည်သူလူထုအနေနဲ့ အဖွဲ့အစည်းရဲ့ ရည်မှန်းချက်တွေ ဒီထက်ပိုပြီးမှပဲ ပြည့်ဝနိုင်ပါစေ”ဟု ဒေါက်တာညိုထွန်းအောင်က ဂုဏ်ပြုအမှာစကားတွင် ပြောကြားသွားခဲ့သည်။

ထို့အပြင် ရခိုင်အမျိုးသားအဖွဲ့ချုပ် (ULA/AA) ၏ ဂုဏ်ထူးဆောင်တံဆိပ်ကို SSPP/SSA ဉက္ကဋ္ဌ ဗိုလ်ချုပ်ကြီး ပန်ဖ အား AA မှ ဒုစစ်ဦးစီးချုပ် ဒေါက်တာညိုထွန်းအောင် ကိုယ်တိုင် ပေးအပ်ချီးမြှင့်ခဲ့ကြောင်း အခမ်းအနား တက်ရောက်သူများက ပြောသည်။

SSPP/SSA ဌာနချုပ်တွင် ကျင်းပခဲ့သည့် သျှမ်းပြည်တပ်မတော် SSA ထူထောင်ခြင်း နှစ်(၆၀)ပြည့် အခမ်းအနားတွင် SSPP/SSA နာယက ဗိုလ်ချုပ်ကြီး ဆေထင် က အဖွင့်အမှာစကား ပြောကြားခဲ့ပြီး ဗိုလ်မှူးစိုင်းဖုန်းဟန်က သျှမ်းပြည်တပ်မတော် SSA ဖြတ်သန်းလာခဲ့သည့် သမိုင်းဖြစ်စဉ်များကို ဖတ်ကြားခဲ့သည်။

SSPP/SSA တပ်ဖွဲ့အနေဖြင့် နယ်ချဲ့စနစ်၊ အာဏာရှင်စနစ်နှင့် အရင်းရှင်စနစ်တို့ကို တိုက်ဖျက်ပြီး မဟာလူမျိုးကြီးဝါဒနှင့် ကျဉ်းမြောင်းသော ကိုယ့်လူမျိုးရေးဝါဒတို့ကိုလည်း ဆန့်ကျင်ကာ ငြိမ်းချမ်းစွာ အတူယှဉ်တွဲနေထိုင်ရေးကို ဆက်လက်လျှောက်လှမ်းသွားမည်ဖြစ်ကြောင်း အခမ်းအနားတွင် ဗိုလ်မှူးစိုင်းဖုန်းဟန်က ပြောဆိုသွားခဲ့သည်။

၁၉၅၈ ခုနှစ် မေလ ၂၁ ရက်မှ စတင်ခဲ့သည့် သျှမ်းလက်နက်ကိုင် တော်လှန်ရေးလမ်းစဉ်တွင် တကွဲတပြား ဖြစ်နေသည့် သျှမ်းတပ်များကို ၁၉၆၄ ခုနှစ် ဧပြီလ ၂၄ ရက်တွင် စုစည်း၍ မြန်မာနိုင်ငံ၏ ပထမဆုံးသမ္မတဖြစ်သူ ညောင်ရွှေစော်ဘွား စဝ်ရွှေသိုက်၏ မဟာဒေဝီ စဝ်နန်းဟိန်းခမ်းအား နာယကအဖြစ် တင်မြောက်ပြီး သျှမ်းပြည်တပ်မတော် (Shan State Army – SSA) ဟူ၍ တည်ထောင်ခဲ့ခြင်း ဖြစ်သည်။