သျှမ်းပြည်နယ် တောင်ပိုင်း၊ ညောင်ရွှေမြို့နယ်၊ အင်းလေးကန်ဒေသ၊ ညောင်လေးပင်ရွာအနီး ပြီးခဲ့သည့် ဧပြီလ ၁၃ ရက်နေ့က တိုက်ပွဲ ဖြစ်ပွားရာ တော်လှန်ရေး ဘက်တော်သား ၅ ဦး ကျဆုံးခဲ့ရသည်ဟု စစ်ရေးသတင်းရင်းမြစ်က ယနေ့ (ဧပြီလ ၁၅ ရက်) တွင် ပြောသည်။

ဒေသတွင်း စစ်ကြောင်းထိုးနေသည့် စစ်ကောင်စီတပ်နှင့် တော်လှန်ရေးတပ်များ ညောင်လေးပင်ရွာ အနီး တိုက်ပွဲ ဖြစ်ပွားရာ အင်းလေး PDF မှ ရဲဘော် ၂ ဦး၊ ဖယ်ခုံ PDF မှ ရဲဘော် ၂ ဦးနှင့် Free Burma Ranger ကူညီရေးအဖွဲ့မှ တစ်ဦးး ကျဆုံးခဲ့သည်ဟု ၎င်းကဆိုသည်။

“တော်လှန်ရေးတပ်ဘက်က ၅ ဦးကျလို့ သိရပါတယ်။ စစ်တပ်က စောင့်ကြည့်ရေး ဒရုန်းသုံးနေပါတယ်” ဟု ၎င်းကဆက်ပြောသည်။

အဆိုပါ တိုက်ပွဲနှင့် ပတ်သက်၍ “စစ်ကောင်စီတပ်သား ၃၀ ကျော်သေဆုံးပြီး အလောင်းများ လာမကောက်သေးကြောင်း IPDF မှ တပ်ခွဲ (၁)၊ တပ်စိတ် (၁) မှ ပ-တပ်စိပ်မှူး ရဲဘော်အောင်ကြီးနှင့် တပ်ခွဲ(၁)၊ တပ်စိတ် (၁) မှ ဒု-တပ်စိပ်မှူး ရဲဘော်အယ်ဝိုင်း တို့ ၂ ဦး မြင့်မြတ်စွာ အသက် ပေးလှူခဲ့ကြောင်း အင်းလေး ပြည်သူ့ကာကွယ်ရေးတပ်မှ ယနေ့ ထုတ်ပြန် အသိပေးသည်။

ညောင်လေးပင်ရွာသို့ စစ်ကြောင်းထိုးလာသည့် စစ်ကောင်စီတပ်ကို လက်ဦးမှုရယူ တိုက်ခိုက်ရာ စစ်ကောင်စီတပ် ဘက်မှ ၃၀ ထက်မနည်း သေဆုံးပြီး အောင်ပန်း ကုတင် ၇၀၀ စစ်ဆေးရုံသို့ ၂၀ ကျော် ပို့ဆောင်ခဲ့ရကြောင်း ထုတ်ပြန်ချက်တွင် ဖော်ပြထားသည်။

တိုက်ပွဲ အတွင်း စစ်တပ်က လေကြောင်းပစ်ကူ ပေးခဲ့ကြောင်း၊ စစ်တပ်ဘက်မှ ထိခိုက် သေဆုံးမှု အခြေအနေ မသိရသေးကြောင်း ဒေသခံ တစ်ဦးက ဆိုသည်။

ကမ္ဘာကျော် အင်းလေးကန် တောင်ဖက်ရှိ ညောင်လေးပင်နှင့် ရေပူရွာကြား ဧပြီလ ၄ ရက်နေ့ကစပြီး စစ်ကောင်စီတပ်၊ PNO ပြည်သူ့စစ် ပူးပေါင်းတပ်နှင့် တော်လှန်ရေးပူးပေါင်းတပ်ဖွဲ့များ တိုက်ပွဲဖြစ်ပွားနေခြင်း ဖြစ်သည်။