Thursday, May 30, 2024

နမ့်ခမ်း TNLA ဦးဆောင်ပြီး တိုက်ပွဲကြား ကျင်းပမည့် သင်္ကြန်ပွဲကြောင့် ဒေသခံများ လုံခြုံရေးစိုးရိမ်

Must read

သျှမ်းပြည် နမ့်ခမ်းမြို့တွင် တအာင်း(ပလောင်) အမျိုးသားလွတ်မြောက်ရေးတပ်မတော် TNLA မှ ဦးဆောင်ပြီး တိုက်ပွဲကာလအတွင်း ကျင်းပမည့် သင်္ကြန်ပွဲတော်ကြောင့် ဒေသခံများက လုံခြုံရေး စိုးရိမ်နေကြောင်း စုံစမ်းသိရသည်။

သင်္ကြန်ပွဲတော် ကာလဖြစ်သည့် ဧပြီလ ၁၄ ရက်မှ ၁၇ ရက်အထိ နမ့်ခမ်းမြို့၌ တအာင်း(ပလောင်)တပ်ဖွဲ့ TNLA မှ ဦးဆောင်ပြီး မြို့လယ်ဘုရားကြီး ပွဲတော်ဝင်း (ပန်ပွဲ)တွင် ဗဟိုမဏ္ဍာပ် တည်ဆောက်နေပြီး တိုက်ပွဲကာလအတွင်း ကျင်းပမည့် သင်္ကြန်ပွဲတော်ကြောင့် ပြည်သူများ လုံခြုံရေး စိုးရိမ်နေရကြောင်း နမ့်ခမ်းဒေသခံများက ပြောသည်။

“ပန်ပွဲကွင်းမှာ သင်္ကြန်လုပ်နေတဲ့အချိန် စစ်တပ်က လေယာဉ်နဲ့ ဗုံးလာကြဲမှာလည်း ကြောက်တယ်။ တိုက်ပွဲကြားထဲမှာ TNLA က အခုလို သင်္ကြန်ပွဲကို အကြီးအကျယ် လုပ်မယ်ဆိုတော့ ပြည်သူတွေက ကိုယ့်ဘာသာ သတိထားပြီး နေရတယ်။ ပြည်သူတွေကတော့ စစ်တပ်က ဘာလုပ်လာဦးမလဲဆိုတာ မသိတော့ ကြောက်တာပေါ့”ဟု နမ့်ခမ်းမြို့မှ ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။

TNLA တပ်ဖွဲ့က ဦးဆောင်ကျင်းပမည့် ၎င်းသင်္ကြန်ပွဲတော်ကို စစ်ဘေးသင့် သာသနာ့ အဆောက်အဦးများ ပြန်လည်ပြုပြင် မွမ်းမံရေး ရံပုံငွေပွဲအဖြစ် နမ့်ခမ်းမြို့ပေါ် ရပ်ကွက်များမှ အကပဒေသာများဖြင့် သွား‌ရောက်ဖျော်ဖြေရန် ရပ်ကွက်အုပ်ချုပ်ရေးမှူးများကို အစည်းအဝေး ခေါ်ယူခဲ့ကြောင်း သိရသည်။

“မြို့လယ်ဘုရားနားမှာရှိတဲ့ ပန်ပွဲကွင်းထဲမှာ လုပ်တော့ ရပ်ကွက်အုပ်ချုပ်ရေးမှူးတွေကို ခေါ်ပြီးတော့ သူတို့သင်္ကြန်ပွဲ အကြီးအကျယ် လုပ်မယ်၊ ရပ်ကွက်တစ်ခုကို အကတစ်မျိုးမျိုး သွားပေးဖို့ပြောတယ်။ တစ်ဖွဲ့ကို ၁၀ သိန်း ဆုချမယ်လို့လည်း ပြောဆိုပေမယ့် ရပ်ကွက်လူကြီးကတော့ ပွဲရက်နားကပ်မှ ပြောလို့ မဖြစ်နိုင်ဘူးဆိုတာ ပြန်ပြောခဲ့တယ်”ဟု နမ့်ခမ်းမြို့မှ ၎င်းဒေသခံ အမျိုးသမီးက သျှမ်းသံတော်ဆင့်ကို ပြောသည်။

နမ့်ခမ်းမြို့တွင် TNLA တပ်ဖွဲ့က ဦးဆောင်ကျင်းပမည့် သင်္ကြန်ပွဲတော်တွင် ဒေသခံများ စိုးရိမ်နေခြင်းကြောင့် လုံခြုံရေးအတွက် စီမံဆောင်ရွက်ထားမှုကို သျှမ်းသံတော်ဆင့်မှ TNLA တပ်ဖွဲ့၏ သတင်းနှင့် ပြန်ကြားရေးဌာနသို့ စာပို့မေးမြန်းထား‌သော်လည်း ပြန်လည်ဖြေကြားခြင်း မရှိသေးပါ။

နမ့်ခမ်းမြို့တွင် သင်္ကြန်ပွဲတော် ကျင်းပမည့် မြို့လယ်ဘုရားကြီး ပွဲတော်ဝင်းရှိ ညဈေးတန်းတွင် ဖွင့်လှစ်ရောင်းချနေသည့် ဈေးဆိုင်များထံမှ အခွန်ကောက်ခံနိုင်ရန်အတွက် မတ်လအတွင်းက တအာင်း(ပလောင်)တပ်ဖွဲ့ TNLA မှ ဈေးသည်များနှင့် အစည်းအဝေးပြုလုပ်ခဲ့ရာ ညှိနှိုင်းမှု အဆင်မပြေခဲ့ကြောင်း နမ့်ခမ်းမြို့ ဈေးသည်များက ပြောဆိုသည်။

ထို့အပြင် နမ့်ခမ်းမြို့နယ်တွင် သင်္ကြန်ကာလ သျှမ်းရိုးရာအရ ဘုရားကန်တော့ခြင်း၊ အလှဆင် ရေပက်ဖြန်းခြင်းတို့ ပြုလုပ်ကြသည့် မောက်ကိုဆွဲ့ပန်း (မွၵ်ႇၵေႃႇသွႆႈ) ပန်းခူးခြင်းဓလေ့ကိုလည်း တိုက်ပွဲကာလနောက်ပိုင်း မြေမြှုပ်မိုင်းအန္တရာယ်ကြောင့် တောတောင်များသို့ သွားရောက်ခူးယူခြင်း မပြုလုပ်နိုင်ကြောင်း နမ့်ခမ်းဒေသခံများက ပြောသည်။

ပြီးခဲ့သည့် မတ်လ တတိယပတ်အတွင်းက နမ့်ခမ်းမြို့နယ် ဝမ်နားကျေးရွာရှိ ရေကန်အနီးတွင် ငါးသွားဖမ်းသည့် လူငယ်တစ်ဦးသည် မြေမြှုပ်မိုင်း နင်းမိ၍ ပေါက်ကွဲခဲ့ရာ ခြေထောက်တစ်ဖက် ဖြတ်လိုက်ရကြောင်း နမ့်ခမ်းဒေသခံများထံမှ သိရသည်။

Leave a Comments

- Advertisement -spot_img

Latest article