သျှမ်း-ကရင်နီ (ကယား) ပြည်နယ်စပ်ဒေသတလျှောက်တွင် ကရင်နီအမျိုးသားများ လွတ်မြောက်ရေး တပ်မတော် KNDF၊ PDF ပူးပေါင်းတပ်ဖွဲ့နှင့် စစ်ကောင်စီတပ်တို့အကြား တိုက်ပွဲပြင်းထန်နေဆဲကြောင်း စုံစမ်းသိရသည်။

ပင်လောင်းမြို့နယ်နှင့် ညောင်ရွှေမြို့နယ်တွင် မတ်လ ၁၀ ရက်နေ့ကတည်းက KNDF၊ PDF နှင့် စစ်ကောင်စီတပ်ဖွဲ့တို့ တိုက်ပွဲစတင်ဖြစ်ပွားခဲ့ရာ လက်ရှိအချိန်ထိ ညောင်လေးပင်ရွာနှင့် နန်းတုတ်ရွာတွင် နှစ်ဖက်တပ်ဖွဲ့ တိုက်ပွဲဆက်လက်ဖြစ်ပွားနေကြောင်း ဒေသခံများကပြောသည်။

“တိုက်ပွဲကတော့ မနေ့ကအထိ ဖြစ်နေသေးတယ်။ ညောင်လေးပင်ရွာဘက်မှာ တိုက်ပွဲဖြစ်တယ်။ ကျနော်တို့ နန်းတုတ်ရွာဘက်မှာလည်း လက်နက်ကြီးကျနေသေးတယ်။ အခုထိအိမ်ကိုပြန်လို့မရသေးဘူး” ဟု နန်းတုတ် ကျေးရွာဒေသခံတစ်ဦးက ပြောသည်။

အလားတူ ပင်လောင်းနှင့် ဖယ်ခုံအကြားရှိ နောင်ဝိုးကျေးရွာတွင်လည်း ယခုရက်ပိုင်းအတွင်း တိုက်ပွဲဆက်ဖြစ်နေပြီး ယမန်နေ့ မတ်လ ၉ ရက်တွင် စစ်ကောင်စီက နောင်ဝိုးရွာကို လေကြောင်းဖြင့် ဗုံးကြဲတိုက်ခိုက်နေသည်ဟု နမ့်ဖာမှုဒေသခံတစ်ဦးက ပြောသည်။

“နောင်ဝိုးဘက်မှာတော့ ဒီရက်ပိုင်းတိုက်ပွဲ ဆက်ဖြစ်နေသေးတယ်ဗျ။ စစ်ကောင်စီကတော လေကြောင်းကနေ ဗုံးကြဲတယ်၊ ဈေးတွေထိတယ်။ ဒီရက်ပိုင်း အခြေအနေတော့ နည်းနည်းဆိုးလာတယ်” ဟု ပြောသည်။

အဆိုပါ တိုက်ပွဲအခြေအနေနှင့် ပတ်သက်၍ သျှမ်းသံတော်ဆင့်မှ KNDF ပြန်ကြားရေးထံသို့ ဆက်သွယ်မေးမြန်းရာ လက်တလောတွင် ပြန်လည်ဖြေကြားခြင်းမရှိသေးပေ။

ထို့အတူ မိုးဗြဲမြို့ အခြေစိုက် စစ်ကောင်စီ ခြေမြန်တပ်ရင်း ခမရ-၄၂၂ တပ်ရင်းအနီးတဝိုက်တွင်လည်း စစ်ကောင်စီတပ်နှင့် ကရင်နီပူးပေါင်းတော်လှန်ရေး အင်းအာစုဖြစ်သည့် KNDF၊ Mobye PDF နှင့် Pekhon PDF တို့ တိုက်ပွဲဖြစ်ပွားနေလျက်ရှိကြောင်း သိရသည်။

ယခုကဲ့သို့ တိုက်ပွဲဖြစ်ပွားနေချိန်တွင် ပင်လောင်းမြို့နယ်မှာ စစ်ကောင်စီက ပြည်သူ့စစ်မှုထမ်းသင်တန်းကျောင်း ဖွင့်လှစ်ပြီး စစ်မှုထမ်းစာရင်း ပါဝင်သူများအား စတင်ခေါ်ယူနေကြောင်း ပင်လောင်းမြို့ဒေသခံတစ်ဦးက ပြောသည်။

“တချို့ရွာတွေဘက်မှာတော့ ခေါ်နေပြီ၊ သွားနေရပြီလို့ ကြားတယ်။ မနေ့ကပြောတာတော့ မင်းဘူးရွာအုပ်စုက လူတွေ အားလုံးပေါင်း ၁၈ ယောက်တက်ရမယ်လို့တော့ ပြောတယ်။ အဲ့ဒါကိုသင်တန်းတက်တဲ့သူတွေကို နှစ်ယောက်ပေါင်း သေနတ်တစ်လက်နဲ့ ကျည် ၃ ထောင့်ပဲပေးတယ်လို့ သင်တန်းကဆင်းလာတဲ့ သူငယ်ချင်းက ပြောတာ။ နောက်သင်တန်းကိုလည်း ၅ ရက်ပဲ တက်ရတယ်” ဟု ၎င်းကပြောသည်။

ထိုကဲ့သို့ ပြည်သူ့စစ်မှုထမ်းသင်တန်း တက်ရောက်ပြီးသူများကို စစ်ကောင်စီက အချိန်မရွေး လိုအပ်လာပါက ပြန်လည်ခေါ်ယူမည်ဟု ညွန်ကြားထားသောကြောင့် စစ်မှုထမ်းသင်တန်းတက်ရောက်သူအား တိုက်ပွဲဖြစ်ပွားရာ ရှေ့တန်းသို့ပို့ခံရမည်ကို စိုးရိမ်နေလျက်ရှိသည်။

“သင်တန်းတက်ပြီးသူများကို အချိန်မရွေးလိုရင်တော့ ပြန်ခေါ်မယ်လို့တော့ ပြောတယ်။ သင်တန်းကလည်း ကောင်းကောင်း မတက်ရဘူး။ တကယ်လို့ သူတို့ရှေးတန်းပို့ရင်တော့ သေယုံဘဲရှိတယ်။ အလကား သွားသေပေးတာနဲ့အတူတူပဲ” ဟု သင်တန်းတက်ရောက်သူ ခွန်ဇော် (အမည်လွှဲ) နှင့် နီးစပ်သည့်မိတ်ဆွေတစ်ဦးကပြောသည်။

ပြည်သူ့စစ်မှုထမ်းသင်တန်းအမှတ်စဉ် (၁) ဖွင့်လှစ်ပွဲအခမ်းအနားကို ယမန်နေ့ ဧပြီလ ၉ ရက်နေ့တွင် တိုင်းဒေသကြီးနှင့် ပြည်နယ်အသီးသီးရှိ တိုင်းစစ်ဌာနချုပ်၌ ကျင်းပပြလုပ်ခဲ့ကြောင်း စစ်ကောင်စီက ထုတ်ပြန်ထားသည်။

ပြည်သူ့စစ် စစ်မှုထမ်း ပထမအသုတ်ကို သင်္ကြန် ကာလပြီးမှ ခေါ်ယူမည်ဟု စစ်ကောင်စီက ကြေညာထား သော်လည်း ယခုအခါ နည်းဥပဒေ ပြဌာန်းနိုင်ခြင်း မရှိသေးစဥ် စတင်ခေါ်ယူနေပြီဖြစ်ပြီး လစဥ် အနည်းဆုံး လူငယ် ၅,၀၀၀ မှ ၁၀,၀၀၀ အထိ ခေါ်ယူမည် ဖြစ်ကြောင်း သိရသည်။