သျှမ်းပြည် ဆီဆိုင်မြို့နယ် လွယ်ပွတ်ကျေးရွာတွင် တိုက်ပွဲထပ်မံဖြစ်ပွားခဲ့ရာ စစ်ကောင်စီတပ်ဖွဲ့ဝင် ၈ ဦးထက်မနည်းသေဆုံးခဲ့ကြောင်း ပအိုဝ်းအမျိုးသားလွတ်မြောက်ရေးတပ်မတော် PNLA တာဝန်ခံတစ်ဦးက ပြောသည်။
ဆီဆိုင်မြို့နယ် လွယ်ပွတ်ကျေးရွာတွင် ဧပြီလ ၆ ရက်နေ့ကတည်းက ပအိုဝ်းအမျိုးသားလွတ်မြောက်ရေး တပ်မတော် PNLA နှင့် စစ်ကောင်စီတပ်၊ ပအိုဝ်းပြည်သူ့စစ် PNA တို့အကြား တိုက်ပွဲထပ်မံဖြစ်ပွားခဲ့ရာ စစ်ကောင်စီဘက်က တပ်ဖွဲ့ဝင် ၈ ဦးထက်မနည်း သေဆုံးခဲ့ကြောင်း PNLA ၏ပြန်ကြားရေးတာဝန်ခံ ခွန်ရိန်းယံက ပြောသည်။
“ဆီဆိုင်မြို့နယ် ဆိုက်ခေါင်စံပြကျေးရွာ၊ လွယ်ပွတ်ကျေးရွာဘက်မှာ တိုက်ပွဲဖြစ်တယ်။ စစ်ကောင်စီဘက် ကတော့ ၈ ဦးထက်မနည်း သေဆုံးတယ်လို့ ကျနော်တို့သိရပါတယ်။ ပြီးတော့ အဲ့ဒီထဲမှာလည်း သူတို့ကလက်နက်ကြီးတွေနဲ့ ရွာတွေထဲကို ပစ်ခတ်နေတာ၊ ထုနေတာ ရှိတယ်” ဟု ၎င်းကပြောသည်။
အလားတူ ဆီဆိုင်မြို့တွင် နှစ်ဖက်တပ်ဖွဲ့အကြား တိုက်ပွဲဆက်လက်ဖြစ်ပွားနေပြီး ဧပြီလ ၆ ရက်တွင် စစ်ကောင်စီတပ်ဖွဲ့က ဆီဆိုင်မြို့ကို လက်နက်ကြီးဖြင့် အချက်ပေါင်း ၂၀ ကျော် ပစ်ခတ်တိုက်ခိုက်ခဲ့သေးကြောင်း ဆိုသည်။
ထို့ကြောင့် လူငယ်များအနေဖြင့် တစ်နိုင်ငံလုံး စစ်အာဏာရှင်စနစ်ကို တော်လှန်တိုက်ခိုက်နေသည့်အချိန်မှာ စစ်ကောင်စီ၏ ထောက်တိုင်အဖြစ်မနေဘဲ တော်လှန်ရေးမှာပါဝင်လာကြရန် အထူးတိုက်တွန်းလိုကြောင်း ခွန်ရိန်းယံက ထပ်လောင်းပြောသည်။
“အခုအချိန်မှာ တစ်နိုင်ငံလုံးက စစ်အာဏာရှင်စနစ်ကို တော်လှန်တိုက်ခိုက်နေတဲ့အချိန်ဖြစ်ပါတယ်။ ဒါကြောင့် ကိုယ်ကစစ်ကောင်စီရဲ့ ထောက်တိုင်ဖြစ်နေမယ်ဆိုရင် တော်လှန်ရေးလှိုင်းလုံးနဲ့အတူ ပျောက်ကွယ်သွားနိုင်တယ်။ ဒါကြောင့် အမြင်မှန်ရကြပြီး စစ်ကောင်စီရဲ့ ထောက်တိုင်အဖြစ်မနေကြဘဲ တော်လှန်ရေးမှာပါဝင်ကြဖို့ အထူးတိုက်တွန်းချင်တယ်” ဟု ပြောသည်။
သျှမ်းတောင် ဆီဆိုင်၊ ဟိုပုံးနှင့် ပင်လောင်းမြို့နယ်တွင် တိုက်ပွဲကြောင့် ၂ လကျော်ကြာ အရပ်သားသေဆုံးမှု ၅၅ ဦးအထိ မြင့်တက်လာနေပြီး ကလေးနှင့်အမျိုးသမီး အပါအဝင် ထိခိုက်ဒဏ်ရာရမှု ၇၀ ဝန်းကျင်အထိ ရှိလာနေပြီ ဖြစ်ကြောင်း ပအိုဝ်းလူငယ်အစည်းအရုံးက မတ်လ ၂ ရက်တွင် ထုတ်ပြန်ထားသည်။
Leave a Comments