နယ်စပ်ဖြတ်သန်းသွားလာမှုကို လူအဝင်အထွက် ထိန်းချုပ်နိုင်ရန် UID ခေါ် စမတ်ကတ် ပါရှိမှသာ ဖြတ်သန်းခွင့်ပြုမည်ဖြစ်ကြောင်း အာဏာသိမ်း စစ်ကောင်စီက ဧပြီလ ၄ ရက်တွင် ထုတ်ပြန်လိုက်သည်။

လာမည့် မေလ ၁ ရက် မှစတင်ပြီး နယ်စပ်ဖြတ်သန်းသွားလာမှုကို လူဦးရေစာရင်း ထိန်းချုပ်နိုင်ရေးအတွက် စစ်ကောင်စီ လူဝင်မှုကြီးကြပ်ရေး လဝကမှ UID ခေါ် စမတ်ကတ် ပါရှိမှသာ နယ်စပ်ဖြတ်သန်းခွင့်လက်မှတ် (TBP/BP) များ ထုတ်ပေးမည်ဟု ထုတ်ပြန်ကြေညာလာခြင်းဖြစ်သည်။

မြန်မာနိုင်ငံသားများ အနေဖြင့် တရုတ်၊ အိန္ဒိယနှင့် ထိုင်းနိုင်ငံသို့ နယ်စပ်ဂိတ်များမှ ဝင်ထွက်သွားလာရာတွင် ယခင်က ယာယီနယ်စပ်ဖြတ်သန်းခွင့် (TBP/BP) လက်မှတ်များဖြင့် ခွင့်ပြုခဲ့သည်။

စစ်ကောင်စီ၏ ယခုထုတ်ပြန်ချက်အရ တစ်ဘက်နိုင်ငံသို့ သွားရောက်လိုသူများအနေဖြင့် ယာယီနယ်စပ်ဖြတ်သန်းခွင့် (TBP/BP) လက်မှတ်များ လျှောက်ထားရာတွင် မိမိမှတ်ပုံတင် မူရင်းနဲ့အတူ UID ခေါ် စမတ်ကတ် စာရွက်ပါ တစ်ပါတည်း ယူဆောင်သွားရမည်ဖြစ်သည်။

အလားတူ နိုင်ငံကူးလက်မှတ် ပက်စ်ပို့ ပြုလုပ်ရာတွင်လည်း UID ခေါ် စမတ်ကတ် စာရွက်ပါရှိမှသာ ပြုလုပ်ပေးတော့ကြောင်း ပက်စ်ပို့ သွားရောက်ပြုလုပ်သူများထံမှ သိရသည်။

စစ်ကောင်စီလက်အောက်ခံ လူဝင်မှုကြီးကြပ်ရေး လဝက မှ လက်ရှိပြုလုပ်ပေးနေသည့် UID (Unique Identity Number) ခေါ် စမတ်ကတ် သည် နိုင်ငံအတွင်း နေထိုင်သည့် အသက် (၁၀)နှစ်အထက် ရှိသူများကို အီလက်ထရောနစ် စနစ်ဖြင့် ဇီဝအချက်အလက် အပါအဝင် ကိုယ်ရေးအချက်အလက်များကို ကောက်ယူမှတ်ပုံတင်ပြီး ဂဏန်း (၁၀)လုံး ပါရှိသည်။

လက်ရှိတွင် လားရှိုးမြို့နယ်ရှိ ဒေသခံပြည်သူများကို စစ်ကောင်စီ လဝက ဝန်ထမ်းများမှ ရပ်ကွက်အလိုက် UID ခေါ် စမတ်ကတ်များကို ကွင်းဆင်းဆောင်ရွက်ပေးနေပြီး တာချီလိတ်မြို့တွင်လည်း လေဆိပ်၌ ခရီးသွားမည့်သူများကို မှတ်ပုံတင်မိတ္တူများ တောင်းယူ၍ စမတ်ကတ် မလုပ်ရသေးသူများကို တစ်ခါတည်း လုပ်ဆောင်ပေးနေကြောင်း ဒေသခံများက ပြောဆိုသည်။

စစ်ကောင်စီတပ်က ဖေဖော်ဝါရီလတွင် ပြည်သူ့စစ်မှုထမ်းဥပဒေကို ပြဋ္ဌာန်းလိုက်ပြီးနောက် နိုင်ငံအတွင်း ခရီးသွားလာမှုနှင့် ပြည်ပထွက်ခွာလိုသူတို့ကို စစ်ဆေးမှု ပိုမိုတင်းကျပ်လာပြီး မှတ်ပုံတင်အပြင် UID ခေါ် စမတ်ကတ် ယူဆောင်ရန် စသည့် ကန့်သတ်ချက်အသစ်များဖြင့် လုပ်ဆောင်လာကြောင်း ခရီးသည် ပို့ဆောင်ရေးယာဉ်လိုင်းများထံမှ သိရသည်။