သျှမ်းပြည် ကွတ်ခိုင်မြို့နယ် အရပ်သားတစ်ဦးကို ကိုးကန့်တပ်ဖွဲ့ MNDAA က ဖမ်းဆီးရိုက်နှက်၍ သေဆုံးခဲ့ရပြီး ၎င်းအမှုကိစ္စကို ဖြေရှင်းချက်မပေးဘဲ တာဝန်မယူဟု ပြောဆိုကြောင်း စုံစမ်းသိရသည်။
မတ်လဆန်းပိုင်းက ကွတ်ခိုင်မြို့နယ် ကောင်းခါးမြို့သစ် ရပ်ကွက် (၂) တွင် နေထိုင်သည့် အသက် ၃၅ နှစ်ခန့်ရှိ ဇော်ဆိုင်း ဆိုသူသည် နေအိမ်မှ ထွက်သွားပြီး ရက်သတ္တပတ်ခန့်အကြာ ပျောက်ဆုံးသွားခဲ့ကြောင်း သိရသည်။
ထို့ကြောင့် ဆွေမျိုးများနှင့် အိမ်နီးချင်းများက ဝိုင်းဝန်းစုံစမ်းခဲ့ရာ မတ်လ (၆) ရက်နေ့တွင် သိန္နီမြို့နယ် စယ်အူကျေးရွာရှိ ကိုးကန့်တပ်ဖွဲ့ MNDAA မှ လူတစ်ဦးကို ဖမ်းဆီးစစ်ဆေးရင်း လက်လွန်သေဆုံးသွားခဲ့ကြောင်း သတင်းကြားသိရ၍ သွားရောက်ကြည့်ရှုခဲ့ရာ တစ်လနီးပါးကြာ ပျောက်ဆုံးနေသူ၏ ရုပ်အလောင်းကို တွေ့ရှိခဲ့ကြောင်း ကွတ်ခိုင်ဒေသခံများက ပြောသည်။
“စယ်အူမှာ ရုံးထိုင်တဲ့ သူတို့ရဲ့ တာဝန်ခံကို ရပ်ရွာက တာဝန်ရှိတဲ့လူတွေ သွားပြီး စကားပြောခဲ့တာ။ အဲ့အချိန်မှာ သူတို့ဘက်က အထက်ကို တင်ပြမယ်ပြောတယ်။ ဒါပေမယ့် အကြောင်းပြန်လာတဲ့နေ့က အလောင်းပြန်လာယူလို့ရတယ်၊ လျော်ကြေးတော့ မပေးနိုင်ဘူး။ ဒီတစ်ယောက်သည် သူတို့ စစ်သားနှစ်ယောက်ကို ဓားနဲ့ခုတ်တယ်ဆိုပြီးမှ ဆင်ခြေပေးခဲ့တာပေါ့”ဟု ကွတ်ခိုင်ဒေသခံ သေဆုံးသူ၏ အိမ်နီးချင်းတစ်ဦးက သျှမ်းသံတော်ဆင့်ကို ပြောသည်။
ကိုးကန့်တပ်ဖွဲ့ MNDAA က ဖမ်းဆီးရိုက်နှက်ခဲ့၍ သေဆုံးခဲ့ရသူမှာ အိမ်ထောင်ရေး ပြိုကွဲမှုဒဏ်ကြောင့် စိတ္တဇပုံစံ ဖြစ်နေပြီး နားမကြားသူ တစ်ဦးဖြစ်ကြောင်း ၎င်းမိသားစုနှင့် နီးစပ်သူများက ပြောသည်။
သိန္နီမြို့နယ် ဟူမင်ရွာအနီး တွေ့ရှိခဲ့သည့် သေဆုံးသူ၏ ရုပ်အလောင်းကို ဧပြီလ ၂ ရက်နေ့တွင် ပြန်လည်တူးဖော်ခဲ့ရာ ခန္ဓာကိုယ်တွင် ရိုက်နှက်ခံထားရသည့် ဒဏ်ရာများ တွေ့ရပြီး ၎င်းရုပ်အလောင်းကို ကွတ်ခိုင်မြို့နယ် လွယ်အန်းရွာတွင် ခရစ်ယာန် ဘာသာရေးထုံးစံအရ ဆုတောင်းပေးပြီး ပြောင်းရွှေ့မြှုပ်နှံပေးခဲ့ကြောင်း သိရသည်။
“လူမျိုးရေး ပဋိပက္ခမဖြစ်အောင် ကိုးကန့်တွေနဲ့ အတတ်နိုင်ဆုံး သွားညှိခဲ့တာပဲ။ သူတို့ဘက်က တာဝန်ယူမှု တာဝန်ခံမှု လုံးဝ မရှိတဲ့အပြင် တကယ်ကို မဖြစ်သင့်တဲ့ စကားပြောတာပေါ့လေ၊ တာဝန်မယူနိုင်ဘူး လျော်ကြေးမပေးနိုင်ဘူး ပြောတယ်။ သတ်တာလည်း သူတို့ဝန်ခံတယ်၊ ဒါကို သူတို့ တာဝန်မယူဘူး ပြောတော့ မဖြစ်သင့်တဲ့ အရာလေနော်”ဟု ကွတ်ခိုင်မြို့နယ်မှ ဖြစ်စဉ်သိရှိသူတစ်ဦးက သျှမ်းသံတော်ဆင့်ကို ပြောသည်။
လက်ရှိတွင် အသက် (၇၀) အရွယ်ရှိ မိခင်ဖြစ်သူနှင့် (၁၀)နှစ်အောက် ကလေးနှစ်ဦး ကျန်ရှိခဲ့ပြီး စားဝတ်နေရေးနှင့် ကျန်းမာရေးစောင့်ရှောက်မှု လိုအပ်နေပြီး သေဆုံးသည်အထိ ဖမ်းဆီးရိုက်နှက်မှု ကျူးလွန်ခဲ့သည့် ကိုးကန့်တပ်သားများကိုလည်း အရေးယူပေးရန် လိုလားကြောင်း ၎င်းမိသားစုနှင့် နီးစပ်သူများက ပြောသည်။
“အမေအိုနဲ့ ကလေးပဲ ကျန်ခဲ့တာဆိုတော့ ရပ်တည်ပေးမယ့်လူ မရှိဘူးလေ။ ကိုးကန့်လူကြီးတွေက လက်အောက်ငယ်သားတွေ မင်းမဲ့စရိုက်ဆန်ဆန် လက်နက်ကိုင်ပြီးတော့ ထင်ရာစိုင်းနေတဲ့ လုပ်ရပ်တွေနဲ့ ဒေသခံကို ခြိမ်းခြောက်နေတယ်။ ဒီလို လူ့အခွင့်အရေး ချိုးဖောက်နေတာတွေကို ထိထိရောက်ရောက် အရေးယူပေးဖို့ တောင်းဆိုချင်တယ်”ဟု ကွတ်ခိုင်မြို့မှ ၎င်းဒေသခံ အမျိုးသားက သျှမ်းသံတော်ဆင့်ကို ဆက်ပြောသည်။
အလားတူ ပြီးခဲ့သည့် ဇန်နဝါရီလ ၂၀ ရက်နေ့ကလည်း သိန္နီမြို့နယ် မိုင်းလီကျေးရွာ အုပ်ချုပ်ရေးမှူးကို ကိုးကန့်တပ်ဖွဲ့ MNDAAမှ လာရောက်ခေါ်ယူ စစ်ဆေးခဲ့ပြီး ရိုက်နှက်ထားသည့် ဒဏ်ရာဒဏ်ချက်များဖြင့် သေဆုံးနေသည့် အလောင်းကိုသာ ပြန်ပို့ခဲ့ကြောင်း သိန္နီဒေသခံများက သျှမ်းသံတော်ဆင့်ကို ပြောသည်။
