သျှမ်းပြည် ဆီဆိုင်မြို့တွင် နေအိမ်ပြန်သည့် အမျိုးသားတစ်ဦးက မြေမြုပ်မိုင်းနင်းမိပြီး အခြေထောက်တစ်ဖက် ဖြတ်ရသည် အထိ ဒဏ်ရာရရှိခဲ့ကြောင်း သိရသည်။
သျှမ်းပြည် ဆီဆိုင်မြို့တွင် မြကန်သာရပ်ကွက် ဧပြီလ ၁ ရက်တွင် အမျိုးသားတစ်ဦး နေအိမ်ပြန်ပြီး ပစ္စည်းပြန်ယူရာမှ နေ့အိမ်ရှေ့တွင် မြေမြုပ်မိုင်းနင်းမိ၍ ခြေထောက်တစ်ဖက် ဖြတ်ရသည့်အထိ ဒဏ်ရာရှိခဲ့ကြောင်း ဆီဆိုင်မြို့နယ် ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
“အဲ့တာက ၁ ရက်က မြေမြုပ်မိုင်းနင်းမိတာ ခြေထောက်တော့ ဖြတ်လိုက်ရတယ်။သူက မြကန်သာရပ်ကွက်မှာ သူတို့ အိမ်ရှေ့မှာပဲ နင်းမိတာ။”ဟု ဆီဆိုင်မြို့ ဒေသခံအမျိုးသားတစ်ဦးက ပြောသည်။
ထိုမြေမြုပ်မိုင်း နင်းမိသော အမျိုးသားသည် မြကန်သာရပ်ကွက်တွင်နေထိုင် ဦးခွန်းထီးဖြစ်ကြောင်း သိရသည်။
သို့သော် ဆီဆိုင်မြို့ထဲကို ပြန်ဝင်လာကြသည့် ဒေသခံများကို စစ်ကောင်စီက ပအိုဝ်းဝတ်စုံ ဝတ်ဆင်စေပြီး လူသားဒိုင်းလုပ်ကာ ဆီဆိုင်မြို့တွင်းနေရာအချို့တွင် ဓာတ်ပုံဝင်ရိုက်ကြောင်း၊ ပြည်သူအား လူသားဒိုင်းအဖြစ် အသုံးပြုရန် ရည်ရွယ်ချက်ဖြင့် လူထုများအား မြို့တွင်းပြန်ဝင်နိုင်ပြီဖြစ်ကြောင်း စစ်ကောင်စီက သတင်းမှား ဖြန့်နေသည်ဟု PNLO က မတ်လ ၃၀ ရက်တွင် အသိပေးထုတ်ပြန်ထားပါသည်။
ထို့အပြင် ဆီဆိုင်မြို့ကို ပြန်ဝင်လာကြသည့် ဒေသခံ ၂၀ ကျော်ကိုလည်း စစ်ကောင်စီက ဖမ်းဆီးထားပြီး အဆက်သွယ်ပြတ် တောက်နေကြောင်း ဆိုသည်။
သျှမ်းတောင် ဆီဆိုင်၊ ဟိုပုံးနှင့် ပင်လောင်းမြို့နယ် တိုက်ပွဲများကြောင့် အရပ်သား သေဆုံးမှု ၅၅ ဦးအထိ ရှိလာပြီး အမျိုးသမီးနှင့် ကလေးငယ်အပါအဝင် အရပ်သား ထိခိုက်ဒဏ်ရာရမှု ၇၀ ဝန်းကျင်အထိ မြင့်တက်လာနေကြောင်း ပအိုဝ်းလူငယ်အစည်းအရုံးက ဧပြီလ ၂ ရက်တွင် ထုတ်ပြန်ထားသည်။
